قازاقستاننىڭ كوممۋنيستىك حالىقتىق پارتياسىنىڭ اقمولا وبلىستىق فيليالى قوعام ومىرىندەگى ايرىقشا وقيعا – قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىنا زور قۇلشىنىسپەن كىرىسىپ وتىر. مۇنداعى ەكپىن تۇسىرەتىن ماسەلەنىڭ ءبىرى قكحپ 14 اقپانداعى كەزەكتەن تىس V سەزىندە قازاقستان رەسپۋبليكاسىنىڭ مەملەكەت باسشىلىعىنان ۇمىتكەر رەتىندە پارتيا وك حاتشىسى ج.احمەتبەكوۆتىڭ ۇسىنىلىپ, ونىڭ ورتالىق سايلاۋ كوميسسياسىندا تىركەلۋى دەر ەدىك. جامبىل اۋجان ۇلى اقمولا وبلىسىنداعى قورعالجىن اۋدانىنىڭ تۋماسى.
ءبىز سايلاۋالدى ناۋقانىنىڭ بارىسىنان حاباردار بولۋ ماقساتىمەن ج.احمەتبەكوۆتى قولداۋ جونىندەگى وبلىستىق شتابقا كەلگەنىمىزدە, پارتيانىڭ وبلىستىق فيليالىنىڭ حاتشىسى ءنايلا ساميگۋلينا قازاقستان ايەلدەرىنىڭ سەزىنەن ورالعان ەكەن.
– مەنىڭ وسىناۋ ءىرى فورۋمعا دەلەگات بولىپ سايلانۋىمنىڭ ءوزى تاۋەلسىز مەملەكەتىمىزدەگى دەموكراتيالىق ۇستىنداردىڭ مىقتىلىعىن دالەلدەيدى, – دەدى ول. – ەلباسى ن.ءا.نازارباەۆتىڭ كەزەكتەن تىس سايلاۋ شاقىرۋ تۋرالى شەشىمى دە بيىلعى مارتەبەلى جىلدىڭ ابىرويىن ارتتىرادى. ورتالىق كوميتەت حاتشىسى ۆ.كوسارەۆتىڭ قاتىسۋىمەن كوكشەتاۋدا اۋداندىق كوميتەت حاتشىلارىنىڭ, قالا جۇرتشىلىعىنىڭ جينالىسى وتكىزىلىپ, وندا پارتيانىڭ ساياسي ناۋقان كەزىندەگى مىندەتتەرى ءتۇسىندىرىلىپ, كانديداتىمىزدىڭ باعدارلاماسى تانىستىرىلدى. ەرىكتى كومەكشىلەرىمىزدىڭ قاتىسۋىمەن ءۇمىتكەرىمىزدىڭ پايداسىنا 6200 قول جينالدى. وبلىستىق جانە زەرەندى, بۋراباي, ساندىقتاۋ, اتباسار, اقكول, جاقسى, ەسىل اۋداندارىندا شتابتار قۇرىلدى.
ءنايلا ابدراحمانقىزىنىڭ ايتۋىنشا, ۇگىت شاراسى بارلىق اۋداندار مەن قالالاردى قامتيدى. ەلىمىز ءۇشىن ەڭ وزەكتى تاقىرىپتاردى بەينەلەيتىن ناسيحاتتىق ماتەريالدار كوپتەپ جەتكىزىلگەن. ۇگىتشىلەر ولاردى وبلىس ورتالىعى مەن ەلدى مەكەندەردىڭ كورنەكى جەرلەرىنە ورنالاستىرۋدا. پارتيانىڭ حالىققا ۇندەۋلەرى دە جۇرتشىلىق نازارىندا. كوكشەتاۋ قالاسىندا ايشىقتى بيلبوردتار پايدا بولدى.
وتكەن جۇمادان قكحپ اقمولا وبلىستىق جانە كوكشەتاۋ قالالىق فيليالى ۇيىمداستىرعان ۇگىت بريگاداسى وبلىس ايماقتارىنا ساپارىن باستادى. ول ءۇش كەزەڭدىك كەستەمەن جۇرگىزىلۋدە. بريگادا جەتەكشىلەرىمەن بىرگە, وبلىسقا بەلگىلى ازاماتتار پارتيانىڭ ماقسات-مۇددەلەرىن, پرەزيدەنتتىكتەن ءۇمىتكەردىڭ سايلاۋالدى باعدارلاماسىن تۇسىندىرسە, تانىمال ونەرپازدار ەل ءىشىن ءان مەن جىرعا بولەپ ءجۇر.
باقبەرگەن امالبەك, اقمولا وبلىسى.