قازاقستان رەسپۋبليكاسى پرەزيدەنتتىگىنە كانديدات نۇرسۇلتان نازارباەۆتىڭ رەسپۋبيكالىق قوعامدىق شتابىنىڭ سايلاۋالدى ۇگىت-ناسيحات جۇمىستارى اقتوبە وبلىسىندا جالعاستى. كەشە «نۇر وتان» حدپ وبلىستىق فيليالىندا كانديداتتىڭ رەسپۋبليكالىق شتابىنىڭ مۇشەلەرى, «نۇر وتان» حدپ باستاماسىمەن قۇرىلعان, قۇرامىنا ساياسي پارتيالار جەتەكشىلەرى, قوعام قايراتكەرلەرى, سونداي-اق ۇكىمەتتىك ەمەس ۇيىمدار مۇشەلەرى كىرەتىن «قازاقستان-2020» جالپىۇلتتىق دەموكراتيالىق كۇشتەر كواليتسياسىنىڭ وكىلدەرى وبلىس اكتيۆىمەن, جوعارى وقۋ ورىندارى ۇستازدارىمەن, كاسىپورىندار مەن مەكەمەلەر قىزمەتكەرلەرىمەن, ۇكىمەتتىك ەمەس ۇيىمدار وكىلدەرىمەن كەزدەستى. كەزدەسۋدە ءسوز العان «نۇر وتان» حدپ توراعاسىنىڭ ءبىرىنشى ورىنباسارى نۇرلان نىعماتۋلين ەلىمىز تاۋەلسىزدىك العاننان بەرگى جيىرما جىل ىشىندەگى ساياسي تۇراقتىلىق پەن ەكونوميكالىق دامۋدى ن.نازارباەۆتىڭ ەسىمىمەن بايلانىستىرا اڭگىمەلەدى. نۇرسۇلتان ءابىش ۇلىنىڭ دەموكراتيالىق مەملەكەت قۇرۋداعى, ەلىمىزدەگى ەكونوميكالىق قايتا قۇرۋلارداعى ەرەن ەڭبەگىنىڭ ناتيجەسىندە قازاقستاندى الەم مويىنداعانىنا دايەكتى دالەلدەر كەلتىردى.
– بيىل ەلىمىزدىڭ تاۋەلسىزدىگىنە جيىرما جىل تولعالى وتىر. وسى ۋاقىت ىشىندە ءبىزدىڭ ەلىمىز بۇكىل الەم تانىعان مەملەكەت بولىپ قالىپتاستى, تاتۋلىق پەن بىرلىكتىڭ, ىنتىماقتاستىقتىڭ جارقىن ۇلگىسىنە اينالدى. الدا تۇرعان اسقارالى مىندەتتەر مەن جوبا-جوسپارلاردى تەك نۇرسۇلتان ابىش ۇلىمەن بىرگە جۇزەگە اسىرا الاتىنىمىز ايدان-انىق. سوندىقتان, الداعى بولاتىن ەل پرەزيدەنتتىگىنە سايلاۋدا حالىقتىڭ تاڭداۋى نۇرسۇلتان نازارباەۆ بولاتىنىنا كامىل سەنىمدىمىز. الدا تۇرعان مىندەتتەردى جۇزەگە اسىرۋدا كوشباسشىلار قاتارىندا كەلە جاتقان وبلىس حالقى الداعى سايلاۋعا بەلسەنە قاتىسىپ, نۇرسۇلتان ءابىش ۇلىنىڭ كانديداتۋراسىن ءبىراۋىزدان قولداپ داۋىس بەرەدى دەپ ويلايمىن.سىزدەردى تۋرا وسىنداي تاڭداۋ جاساۋعا شاقىرامىن, – دەدى ول.
