...كەدەنشىلەر ءيميدجى تۋرالى كەڭەستى
كەدەنشىلەر ءيميدجىن قالىپتاستىرۋ وڭاي ەمەس. اسىرەسە, كەدەن وداعى قۇرىلعالى بەرى تىپتەن كەدەنشىلەر جاۋاپكەرشىلىگى جەڭىلدەگەن جوق. ولاردىڭ جۇمىسىن بۇقارالىق اقپارات قۇرالدارىندا قالاي ناسيحاتتاعان ءجون؟ مىنە, وسى ماسەلەلەر جونىندە ەل كەدەنشىلەرى كەشە اتىراۋدا باس قوسىپ, رەسپۋبليكالىق سەميناردا ءوزارا پىكىر الماستى. سەميناردا ءسوز العان كەدەندىك باقىلاۋ كوميتەتىنىڭ رەسمي وكىلى ەرجان بايتانا كەدەن ورگاندارىندا قۇرىلىمدىق وزگەرىستەر بولاتىنى جوسپارلانعانىن ءمالىم ەتتى.
سەميناردا كەدەنشى ءيميدجى تۋرالى پىكىر بىلدىرۋشىلەر از بولمادى. «حابار» اگەنتتىگى «بەتپە-بەت» باعدارلاماسىنىڭ جۇرگىزۋشىسى ب.ءۋاليدىڭ پىكىرىنشە, كەز كەلگەن مەكەمە جۇرتشىلىق اراسىندا جاقسى پىكىر قالىپتاستىرۋ ءۇشىن باق-پەن تىعىز بايلانىس ورناعانى ءجون. ال 7-ارناداعى «نىسانا» باعدارلاماسىن جۇرگىزۋشى م.نيكولاەۆ الدىمەن مەملەكەتتىك تىلدە, قاجەتىنشە ءۇش تىلدە اقپارات ۇسىنىلعانىن قالايدى. بۇرىنعىداي تەك رەسمي تىلدە ۇسىنىلعان اقپاراتتى قازاقشاعا جۋرناليستەردىڭ وزدەرى اۋدارىپ الادى دەلىنەتىن ءۇستىرت ويدان ارىلۋ قاجەتتىگىن دە ورتاعا تاستادى.
جولداسبەك شوپەعۇل, اتىراۋ وبلىسى.
...ءداستۇر تۋرالى لەكتسيا باستالدى
ى.ءالتىنساريننىڭ قوستاناي قالاسىنداعى مەموريالدىق مۋزەيى قىزمەتكەرلەرى ورىس مەكتەپتەرىندە ناۋرىزدى, حالقىمىزدىڭ سالت-داستۇرلەرىن تانىستىراتىن لەكتسيالار وقۋدى باستادى. مۇراجاي قىزمەتكەرلەرى وزدەرى جاساعان «اڭىزبەن جەتكەن ءاز ناۋرىز» اتتى بەينەلەكتسيادا ناۋرىز مەرەكەسى, كەلىن ءتۇسىرۋ, قىز ۇزاتۋ, سۇندەت, مۇشەلتوي سياقتى حالىقتىڭ تۇمىستاعى ءداستۇرى مەن ءتۇرلى سالتتارى تۋرالى ايتىلادى.
مۇنداي لەكتسيانى مادەني وشاق ۇجىمى بيىل ءبىرىنشى رەت باستاپ وتىر. ولار جاس ۇرپاقتى قازاق حالقىنىڭ داستۇرىمەن جاقىنىراق تانىستىرۋدى ماقسات ەتىپ قويدى. سونىمەن قاتار, مەكتەپتەردە «اۋىزشا جۋرنال» لەكتسياسى دا وتەدى. لەكتسيا بارىسىندا وقۋشىلارعا حالقىمىزدىڭ تۇرمىس-سالتىنا بايلانىستى وتكەن عاسىرلاردان جەتكەن جادىگەرلەر دە كورسەتىلەدى.
ءنازيرا جارىمبەتوۆا, قوستاناي.
...زاعيپتار ءۇشىن مادەني كەش ءوتتى
قازاقستاندا كوزى كورمەيتىن جانە ءالسىز كورەتىن جاندار تاعدىر تالكەگىن جەكە ءوزى كوتەرمەيدى. اسقار تاۋداي وتانى, قاسىندا جۇرگەن ازاماتتاردىڭ قيىن تاعدىرىنا قاناتىمەن سۋ سەپكەن قارلىعاشتاي كومەكتەسۋگە دايار تۇراتىن جانى ىزگى ادامدار كوپ. زاعيپ كىسىلەردىڭ ەڭ ۇلكەن جۇبانىشى – كىتاپ. شىمكەنتتە وسىنداي ازاماتتارعا ارنالعان وبلىستىق مامانداندىرىلعان كىتاپحانا بار. كەشە ەلىمىز ءتاۋەلسىزدىگىنىڭ 20 جىلدىعىنا ارنالىپ وسى كىتاپحانادا “ەسەلەنسىن ەڭبەگىڭ ەلىڭ ءۇشىن” اتتى مادەني كەش ءوتتى.
جيىندا بۇرىنعى تەمىرجولشى اسىلبەك بەكتۇرسىنوۆ, ارداگەر ۇستازدار مادەت تۇياقباەۆا مەن حاليما كۇلەتوۆا كوپشىلىككە ءوز ومىرلەرىندەگى ەلەۋلى وقيعالاردى اڭگىمەلەپ بەردى. ەل تاۋەلسىزدىگىنە بايلانىستى پايىمداۋلارىن ورتاعا سالىپ, جارقىن ءومىر تۋرالى ويلارىمەن ءبولىستى.
باقتيار تايجان, شىمكەنت.