ەكونوميكالىق قىلمىسقا ءجانە سىبايلاس جەمقورلىققا قارسى كۇرەس اگەنتتىگى قىزمەتكەرلەرى پەتروپاۆل قالالىق سوتىنىڭ سۋدياسى گ. جولداسوۆانى جۇمىس كابينەتىندە پارا الىپ جاتقان جەرىنەن قولعا تۇسىرگەن بولاتىن. ول زاڭسىز كاسىپكەرلىكپەن اينالىسىپ كەلگەن ن. گنوەۆىحتىڭ قىلمىستىق ارەكەتتەرىن بۇركەمەلەۋ ءۇشىن 5000 اقش دوللارىن تالاپ ەتكەن. ءبىر قىزىعى, سوت پروتسەسىن باسقا سۋديانىڭ ءجۇرگىزگەنىنە قاراماستان, بۇگىندە قىزمەتىنەن بوساتىلىپ, قىلمىستىق كودەكستىڭ 177-ءشى بابىمەن ايىپتالىپ وتىرعان كۇدىكتىنىڭ ءىس-ارەكەتىن سىبايلاس جەمقورلىقپەن بايلانىستىرۋشىلار دا جوق ەمەس. بىزگە جەتكەن اقپاراتتارعا قاراعاندا, كەيبىرەۋلەر ونى «دەلدال» رەتىندە پايدالانعانعا ۇقسايدى. قالاي دەسەك تە, ونىڭ بۇل ارەكەتى سۋديا دەگەن اتقا كىر كەلتىرگەنى انىق. ن.گنوەۆىح جالعان قۇجاتتار جاساۋ ارقىلى نەشە ءتۇرلى قيتۇرقىلىقتارعا بارعان. زاڭسىز نەسيە العان, اتى بار دا زاتى جوق كاسىپورىن قۇرعان. پەتروپاۆل قالالىق سوتى ونى ايىپتى دەپ تاۋىپ, ءبىر جىلعا باس بوستاندىعىنان ايىردى. گ.جولداسوۆانىڭ اشكوزدىگىن اشكەرەلەۋگە كاسىپكەردىڭ قارجى پوليتسياسىنا جازعان شاعىمى نەگىز بولعان.
وبلىستىق پروكۋراتۋرانىڭ جەكە كاسىپكەردىڭ جازاسىن جەڭىلدەتۋ جونىندە نارازىلىق كەلتىرۋىن قىلمىستاردى ىزگىلەندىرۋ شارالارىمەن دە تۇسىندىرۋگە بولار ەدى. الايدا, وبلىستىق سوتتىڭ باسپاسوز قىزمەتى ىلە-شالا رەسمي ءمالىمدەمە جاساپ, پروكۋراتۋرا تاراتقان اقپاراتتى جوققا شىعاردى. ءمالىمدەمەدە كاسىپكەر جاساعان قىلمىستىڭ قوعامعا قاۋىپتىلىگى, بيۋدجەتكە كەلتىرگەن 14.665.131 تەڭگە اۋقىمدى شىعىندى وتەمەگەنى ەسكەرىلىپ, لايىقتى جازا قولدانىلعانى, گ.جولداسوۆاعا قاتىستى قىلمىستىق ىسپەن بايلانىستىرۋدىڭ نەگىزسىزدىگى ايتىلعان. ءبىز وسى ءماسەلەگە بايلانىستى پروكۋراتۋرانىڭ باسپاسوز قىزمەتىمەن حابارلاسقان ەدىك. ونداعىلار سايتتا جاريالانعان اقپاراتتا جۇرتشىلىققا ءمالىم فاكتىلەردىڭ كەلتىرىلگەنىن, گنوەۆىحتىڭ ورتا دارەجەدە قىلمىس جاساۋىنا بايلانىستى شارتتى جازا سۇرالعانىن, وعان پروكۋراتۋرانىڭ قۇقىلى ەكەنىن, ونىڭ سوتتالۋىنىڭ بۇرىنعى سۋديانىڭ قىلمىسىنا بايلانىسى جونىندە ەش اڭگىمە قوزعالماعانىن جەتكىزدى.
اپەللياتسيالىق سوت پروكۋراتۋرانىڭ نارازىلىعىن قاناعاتتاندىرماي تاستادى. پروكۋراتۋرا نارازىلىقتى قاداعالاۋ تارتىبىمەن ءجۇزەگە اسىرۋ ءۇشىن باس پروكۋرورعا ۇسىنىم جولدادى.
ءومىر ەسقالي, سولتۇستىك قازاقستان وبلىسى.