پارلامەنت سەناتىنىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ كوشپەلى وتىرىسى ءوتتى. وتىرىسقا سەناتور, اتالعان كوميتەت ءتورايىمى داريعا نازارباەۆا جەتەكشىلىك ەتتى.
باسقوسۋدا قولدانىستاعى «ازاماتتىق قورعانىس تۋرالى» زاڭنىڭ قىزمەتىن جەتىلدىرۋگە قاتىستى ءسوز قوزعالدى.
– بۇل زاڭ 2011 جىلى توتەنشە جاعدايعا قارسى ءىس-قيمىل سالاسىنداعى التى زاڭدى بىرىكتىرۋ ارقىلى قابىلدانعان بولاتىن. سول ۋاقىتتان بەرى قۇجات ازاماتتىق قورعانىس سالاسىنىڭ جۇمىسىن رەتتەۋشى قۇرال رەتىندە قىزمەت ەتىپ كەلەدى. زامان وزىپ, ادامنىڭ ءومىر ءسۇرۋ جاعدايى وڭالعان سايىن توتەنشە جاعدايلاردىڭ الدىن الۋعا قاتىستى ەرەجەلەر دە دامىپ, جەتىلدىرىلىپ وتىرۋى كەرەك. قوعامدا ادام ومىرىنەن قۇندى دۇنيە بولماۋى ءتيىس. ال ازاماتتىق قورعانىس دەگەنىمىز, ادام بالاسىنىڭ ءومىرىن ساقتاندىرۋعا باعىتتالعان جاۋاپكەرشىلىك. سول سەبەپتەن قولدانىستاعى زاڭنىڭ جۇمىس ىستەۋ تەتىكتەرى مەن قىزمەت اياسىن ساراپتاپ, توتەنشە جاعداي سالاسىنداعى ماسەلەلەردى شەشۋگە كىرىسۋىمىز كەرەك, – دەدى جيىندا د.نازارباەۆا.
كوشپەلى وتىرىستىڭ الماتىدا وتكىزىلۋى دە تەگىن ەمەس. بيىك تاۋ باۋرايى مەن سارقىراعان وزەن اڭعارىنا قونىس تەپكەن قالا – ەلىمىز بويىنشا توتەنشە جاعداي قاۋپى الدىمەن تونەتىن مەكەن. ءارى جەتىسۋ جەرىنىڭ سەيسميكالىق بەلسەندىلىگى دە وتە جوعارى. دەرەك بويىنشا, الاتاۋدىڭ قوس قاپتالىندا ءار كۇن سايىن جەراستى تەربەلىسى تىركەلەدى ەكەن. دەمەك, الماتى تۇرعىندارى ءۇشىن توتەنشە جاعداي كەزىندەگى ءىس-ارەكەتتەردىڭ ماڭىزدىلىعى جوعارى. وسى جيىندا مەگاپوليستىڭ ازاماتتىق قورعانىس سالاسىنىڭ دايىندىعى تارازىعا سالىنىپ, جاۋاپتى تۇلعالاردىڭ ەسەپتەرى تىڭدالدى.
سونداي-اق, سەناتورلارمەن كەزدەسۋدە وت قاۋپى جوعارى قالالار مەن ەلدى مەكەندەردىڭ قاۋىپسىزدىگىن تولىقتاي قامتاماسىز ەتۋ ءۇشىن ءالى دە 167 ءورت ءسوندىرۋ دەپوسىن سالۋ قاجەتتىگى ءسوز بولدى. ىشكى ىستەر مينيسترىنىڭ ورىنباسارى يۋري ءيليننىڭ مəلىمدەۋىنشە, ەلىمىزدە ءورت قاۋپىنەن قورعانۋ ماقساتىندا سوڭعى جىلدارى 100-دەن استام ارنايى بەكەتتەر اشىلعان. قازىر ەل اۋماعىندا 423 ءورت ءسوندىرۋ ءبولىمشەلەرى جۇمىس جاسايدى. الايدا, ءتىلسىز جاۋمەن كۇرەستە ارنايى ماماندار مەن جابدىقتالعان تەحنيكا جەتىسپەۋشىلىگى كۇن تارتىبىندە تۇر.
ايتپاقشى, تۇرعىنداردىڭ ازاماتتىق قورعانىس سالاسى بويىنشا جەدەل جەلىلەرگە ءجيى حابارلاساتىنى بايقالعان. ماسەلەن, وتكەن اي ارالىعىندا «112» جەلىسىنە 3 638 799 رەت تەلەفون قوڭىراۋى تىركەلىپتى. ال ىشكى ىستەر مينيسترلىگىنىڭ ءتوتەنشە جاعداي كوميتەتىنىڭ قۇتقارۋ ءبولىمشەلەرى 6,5 مىڭ ادامدى ءتۇرلى ارەكەتتەردەن قۇتقارىپ, 40 000 ادامدى ەۆاكۋاتسيالاعان. تاعى 5000 ادامعا اپات جاعدايىندا مەديتسينالىق كومەك كورسەتىلىپ, 11 رەت شۇعىل وپەراتسيا جاسالعان.
قالماحانبەت مۇقامەتقالي,
«ەگەمەن قازاقستان»
الماتى