كوكشەنىڭ كوركەم كەستەسى

ەلورداداعى اقمولا وبلىسىنىڭ كۇندەرى اياسىندا استانا تۇرعىندارى مەن قوناقتارى وبلىستىڭ بىرقاتار مادەني جانە سپورتتىق ءىس-شارالارىنا كۋا بولدى. بەيبىتشىلىك جانە كەلىسىم سارايىندا اقىن, دراماتۋرگ, قازاقستان جازۋشىلار وداعىنىڭ مۇشەسى قۇدايبەرلى مىرزا­بەك­تىڭ «اقبوز-ولەڭ تارتۋ ەتتىم حال­قى­ما» اتتى شىعارماشىلىق كەشى ءوتتى. كەشتى اقمولا وبلىسى اكىمىنىڭ ورىن­باسارى نۇرلان نۇكەنوۆ اشىپ, اقىن شىعارماشىلىعى تۋرالى ويلارىمەن ءبولىستى. ودان سوڭ قايراتكەر ازامات, ەل اعاسى امانگەلدى سادىربەكوۆ اقىن ىنىسىنە اقجارما تىلەگىن ارنادى. «اششىلى-جەكەبوياق», «ايراۋىق», «سۇر كوجەك», ت.ب بىرنەشە كىتاپتىڭ اۆتورى, سوڭعى كەزدە «ناۋان حازىرەت», حالقىمىزدىڭ ءبىرتۋار پەرزەنتى, كەڭەس وداعىنىڭ باتىرى م.عابدۋللين تۋرالى سپەكتاكلدەرى كوكشەتاۋ تەاترىندا قويىلىپ جۇرگەن دراماتۋرگتىڭ كەشىنە وقىرماندارى مولىنان جينالدى. قوس قاناتتى اقىن دەگەندى ادەتتە جازبا پوەزيا مەن ايتىس ونەرىن تەڭ مەڭگەرگەن ونەر يەسىنە قاراتا ايتادى. بۇل ورايدا كەشكە قاتىسقان بەلگىلى عالىم تۇرسىن جۇرتباي, حالىق اقىنى قونىسباي ءابىل, جىرشى, اقىن, ماناسشى بايانعالي ءالىمجانوۆ, ەگەمەندىك ارىپتەسىمىز, اقىن قورعانبەك امانجول ونىڭ جازبا پوەزيا مەن ايتىس ونەرىندەگى ولجاسىن, سۋىرىپ- سالمالىق قاسيەتىن, دراماتۋرگياداعى ءساتتى قادامدارىن اڭگىمە وزەگىنە اينالدىردى. كەشتە ونەر يەسى ءوز ولەڭدەرىن وقىدى. اقىننىڭ ەڭ ءبىر نازىك تە سىرشىل ولەڭدەرى ستۋدەنتتەر مەن ونەرپازدار تاراپىنان دا وقىلدى. جوعارىدا ايتىلعان ەكى سپەكتاكلدەن ۇزىندىلەر كورسەتىلدى. ءبىراز جىلدان بەرى كوكشەتاۋداعى مالىك عابدۋللين اتىنداعى مۋزەيدىڭ ديرەكتورى قىزمەتىن اتقارىپ جۇرگەن اقىننىڭ سازگەرلىك قىرى دا كوپشىلىككە تانىس. كەش بارىسىندا اقىننىڭ تۋعان جەر, ماحاببات تاقىرىبىنداعى اندەرى ورىندالدى. ال ۇلتتىق اكادەميالىق كىتاپحا­نا­نىڭ كونفەرەنتس-زالىندا «تاۋەلسىز ەلدىڭ ازات ويلى اقىندارى» اتتى كوكشەتاۋلىق جاس اقىنداردىڭ قاتىسۋىمەن ادەبي-سازدى توك-شوۋ ۇيىمداستىرىلدى. كەستەلى جىرلارىمەن ادەبيەت الەمىنە ءبىرشاما تانىلىپ ۇلگەرگەن كوكشەتاۋلىق جاس اقىندار – مەرگەن توقسانباي, ويۋلى قۋانىش (وسپانوۆ) جانە باقىتبەك بەكمۇرات ۇلى ءوز ولەڭدەرىن وقىپ, شىعارماشىلىقتارىنداعى جاڭالىقتارمەن ءبولىستى. ءبىر ايتا كەتەرلىگى, مەرگەن توقسانباي مەن ويۋلى قۋانىش 19-شى رەت وتكىزىلگەلى وتىرعان «شابىت» حالىقارالىق فەستيۆالىنە جولداما الىپ وتىر. ءىس-شارا بارىسىندا ماعجان جۇما­با­­ەۆ اتىنداعى اقمولا وبلىستىق امبە­باپ-عىلىمي كىتاپحاناسىنىڭ ۇيىم­داستىرۋىمەن ءوڭىردىڭ تاريحى, مادەنيەتى مەن جەتىستىكتەرىن باياندايتىن كىتاپ كورمەسى قويىلدى. اقمولا وبلىسى كۇندەرى اياسىندا وتكەن ماڭىزدى مادەني شارالاردىڭ ءبىرى – ەلوردا تەاترلارىندا سپەكتاكلدەردىڭ ساحنالانۋى. ق.قۋانىشباەۆ اتىنداعى قا­زاق-مۋزىكالىق دراما تەاترىندا م.شاحانوۆتىڭ «شىڭعىس حان» سپەك­تاكلى, ال م.گوركي اتىنداعى ورىس اكادەميالىق دراما تەاترىندا ت.احمەتوۆتىڭ «شاكارىم» سپەكتاكلى قويىلدى. ۇلتتىق سپورت تۇرلەرى بويىنشا سپورتتىق شارالار ۇيىمداستىرىلدى. توعىز­قۇمالاق, گىر كوتەرۋ, اسىق اتۋ, باس­قا دا كوپتەگەن ويىن تۇرلەرى «حان شاتىر» ساۋدا, ويىن-ساۋىق ورتا­لى­عىنىڭ الاڭىندا ءوتتى. الاڭنان وبلىس­تىڭ بۇركىت پەن لاشىن كوتەرگەن قۇس­بەگىلەرى مەن توبەت, تازىلارىن جەتەك­تەگەن اڭشىلارىن دا كەزدەستىردىك. سونداي-اق, سول كۇنى وبلىستىڭ ۇزدىك شىعار­ماشىلىق ۇجىمدارىنىڭ كونتسەرتتىك باعدارلامالارى دا كورەرمەندەرگە تارتۋ ەتىلدى. اقمولا وبلىسىنىڭ استاناداعى كۇندەرى «جەر جۇماعى – كوكشەتاۋ, ەل جۇرەگى – استانا» اتتى كوكشەتاۋلىق ونەر شەبەرلەرىنىڭ گالا-كونتسەرتىمەن اياقتالدى. ايگۇل سەيىلوۆا, «ەگەمەن قازاقستان» سۋرەتتەردى تۇسىرگەن ەرلان وماروۆ, «ەگەمەن قازاقستان»