ۇلتتىق كىتاپحانادا پارلامەنت ءماجىلىسىنىڭ كوشپەلى وتىرىسى ءوتتى. الەۋمەتتىك-مادەني دامۋ كوميتەتىنىڭ جۇمىس توبى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ» تۋرالى زاڭ جوباسى بويىنشا تىڭداۋ جاساپ, ماڭىزدى سۇراقتاردى تالقىلادى.
«مەملەكەت ءۇشىن مادەني دامۋعا تۇراقتى كوڭىل ءبولىپ وتىرۋ – مىندەت. بۇل باعىتتا اتقارۋشى ۇكىمەتتىڭ دە, زاڭ شىعارۋشى پارلامەنتتىڭ دە بىرىگىپ ىستەيتىن جۇمىستارى بارشىلىق. اسىرەسە, بىرقاتار زاڭداردىڭ قايتا قارالۋى مادەني سالاعا قاتىستى قۇجاتتاردىڭ تەز ارادا جەتىلدىرىلۋىن قاجەت ەتۋدە. جالپى جۇمىستىڭ جەمىستى بولۋى – زاڭدىق نەگىزدەگى تەتىكتەردىڭ ناقتى جۇمىس ىستەۋىنە بايلانىستى. مادەنيەتكە قاتىستى دا سولاي. ءبىزدىڭ دەپۋتاتتىق توپ مۇشەلەرى مادەني مەكەمەلەردىڭ ستاتۋسى, قىزمەتىنە قاتىستى كوپتەگەن جاڭا نورمالاردى ازىرلەۋگە قاتىسىپ وتىر. ۇسىنىستاردى تالقىعا سالۋ ءۇشىن سالا ماماندارىنىڭ ورتاسىنان كەلدىك», دەدى جيىندا ءسوز العان ءماجىلىس توراعاسىنىڭ ورىنباسارى گۇلميرا يسىمباەۆا.
زاڭ جوباسى بويىنشا تالقىعا تۇسكەن تاقىرىپتاردىڭ اراسىندا قىزۋ پىكىرتالاسقا ۇلاسقان ماسەلەلەردىڭ ءبىرى – وتاندىق كىتاپ ءوندىرىسىنىڭ جايى بولدى. وكىنىشكە قاراي, ءبىزدىڭ ەلىمىز كىتاپقۇمارلار ساناتىنان ەمەس. وقىرماننىڭ كىتاپ وقۋعا دەگەن ىنتاسىن ارتتىرۋعا قولبايلاۋ بولىپ وتىرعان كەم-كەتىكتەر جەتىپ ارتىلادى. كىتاپ تارالىمىنىڭ ازدىعى ءبىر مىسال بولسا, باسىلعان كىتاپتىڭ وقىرمان قولىنا جەتۋى ەكىنشى ماسەلە. مۇنىڭ سىرتىندا, جاڭا سيپاتتاعى ادەبي-كوركەم شىعارمالاردىڭ جازىلۋى مەن اۆتورلار ەڭبەگىنىڭ باعالانىلۋى تاعى سىن كوتەرمەيدى.
«مەن الگىندە بەينەسيۋجەتتەن ولجاس قاسىم اتتى جاس اقىننىڭ ءسوزىن تىڭدادىم. جاس ولجاس, جاڭا زاماننىڭ, تاۋەلسىز ادەبيەتتىڭ ولجاسى دەۋگە ابدەن بولادى! سول ولجاسقا قاراپ وتىرىپ ۇيالدىم... ءبىز جاڭا بۋىنعا ەشتەڭە قالدىرمادىق. ەندى ەشتەڭە بەرە الماي وتىرمىز. جاس ولجاستىڭ كىتابى 2000 دانامەن شىعىپتى. 5 باسپا تاباق ولەڭدەرى ءۇشىن 25 000 تەڭگە قالاماقى الىپتى. تۇتاس تيراجدان وزىنە 1 دانا عانا كىتاپ بەرىلىپتى. قالعانىن اقشاڭدى بەرەسىڭ دە, ساتىپ الاسىڭ. وسى لايىق پا؟ جاس ادەبيەتتىڭ وكىلى وسىنى كورۋى كەرەك پە؟ مەملەكەتتىڭ قامقورلىعىن سەزىنبەگەن ونەر – وگەي بالا سياقتى ءومىر سۇرەدى. مەن ءوزىم سونشاما اتاقتى اقىن بولسام دا, سوڭعى 25 جىلدا شىققان كىتاپتارىم ءۇشىن 1 تەڭگە قالاماقى الماپپىن. سول ارقىلى مەملەكەت مەنىڭ كاسىبي شىعارماشىلىعىمنىڭ لايىقتى باعاسىن بەرمەگەن سياقتى بولىپ شىعادى. يا, ماعان باسقا قىزمەتىم ءۇشىن اقشا تولەيدى جانە از ەمەس. بىراق, مەن اقىندىق ەڭبەگىمنىڭ جەمىسى – ولەڭ جيناقتارىم ءۇشىن لايىقتى قالاماقى العىم كەلەدى», دەدى تالقىلاۋ بارىسىنداعى سوزىندە قازاقستاننىڭ ەڭبەك ەرى, اقىن, قوعام قايراتكەرى ولجاس سۇلەيمەنوۆ.
ايتپاقشى, كوتەرىلىپ وتىرعان قالاماقى جايى تولىقتىرىلۋعا ۇسىنىلعان زاڭ جوباسىندا كەڭىنەن قاراستىرىلعان ەكەن. مادەنيەت مينيسترلىگى وكىلىنىڭ ايتۋىنشا, بۇدان بىلايعى كەزەڭدە وكىلەتتى ورگان الەۋمەتتىك ماڭىزدى ادەبيەت تۇرلەرىنە بەرىلەتىن مەملەكەتتىك تاپسىرىستىڭ شەڭبەرىندە, ساتىپ الىناتىن شىعارما ءۇشىن تولەم كولەمىن كوبەيتپەك. مىسالعا, بۇعان دەيىن اۆتورلارعا بولىنگەن قالاماقى مولشەرى ءونىمنىڭ ءار باسپا تاباعى ءۇشىن 25 000 تەڭگەدەن اسپاي كەلسە, ەندىگى جەردە ونىڭ ەڭ تومەنگى مولشەرى 150 000 تەڭگەنى قۇرايتىن بولادى.
قالماحانبەت مۇقامەتقالي,
«ەگەمەن قازاقستان»
الماتى