ەلوردادا اقپارات جانە كوممۋنيكاتسيالار مينيسترلىگى مەن «زەردە» ۇلتتىق ينفوكوممۋنيكاتسيالىق حولدينگى بىرلەسە وتىرىپ, تسيفرلى ەكونوميكا داۋىرىندەگى ۇكىمەتتىڭ وزگەرۋى تاقىرىبىندا دوڭگەلەك ۇستەل وتكىزدى.
دوڭگەلەك ۇستەلگە بىرقاتار مينيسترلىك وكىلدەرىمەن قاتار, ۇكىمەتتى تسيفرلاندىرۋ جۇمىسى بويىنشا گەرمانيا, اۆستراليا, ءۇندىستان ەلدەرىنەن كەلگەن ساراپشىلار قاتىستى. شەتەلدىك ماماندار ءوز ەلدەرىندەگى قولعا الىنعان جۇمىستاردى ورتاعا سالىپ, تاجىريبەلەرىمەن ءبولىستى.
وسى جيىندا ايتىلعانداي, اقپارات جانە كوممۋنيكاتسيالار مينيسترلىگى تاراپىنان «تسيفرلى قازاقستان» مەملەكەتتىك باعدارلاماسى ازىرلەنۋدە. بۇل باعدارلاما تسيفرلى ەكونوميكالىق جۇيە ارقىلى حالىقتىڭ ءومىر ساپاسى ءجانە ەل ەكونوميكاسىنىڭ باسەكەگە قابىلەتتىلىگىن ارتتىرۋعا باعىتتالعان.
بۇعان دەيىن ەلەكتروندى ۇكىمەتتىڭ پورتالىندا جۇمىس ىستەۋدىڭ قيىندىعى ءسوز بولىپ, پورتال قاراپايىم تۇتىنۋشىلاردىڭ تاراپىنان سىنعا ۇشىراعانى بەلگىلى. «زەردە» حولدينگىنىڭ باعدارلامالاردى باسقارۋ دەپارتامەنتىنىڭ ديرەكتورى ءالىبەك ەرعاليەۆتىڭ ايتۋىنشا, بۇل ماسەلە كوپ ۇزاماي شەشىلەتىن بولادى.
وسى جيىندا اۆستريالىق ساراپشى شيرلي گرەگور تسيفرلىق باسقارۋ ارقىلى قانشالىقتى قارجى ۇنەمدەۋگە بولاتىنى تۋرالى قىزىقتى دەرەكتەر كەلتىرىپ ءوتتى.
– تسيفرلى ۇكىمەت ۋاقىت ۇنەمدەۋ, جۇمىس جوسپارىن ءتيىمدى جاساۋعا كومەكتەسەدى. ماسەلەن, اۆستريادا ەل استاناسىنىڭ بيۋدجەتىن اقىلمەن جوسپارلاۋ ارقىلى قالالىق مۋنيتسيپاليتەت جىل سايىن 2 ميلليون ەۋرو ۇنەمدەيدى. بوستوندا كوممۋنالدىق قىزمەتتەردىڭ جۇمىسىن ءموبيلدى قوسىمشا ارقىلى قاداعالاۋ حالىقتان تۇسەتىن ءوتىنىش, ارىز-شاعىمداردى 66 پايىزعا ازايتقان, – دەدى ش.گرەگور.
وسى ورايدا, قازاقستاندا «زەردە» حولدينگى بىرقاتار ماڭىزدى جۇمىستاردى قولعا الىپ جاتقانىن ايتا كەتكەن ءجون. سونىڭ ارقاسىندا ەلىمىزدە مەملەكەتتىك سەكتوردى تسيفرلىق وزگەرتۋ قارقىندى جۇرگىزىلۋدە دەۋگە بولادى. ماسەلەن, جوعارىدا ايتىپ وتكەن «ەلەكتروندى ۇكىمەت» پورتالىن ەلىمىزدەگى ەكونوميكالىق بەلسەندى حالىقتىڭ 50 پايىزى, ياعني شامامەن 5 ميلليون ادام قولدانادى ەكەن.
بيىلعى جىلدىڭ ءساۋىر ايىنان بەرى «ازاماتتارعا ارنالعان ۇكىمەت» مەملەكەتتىك كورپوراتسياسى جۇمىس ىستەي باستاعانى بەلگىلى. بۇل كورپوراتسيا حالىققا ەلەكتروندى تۇردە 530 ءتۇرلى قىزمەت كورسەتىپ جاتىر, الداعى ۋاقىتتا قىزمەت سانى ودان ءارى كوبەيتىلمەك.
ارنۇر اسقار,
«ەگەمەن قازاقستان»