اتىراۋ وبلىسىنداعى ازعىر پوليگونىنىڭ 750 مىڭ گەكتار جەرى جەرگىلىكتى شارۋالارعا بەرىلەدى, دەپ حابارلايدى قازاقپارات.
ازعىر يادرولىق پوليگونىن اسكەريلەر «گاليت» دەپ تە اتايدى. ول كسرو قورعانىس مينيسترلىگى مەن اتوم ونەركاسىبى مينيسترلىگى جانە بۇكىلوداقتىق ەكسپەريمەنتتىك فيزيكا عىلىمي-زەرتتەۋلەر ينستيتۋتى ماماندارىنىڭ باسقارۋىمەن يادرولىق جارىلىستار سىنالعان قۇپيا سىناق ايماعى. پوليگوننىڭ جالپى اۋدانى — 600 مىڭ گەكتار. وندا 1966 جىلدىڭ ءساۋىر ايىنان 1977 جىلدىڭ قازانىنا دەيىن 17 جەراستى يادرولىق جارىلىسى سىنالعان.
ازعىر ايماعىنىڭ قازىرگى جاعدايى تۋرالى قر پارلامەنت سەناتىنىڭ دەپۋتاتى, جەردى قايتارۋ راسىمىنە قازاقستاندىق جانە رەسەيلىك اسكەريلەر توبىنىڭ قۇرامىندا قاتىسىپ جاتقان سارسەنباي قۇرمانوۆ ايتتى:
«قازىرگى ۋاقىتتا بۇل اۋماق زەرتتەلىپ جاتىر. توپىراقتىڭ, اۋانىڭ جانە سۋدىڭ سىنامالارى الىندى. پوليگون 20 جىلدان بەرى قولدانىلماعان, بىراق قانداي دا ءبىر بولىكتەرىنىڭ قاۋىپسىز ەكەنىنە ناقتى كوز جەتكىزۋ قاجەت. بيىل راسىمدەر اياقتالعان سوڭ, القاپتار جەرگىلىكتى فەرمەرلەرگە جالعا بەرىلەدى. ولار ءوز شارۋاشىلىقتارىن دوڭگەلەتىپ, جەڭىلدىكپەن نەسيە الاتىن بولادى. مۇنداي ۇلكەن اۋماقتا مۇنايشىلار دا بارلاۋ جۇمىستارىن جۇرگىزە الادى», — دەدى.