كەزدەسۋدە نۇرسۇلتان ءابىش ۇلىن قولداۋعا ۇندەپ «ادىلەت» دەموكراتيالىق پارتياسىنىڭ توراعاسى ماقسۇت ءنارىكباەۆ, «اۋىل» سوتسيال-دەموكراتيالىق پارتياسىنىڭ توراعاسى عاني قاليەۆ ءسوز سويلەدى. پارلامەنت سەناتىنىڭ دەپۋتاتى قۋانىش سۇلتانوۆ تاۋەلسىزدىكتىڭ ەلەڭ-الاڭىنداعى قيىندىقتاردى جەڭە وتىرىپ, ن.نازارباەۆتىڭ ەلىمىزدى الەمدىك قارجى داعدارىسىنان دا ادەمى الىپ شىققانىن جەتكىزدى. ول اقتوبەلىكتەردى ن.نازارباەۆتىڭ كانديداتۋراسىن قولداپ داۋىس بەرۋگە شاقىردى. اتاقتى سپورتشى, بوكستان وليمپيادا چەمپيونى ەرماحان ىبىرايىموۆ پەن «قازاقستان ستۋدەنتتەرى اليانسى» قوعامدىق بىرلەستىگىنىڭ مۇشەسى ەربول شىما دا ەلىمىزدە جاستار ءۇشىن جاسالىپ جاتقان يگى ىستەردەن حاباردار ەتتى. سوندىقتان جاستاردىڭ سايلاۋدا نۇرسۇلتان ءابىش ۇلىن قولدايتىنىنا سەنىمدىلىك تانىتتى.
سول كۇنى نۇرلان نىعماتۋلين باستاعان كواليتسيا مۇشەلەرى ءۇش توپقا ءبولىنىپ, حالىقپەن ءۇش جەردە كەزدەسۋ وتكىزدى. نۇرلان نىعماتۋلين باستاعان توپ «اقتوبەرەنتگەن» اكتسيونەرلىك قوعامىنىڭ ۇجىمىمەن جۇزدەستى. كواليتسيا مۇشەلەرىن كاسىپورىن ۇجىمى رياسىز كوڭىلمەن قارسى الدى. «ءبىز ەلباسىعا داۋىس بەرەمىز», «ءبىزدىڭ تاڭداۋىمىز – نۇرسۇلتان نازارباەۆ» دەگەن ۇندەۋلەر ۇستاعان جۇمىسشىلاردىڭ ن.نازارباەۆتى قولدايتىندىقتارى انىق اڭعارىلىپ تۇردى.
كاسىپوداقتار فەدەراتسياسىنىڭ ءتوراعاسى سيازبەك مۇقاشەۆ, «اتامەكەن» وداعىنىڭ توراعاسى ازات پەرۋاشەۆ, «قازترانسگازايماق» اق باس ديرەكتورى قايرات شارىپباەۆتىڭ سوزدەرى دە ەلىمىزدىڭ قول جەتكەن تابىستارى ءتوڭىرەگىندە توعىستى. كاسىپورىن جۇمىسشىلارى اتىنان ءسوز العان اقجارقىن وماروۆا وزدەرى ءۇشىن نۇرسۇلتان نازارباەۆتان باسقا تاڭداۋ بولمايتىنىن ايتتى. فرەزەرشى ورازباي سايماعامبەتوۆ الداعى پرەزيدەنتتىك سايلاۋدا نۇرسۇلتان نازارباەۆتىڭ كانديداتۋراسىن قولدايتىندىقتارىن ءبىلدىردى.
«نۇر وتان» حدپ توراعاسىنىڭ ءبىرىنشى ورىنباسارى نۇرلان نىعماتۋلين وسى سالتاناتتى ءساتتى پايدالانىپ, ورازباي سايماعامبەتوۆتى تۋعان كۇنىمەن قۇتتىقتاپ, گۇل شوعىن جانە باعالى سىيلىق تاپسىردى. ول ۇجىمنىڭ تەڭ جارتىسى بولىپ تابىلاتىن قىز-كەلىنشەكتەردى وتكەن مەرەكەلەرىمەن قۇتتىقتۋدى دا ۇمىتپادى.
قالعان ەكى توپتىڭ بىرەۋى العا اۋدانى تۇرعىندارىمەن, ەكىنشىسى, قالاداعى «دوستىق» ۇيىندە ەتنومادەني بىرلەستىكتەر, شىعارماشىلىق ينتەلليگەنتسيا وكىلدەرى جانە مادەنيەت سالاسى قىزمەتكەرلەرىمەن كەزدەستى.
ساتىبالدى ءساۋىرباي, اقتوبە.