بۇدان بۇرىن حابارلاعانىمىزداي, كەشە قارجىلىق تەرگەپ-تەكسەرۋ جانە ۇرلانعان اكتيۆتەردى قايتارۋ جونىندەگى مامانداندىرىلعان سەميناردىڭ ەكىنشى كەزەڭىنىڭ اشىلۋى بولدى.
وندا ەلىمىزدىڭ باس پروكۋرورىنىڭ ورىنباسارى اندرەي كراۆچەنكو قارجىلىق تەرگەپ-تەكسەرۋ سالاسىنداعى وقىتۋ سەمينارىنىڭ, اسىرەسە, باس پروكۋراتۋرا ءجۇزەگە اسىرىپ وتىرعان «شەتەلدەن ۇرلانعان اكتيۆتەردى قايتارۋ» جوباسى اياسىندا ءوتىپ جاتقان بۇل سەميناردىڭ ماڭىزدىلىعىن جانە بىرەگەيلىگىن اتاپ كورسەتتى. بۇدان الىنعان ءبىلىم مەن داعدىلار بىردەن تاجىريبەدە قولدانىلاتىن بولادى, دەيدى ول.
راسىندا, اتالعان سەمينار قاداعالاۋ, تىيىم سالۋ جانە ۇرلانعان اكتيۆتەردى قايتارۋ مۇمكىندىكتەرىن ارتتىرۋ ءۇشىن باسقا ەلدەردىڭ قۇزىرەتتى ورگاندارىمەن ۆەدومستۆوارالىق جانە حالىقارالىق ىنتىماقتاستىقتى دامىتۋعا باعىتتالعان. كۋرستار بەس كۇن بويىنا جالعاسپاق. ءدارىس بەرۋ ءۇشىن يتاليا, اۆستريا, اقش جانە يزرايل ساراپشىلارى شاقىرىلعان, ال سولاردىڭ اراسىندا يزرايل باس پروكۋرورىنىڭ ورىنباسارى ياحۋد شاففەر دە بار.
بۇل باستاما اياسىندا تەرگەۋشىلەر مەن پروكۋرورلاردى وقىتۋدان باسقا, شەت ەلدەن ۇرلانعان اكتيۆتەردى قايتارۋ بويىنشا ءتيىمدى جۇمىس جۇرگىزۋ ءۇشىن قۇقىق قورعاۋ ورگاندارىنىڭ ادىستەمەلىك جانە نورماتيۆتىك بازاسىن قۇرۋعا باعىتتالعان جۇيەلى شارالار جاسالماق ەكەن. بۇعان قوسا, ونىڭ ەۋروپاداعى «CARIN» جانە ازياداعى «ARIN-AP» الەمدىك اقپارات الماسۋ جەلىلەرىنە قوسىلۋى جوسپارلانۋدا كورىنەدى. وسىعان وراي: «بۇكىلالەمدىك بانك پەن بۇۇ-نىڭ «ۇرلانعان اكتيۆتەردى قايتارۋ جونىندەگى باستاماسى – «StAR» جوباسىنا قوسىلۋعا سۇراۋ حات جولداندى», – دەدى باس پروكۋروردىڭ ورىنباسارى اندرەي كراۆچەنكو.
سەمينار اياسىندا, سونداي-اق, قازاقستان باس پروكۋرورىنىڭ ورىنباسارى اندرەي كراۆچەنكو مەن وسى باس پروكۋراتۋرا جانىنداعى قۇقىق قورعاۋ ورگاندارى اكادەمياسىنىڭ رەكتورى ۇلان بايجانوۆ اقش مەملەكەتتىك حاتشىسىنىڭ حالىقارالىق ەسىرتكىگە قارسى كۇرەس جانە قۇقىق قورعاۋ قىزمەتى جونىندەگى كومەكشىسى ۋيليام براۋنفيلدپەن جانە قازاقستانداعى اقش ەلشىسى دجوردج كرولمەن كەزدەسۋ وتكىزدى. سۇحبات بارىسىندا ەكىجاقتى قۇقىقتىق ىنتىماقتاستىق ماسەلەلەرىنىڭ كەڭ شوعىرى, اتاپ ايتقاندا, قارجىلىق قىلمىستارعا, تەرروريزم مەن ەكسترەميزمگە, قىلمىستىق جولمەن الىنعان اقشا قاراجاتىن جىلىستاتۋعا قارسى ءىس-قيمىل ماسەلەلەرى تالقىلاندى.
ال جوعارىدا ايتقانىمىزداي, وسى كۋرستاردىڭ ءبىرىنشى كەزەڭى – بازالىق دەڭگەيدەگى قارجىلىق تەرگەپ-تەكسەرۋ بويىنشا سەمينارى مەن ترەنەرلەرگە ارنالعان ترەنينگ قازان ايىنىڭ باسىندا وتكەن بولاتىن. وعان قارجىلىق قىلمىستارعا ماماندانعان, قۇقىق قورعاۋ جانە فيسكالدىق ورگانداردىڭ ارنايى ىرىكتەلگەن 24 قىزمەتكەرى قاتىسقان ەدى. بۇل جولعى سەميناردىڭ اشىلۋىنا ەلىمىزدىڭ باس پروكۋراتۋرا جانىنداعى قۇقىق قورعاۋ ورگاندارى اكادەمياسىنىڭ رەكتورى ۇلان بايجانوۆ, اقش مەملەكەتتىك حاتشىسىنىڭ حالىقارالىق ەسىرتكىگە قارسى كۇرەس جانە قۇقىق قورعاۋ قىزمەتى جونىندەگى كومەكشىسى ۋيليام براۋنفيلد, اقش-تىڭ قازاقستانداعى ەلشىسى دجوردج كرول, بۇۇ ەسىرتكىمەن جانە قىلمىسپەن كۇرەس بويىنشا باسقارماسىنىڭ ءبولىم باسشىسى (بۇۇ ەقب, ۆەنا) توفيك مۋرشۋدلۋ, ەقىۇ-نىڭ استاناداعى باعدارلامالار كەڭسەسىنىڭ ساياسي ماسەلەلەر جونىندەگى وفيتسەرى كولين ماككاللاۋ, سونىمەن قاتار, قازاقستاندىق ساراپشىلار, تەرگەۋشىلەر, پروكۋرورلار جانە سۋديالار قاتىستى.