كەشە ەلورداداعى م.گوركي اتىنداعى ورىس دراما تەاترىندا كەزەكتەن تىس پرەزيدەنتتىك سايلاۋدىڭ ەلەكتورالدى كەزەڭدەگى قىزمەتىنىڭ دەموكراتيالىق جولمەن جۇرگىزىلۋىن باقىلاۋ ءۇشىن قوعام وكىلدەرىنىڭ باستاماشىلىعىمەن قۇرىلعان كوميسسيانىڭ قىزمەتىمەن تانىستىرعان ءباسپاسوز ءماسليحاتى بولىپ ءوتتى.
ونىڭ جۇمىسىن قوعامدىق كوميسسيانىڭ تەڭ توراعالارىنىڭ ءبىرى, «ايت-راRك» پىكىرسايىس كلۋبىنىڭ ءتوراعاسى نۇرلان ەرىمبەتوۆ اشىپ, جۇرگىزىپ وتىردى. قوعامدىق كوميسسيا قۇرامىنا ەلىمىزگە تانىمال ادامدار ەنگىزىلگەن ەكەن. اتاپ ايتقاندا, تاعى ءبىر تەڭ توراعا قازاق تاعامتانۋ اكادەمياسىنىڭ ديرەكتورى, قازاقستان ۇعا اكادەميگى تورەگەلدى شارمانوۆ, ءمۇشەلەر قاتارىندا قوعام قايراتكەرى, مادەنيەتتانۋشى مۇرات اۋەزوۆ, قوعام قايراتكەرى, جازۋشى سماعۇل ەلۋباي, جازۋشى-دراماتۋرگ دۋلات يسابەكوۆ, ساراپشى-جۋرناليستەردىڭ قوعامدىق-كونسۋلتاتيۆتىك كلۋبىنىڭ توراعاسى, بەلگىلى جۋرناليست عادىلبەك شالاحمەتوۆ, رەجيسسەر-ستسەناريشى يگور ۆوۆنيانكو, «اباي-اقپارات» قازاق ينتەرنەت كەڭىستىگىن دامىتۋ قورى» قوعامدىق قورىنىڭ ۆيتسە-پرەزيدەنتى ايدوس سارىم, «ۋكراينسكي نوۆينى» گازەتىنىڭ باس رەداكتورى تاراس چەرنەگا جانە ت.ب. بار.
كوميسسيا توراعاسى قازاقستان ازاماتتارىنا ارناعان وزدەرىنىڭ ءمالىمدەمەسىن وقىپ بەردى. وندا: «ءبىزدىڭ ماقساتىمىز – قازاقستان رەسپۋبليكاسىندا ازاماتتىق قوعامدى ءارى قاراي دامىتۋعا كۇشتەردى بىرىكتىرۋ, سايلامالىق ءۇردىستىڭ ءار دەڭگەيىندە قوعامدىق باقىلاۋدى جۇزەگە اسىرۋ» دەلىنگەن. سونىمەن بىرگە, سايلاۋدىڭ حالىقارالىق جانە ۇلتتىق ستاندارتتارعا ساي, ءادىل, اشىق بولماعى ءبىزدىڭ دەموكراتيالىق جولمەن دامي ءتۇسۋىمىزدىڭ كەپىلى بولىپ تابىلاتىنى اتاپ كورسەتىلگەن. سوندىقتان دا ءبىز پرەزيدەنت بولۋعا ءۇمىتكەرلەردىڭ ءبارىنىڭ دە ناسيحاتتاۋ الاڭىنا, باق-قا تەڭدەي قول جەتكىزۋىنە باقىلاۋ جاساپ, مونيتورينگ ءجۇرگىزەتىن بولامىز. كانديداتتاردىڭ ءجانە ولاردىڭ شتابتارىنىڭ سايلاۋالدى ءىس-شارالارىنا ەرەكشە نازار اۋداراتىن بولامىز, دەدى ءباسپاسوز ءماسليحاتىنا قاتىسۋشىلار.
كوميسسيا مۇشەلەرى اكىمشىلىك رەسۋرستاردى قولدانۋ, كورسەتكىشتەردى اسىرا كورسەتۋگە تىرىسۋ, ازاماتتاردى وقۋ جانە جۇمىس ۋاقىتتارىندا ۇگىت-ناسيحات شارالارىنا جەگۋ سياقتى كەلەڭسىز وقيعالاردىڭ ۇنەمى بولىپ تۇراتىنىنا سىن ايتتى. ءبىزدىڭ مىندەتىمىز – جەرگىلىكتى جەردەگى سايلاۋ كوميسسيالارىنىڭ نازارىن وسىندايلارعا اۋدارىپ, مۇنداي ارەكەتتەرگە جول بەرگىزبەۋ, دەدى كوميسسيا مۇشەلەرى.
وزدەرىنىڭ كىرىسپە سوزدەرىنەن كەيىن قوعامدىق كوميسسيانىڭ مۇشەلەرى جۋرناليستەردىڭ كوپتەگەن سۇراقتارىنا جاۋاپ بەردى. سونىڭ ىشىندە ورتالىق سايلاۋ كوميسسياسىنا تىركەلدىڭىزدەر مە دەگەن سۇراققا, الدىمەن سىزدەردىڭ الدارىڭىزدا مالىمدەمە جاساپ الىپ, سوسىن تىركەلەتىن بولامىز, دەگەن جاۋاپ بەرىلدى.
جاقسىباي سامرات.