31 قازان – حالىقارالىق ۇنەمدەۋ كۇنى. 1988 جىلدىڭ 27 قازانىندا ميلان قالاسىندا الەمنىڭ 29 ەلىنىڭ جيناق كاسسالارىنىڭ وكىلدەرى وزدەرىنىڭ تۇڭعىش حالىقارالىق كونگرەسىن وتكىزدى. جيىن 3 كۇنگە سوزىلدى. كونگرەسس جۇمىسىنىڭ سوڭىندا 31 قازاندى «حالىقارالىق ۇنەمدەۋ كۇنى» (International Saving Day) رەتىندە جىل سايىن اتاپ ءوتۋ تۋرالى شەشىم قابىلداندى. وسىلايشا, 31 قازان «حالىقارالىق جيناقتاۋ كۇنى» دەپ بەلگىلەندى.
بىراق باستاماشىلار بۇل كۇندى اقشانى عانا ەمەس, ۋاقىتتى, كۇش-جىگەردى, زاتتاردى, سۋدى, ەنەرگيانى ۇنەمدەۋمەن, ولارعا ۇقىپتى قاراۋمەن دە بايلانىستىرعىسى كەلدى. ويتكەنى, ۇنەمدەۋدىڭ اۋقىمى كەڭ.
1989 جىلى بۇۇ 31 قازاندى حالىقارالىق ۇنەمدەۋ كۇنى رەتىندە رەسمي تۇردە بەكىتتى. سودان بەرى باستاپ بۇل كۇندى ۇيىمعا مۇشە ەلدەردىڭ بارلىعى اتاپ وتەدى.
ءبىزدىڭ ەلدە ۇنەمدەۋگە كوزقاراس قانداي؟ ۇنەمدەۋ شارالارى جۇرگىزىلە مە؟ 28 قازاندا ەلىمىزدىڭ ينۆەستيتسيالار جانە دامۋ مينيسترلىگى, وڭتۇستىك قازاقستان وبلىسىنىڭ اكىمدىگى مەن مەملەكەتتىك ەنەرگەتيكالىق ءتىزىلىم سۋبەكتىسى «شىمكەنتتسەمەنت» اق اراسىندا «ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ تۋرالى» قازاقستان رەسپۋبليكاسىنىڭ زاڭىنا سايكەس ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ سالاسىنداعى ءۇش جاقتى كەلىسىمگە قول قويىلدى. وعان سايكەس «شىمكەنتتسەمەنت» بەس جىلدىڭ iشiندە ءونىم بىرلىگىنە شاققانداعى ەنەرگيا تۇتىنۋ ۇلەسىن كەمiندە 15%-عا تومەندەتۋى ءتيىس. سونداي-اق, 2020 جىلعا دەيىنگى ستراتەگيالىق جوسپاردا ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ سالاسىنداعى ەنەرگيا سىيىمدىلىعىنىڭ ءىجو 25%-كە دەيىن تومەندەتۋ بويىنشا ناقتى ماقساتتار قويىلعان.
ءلايلا ەدىلقىزى, «ەگەمەن قازاقستان»