اقتوبەگە كەلگەن پارلامەنت ءماجىلىسى ەكولوگيا ماسەلەلەرى جانە تابيعات پايدالانۋ كوميتەتىنىڭ توراعاسى گلەب ششەگەلسكي باستاعان ءبىر توپ دەپۋتاتتار «نۇر وتان» پارتياسى وبلىستىق فيليالىندا «جەر قويناۋى جانە جەر قويناۋىن پايدالانۋ تۋرالى» كودەكسىنىڭ جوباسىن تالقىلاۋ ماقساتىندا كوشپەلى وتىرىس وتكىزدى. وعان وبلىستىق ءماسليحاتتىڭ دەپۋتاتتارى, وبلىستىق ماماندىرىلعان تابيعات قورعاۋ پروكۋراتۋراسىنىڭ, جەرگىلىكتى قارجى جانە قۇقىق قورعاۋ ورگاندارىنىڭ, كومىرسۋتەكتى شيكىزاتتى جانە قاتتى پايدالى قازبالاردى ءوندىرۋ سالاسىنداعى كوپتەگەن جەر قويناۋىن پايدالانۋشى كومپانيالاردىڭ وكىلدەرى قاتىستى.
وتىرىستى جۇرگىزىپ وتىرعان پارلامەنت ءماجىلىسى ەكولوگيا ماسەلەلەرى جانە تابيعاتتى پايدالانۋ كوميتەتەتىنىڭ توراعاسى گلەب ششەگەلسكي دەپۋتاتتار توبىنىڭ تۇسكە دەيىن قالانىڭ ەكولوگياسىنا اسەر ەتەتىن ءىرى كاسىپورىن «قازحروم» اق قاراستى جاڭا فەرروقورىتپا زاۋىتىندا, كارىز – تازارتۋ ستانساسىندا, تۇرمىستىق قاتتى قالدىقتار پوليگونىندا بولعاندارىن, ولاردا قول جەتكەن تابىستارمەن بىرگە پروبلەمالار دا بار ەكەنىن اتاپ ءوتتى. كوشپەلى وتىرىس وتكىزۋ ءۇشىن اقتوبەنىڭ بەكەرگە تاڭدالماعانىن تىلگە تيەك ەتە كەلىپ, بۇل ءوڭىردىڭ مينەرالدى شيكىزاتقا, سونىڭ ىشىندە مۇناي مەن گازعا, قارا جانە ءتۇستى مەتالعا, حرومعا باي ەكەنىنە نازار اۋداردى.
وبلىس اكىمى بەردىبەك ساپارباەۆ كوشپەلى وتىرىسقا قاتىسۋشىلاردى قۇتتىقتاپ ءسوز ءسويلەپ, ءوڭىردىڭ ەكولوگيالىق قاۋىپسىزدىگىن ساقتاۋ بويىنشا جاسالىپ جاتقان جۇمىستارعا توقتالا كەتتى.
– ءبىزدىڭ ءوڭىر ءۇشىن ەكولوگيا ماسەلەسى وتە ماڭىزدى. جەر استى قازبا بايلىقتارىن يگەرۋدىڭ ەكولوگياعا اسەرى دە كوپ بولارى ءسوزسىز. بيىل ەكولوگيالىق باعدارلامالاردى ءجۇزەگە اسىرۋعا 1100 ميلليون تەڭگە ءبولىندى. قاتتى قالدىقتاردى سۇرىپتاۋ زاۋىتىن جانە جاڭا كارىزدىك تازارتۋ ستانساسىن سالۋدى قولعا الدىق. سونداي-اق, قاتتى قالدىقتار پوليگونىنىڭ ماڭىن كوگالداندىرۋ ماقساتىندا 103 مىڭ ءتۇپ كوشەت وتىرعىزىلدى. الاۋعا جاعىلاتىن گازدىڭ 93 پايىزى وڭدەلەدى, تاياۋداعى ءۇش جىلدا بۇل كورسەتكىشتى 95 پايىزعا جەتكىزۋ كوزدەلۋدە. بۇل باعىتتاعى جۇمىس جالعاسا بەرەدى, –دەدى ءوڭىر باسشىسى.
ينۆەستيتسيا جانە دامۋ ۆيتسە-ءمينيسترى تيمۋر توقتىباەۆ «جەر قويناۋى جانە جەر قويناۋىن پايدالانۋشىلار تۋرالى» كودەكس جوباسىنىڭ ەرەكشەلىكتەرى مەن ءتيىمدىلىگىنە ايرىقشا توقتالدى. ونىڭ ءسوزىنە قاراعاندا, زاڭ جوباسى جەر قويناۋىن پايدالانۋ جونىندەگى وپەراتسيالاردى جۇرگىزۋدە ينۆەستيتسيالار تارتۋ ءۇشىن قولايلى جاعدايلار جاسايدى.
كوشپەلى وتىرىستا ءسوز العان ەنەرگەتيكا ۆيتسە-ءمينيسترى اسەت ماعاۋوۆ كودەكس جوباسىنداعى جەر قويناۋىن يگەرۋگە ينۆەستيتسيا تارتۋ, ينۆەستورلارلارعا قارالعان سالىق ماسەلەسى تۋرالى تاراتىپ ايتىپ بەردى. بۇرىنعى بەس ءتۇرلى تولەمنەن گورى جالدىق ستاۆكا بەلگىلەنگەنى ءتيىمدى دەگەن وي ايتتى.
سودان كەيىن ولار پارلامەنت ءماجىلىسى دەپۋتاتتارىنىڭ جانە كوشپەلى وتىرىسقا قاتىسۋشىلاردىڭ سۇراقتارىنا جاۋاپ بەرىپ, كوشپەلى وتىرىسقا قاتىسۋشىلاردىڭ كودەكستى قابىلداۋ بارىسىندا نازار اۋدارۋ قاجەت دەگەن ۇسىنىستارىن قاپەرگە الدى.
ءوڭىردىڭ ەكولوگيالىق جاعدايى تۋرالى وبلىستىق ەكولوگيا دەپارتامەنتىنىڭ باسشىسى جاقسىعالي يمانقۇلوۆ حابارلاما جاسادى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى