قازاقستان ايەلدەرىن كوكتەمنىڭ العاشقى مەرەكەسىمەن پاريجدەن كەلگەن بالەت جۇلدىزدارى قۇتتىقتادى
كەشە استاناداعى بەيبىتشىلىك جانە كەلىسىم سارايىندا ەلوردا تورىندە العاش رەت وتكىزىلگەن ايەلدەر سەزىنىڭ قۇرمەتىنە وراي ادولف اداننىڭ «جيزەل» بالەتى قويىلدى. بۇل قويىلىمدى تاماشالاۋعا ەلباسى نۇرسۇلتان نازارباەۆ تا كەلدى. تۋىندىنى مادەنيەت مينيسترلىگىنىڭ مۇرىندىق بولۋىمەن «قازاق اۋەندەرى» اق ارقىلى ك.بايسەيىتوۆا اتىنداعى ۇلتتىق وپەرا جانە بالەت تەاترى قويعان.
بۇل كۇنى پيراميدا عيماراتى ءىشى ەرەكشە قۇلپىرىپ كەتتى. سەبەبى «جيزەلدى» تاماشالاۋعا كەلگەن كورەرمەندەردىڭ كوبىسى قىز-كەلىنشەكتەر ەدى. بالەت ونەرىنىڭ الەمدىك جاۋھارى بولىپ تابىلاتىن بۇل تۋىندىنىڭ استاناداعى باس قويۋشىسى – سانكت-پەتەربۋرگتەگى مارينسكي تەاترىنىڭ بالەتمەيستەرى سەرگەي ۆيحارەۆ. سۋرەتشى-قويۋشىنىڭ جاۋاپكەرشىلىگى رەسەيدىڭ ەڭبەك سىڭىرگەن سۋرەتشىسى ۆياچەسلاۆ وكۋنەۆكە جۇكتەلىپتى. باستى پارتيالاردا پاريجدەگى گراند وپەرانىڭ جەتەكشى سوليستەرى مەلاني يۋرەل مەن كارل پاكەتت وينادى. «جيزەل» قويىلىمىنا سونداي-اق ك.بايسەيىتوۆا اتىنداعى ۇلتتىق وپەرا جانە بالەت تەاترىنىڭ بالەت ترۋپپاسى مەن سيمفونيالىق وركەسترى قاتىستى. اتاپ ايتساق ديريجەرلىكتى, ايدار ابجاحانوۆ, ال ديريجەر-قويۋشى قىزمەتىن قازاقستان رەسپۋبليكاسىنىڭ ەڭبەك سىڭىرگەن قايراتكەرى ابزال مۇحيتدينوۆ اتقاردى.
ءپاريجدىڭ گراند وپەراسىندا 1992 جىلدان بەرى جۇمىس ىستەپ كەلە جاتقان 36 جاستاعى م.يۋرەل «سيلفيدا», «بايادەركا», «ۇيقىداعى ارۋ», «ششەلكۋنچيك» جانە تاعى دا باسقا كلاسسيكالىق سپەكتاكلدەردە ويناعان. ال 37 جاستاعى ك.پاكەتت گراند وپەرا بي اكادەمياسىنا 11 جاسىندا وقۋعا ءتۇسىپ, 17 جاسىندا اتالمىش بالەت ترۋپپاسىنا قابىلدانعان. ونىڭ رەپەرتۋارىندا «كورسار», «ششەلكۋنچيك», «جازعى تۇندەگى ءتۇس», «پاريج قۇداي انا شىركەۋى» سياقتى كلاسسيكالىق وپەرالاردىڭ باستى پارتيالارى بار. ميلانداعى لا سكالا, ماسكەۋدەگى ۇلكەن تەاتر, نيۋ-يوركتەگى سيتي بالەت سىندى الەمنىڭ ايگىلى تەاترلارىنداعى بالەت ونەرىنىڭ كلاسسيكالىق قويىلىمدارىنا كوپتەگەن جىلدار بويى ەڭبەك سىڭىرگەن بۇل ەكى ونەر جۇلدىزى ەندى ەلوردا كورەرمەندەرىن ءوز شەبەرلىكتەرىمەن ءتانتى ەتتى.
ەسكە سالايىق, «جيزەل» بالەتىنىڭ العاشقى قويىلىمى 1841 جىلى 28 ماۋسىمدا گراند وپەرانىڭ ساحناسىندا وتكەن ەكەن. ءبىر جارىم عاسىردان بەرى بۇل تۋىندى ەش ۋاقىتتا ءوز قۇنى مەن دارالىعىن, كوركەمدىگى مەن تارتىمدىلىعىن جوعالتپاعان. جوعالتپايدى دا. اسىل دۇنيەنىڭ, بەكزات ونەردىڭ قاشان دا سىيلاناتىنى, قۇرمەتتەلىنەتىنى ءسوزسىز. ەڭ باستىسى, ادامزاتتىڭ ءبارى ونى مويىندايتىنىمەن ماڭگى جالعاسا بەرمەك.
اراي ۇيرەنىشبەكقىزى.