ەلورداداعى «وركەن» بيزنەس-ورتالىعىندا قۇرامىنا ەتنومادەني ءبىرلەستىكتەر مەن ۇيىمداردىڭ, عىلىمي جانە شىعارماشىل ينتەلليگەنتسيانىڭ, سونداي-اق جاستار وكىلدەرى كىرگەن باستاماشى توپتىڭ جيىنى ءوتتى. «ءبىز – قازاقستان حالقىمىز» دەگەن اتپەن ۇيىمداستىرىلعان كەزدەسۋ قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىندا ن.نازارباەۆتىڭ كانديداتۋراسىن قولداۋ ءۇشىن جالپىرەسپۋبليكالىق اكتسيانى ءوتكىزۋگە ارنالدى.
«قازاقستان ۋكرايندارى راداسى» بىرلەستىگىنىڭ توراعاسى يۋري تيموشەنكو ءوزىنىڭ سوزىندە اتالعان اكتسيانى وتكىزۋ جونىندەگى ۇندەۋىن وقىپ بەردى. «مەملەكەت باسشىسى قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىن ءوتكىزۋ تۋرالى باستامانى ۇسىنۋ ارقىلى پرەزيدەنتتىك وكىلەتتىگىن 2 جىل مەرزىمگە سانالى تۇردە قىسقارتتى, ال بۇل ونىڭ ساياسي شەشىمدەرىنىڭ قايتالانباستىعى مەن جوعارى دەڭگەيىن كورسەتىپ بەردى»,– دەدى يۋ.تيموشەنكو.– رەسپۋبليكالىق جانە ءوڭىرلىك ەتنومادەني بىرلەستىكتەر وكىلدەرى, عىلىم مەن ونەر سالاسىندا ءجۇرگەن ازاماتتار, جاستار سايلاۋدىڭ قازاقستاننىڭ بولاشاعى ءۇشىن ماڭىزىن جانە سول ساياسي ناۋقان الدىنداعى وزدەرىنىڭ جاۋاپكەرشىلىكتەرىن تۇسىنە وتىرىپ, نۇرسۇلتان نازارباەۆتىڭ كانديداتۋراسىن قولدايدى دەپ ويلايمىز. «ءبىز – قازاقستان حالقىمىز» ۇعىمى تاۋەلسىز قازاقستاننىڭ نەگىزىن قالاعان جانە ەكونوميكالىق ءورلەۋ مەن الەۋمەتتىك ىلگەرىلەۋگە نەگىزدەلگەن دەربەس, دەموكراتيالىق مەملەكەت قۇرۋ ماقساتىنداعى حالىقتىڭ كۇش-جىگەرىن بىلدىرەدى. سونداي-اق, ول عاسىرلىق ارمان, ورتاق قۇندىلىق – تاۋەلسىزدىككە قول جەتكىزۋدە قارعا تامىرلى قازاق جەرىندە قونىستانعان حالىقتىڭ بىرلىگىن بەينەلەيدى».
باسقوسۋ كەزىندە «ۆايناح» چەشەن-ينگۋش ەتنومادەني بىرلەستىگىنىڭ توراعاسى سالمان گەروەۆكە ءسوز كەزەگى ءتيدى. ول اتالعان اكتسيانىڭ «قازاقستان رەسپۋبليكاسىنداعى سايلاۋ تۋرالى» زاڭنىڭ نەگىزىندە ءجۇرگىزىلىپ جاتقانىن, بۇل رەتتە سايلاۋ قورلارىن قۇرماعان ازاماتتار مەن قوعامدىق بىرلەستىكتەر قارجىلاي قولداۋدى قاجەت ەتپەيتىن سايلاۋالدى ۇگىت-ناسيحات جۇمىستارىن ءجۇرگىزۋگە قۇقىلى ەكەندىكتەرىن اتاپ ءوتتى. «بۇل اكتسيانىڭ نەگىزگى وزەگى – قازاقستان حالقىنىڭ بەيبىتشىلىككە نەگىزدەلگەن دوستىق كەرۋەنى دەگەن ۇعىمعا سايادى. بۇل «كەرۋەن» ەلىمىزدىڭ بارلىق وبلىستارىنان وتەدى. اكتسيا اياسىندا سايلاۋالدى جيىندار مەن كەزدەسۋلەر, قوعامدىق پىكىرتالاستار مەن پىكىرسايىستار ۇيىمداستىرىلادى»,– دەدى س. گەروەۆ.
باسقوسۋ سوڭىندا وعان قاتىسۋشىلار جينالعان قاۋىمدى ەل ىشىندەگى ساياسي ناۋقاننىڭ بارلىق زاڭ نورمالارى مەن حالىقارالىق سايلاۋ ستاندارتتارىنا ساي ءوتۋىنە كۇش سالۋعا شاقىردى.
ءلايلا ەدىلقىزى.