وڭتۇستىكتە پارلامەنت ءماجىلىسىنىڭ قارجى جانە بيۋدجەت كوميتەتىنىڭ كوشپەلى ءماجىلىسى ءوتتى. وبلىستىڭ بارلىق بيلىك قۇرىلىمى قاتىسقان جيىندا كوميتەت ءتورايىمى گۇلجان قاراعۇسوۆانىڭ تورايىمدىعىمەن «بيۋدجەتارالىق رەتتەۋدىڭ نەگىزگى فۋنكتسيالارىنىڭ ءبىرى رەتىندە ءوڭىردىڭ بيۋدجەتتىك قامتاماسىز ەتىلۋىن تەڭەستىرۋ جانە سالىقتىق الەۋەتىنىڭ ءوسۋىن ىنتالاندىرۋ» ماسەلەسى قارالدى.
كوشپەلى جيىنعا قارجى مينيسترلىگى مەملەكەتتىك كىرىس كوميتەتىنىڭ توراعاسى د.ەرعوجين مەن پارلامەنت ءماجىلىسىنىڭ ون ەكى دەپۋتاتى قاتىستى.
ءوڭىر ءۇشىن وتە ماڭىزدى ءماسەلەدە ءسوز العان وبلىس اكىمى جانسەيىت ءتۇيمەباەۆ: «بۇگىنگى وتىرىستا تالقىلاناتىن ماسەلە وتە ماڭىزدى. سەبەبى, ءوڭىرىمىزدىڭ بيۋدجەتى – رەسپۋبليكا بويىنشا ەڭ ۇلكەن بيۋدجەت. تەك سوڭعى 7 جىلدا وبلىس بيۋدجەتى 2,5 ەسەگە ءوسىپ 559 ملرد تەڭگەگە جەتتى. وسىعان وراي, ءبىزدىڭ باستى ءمىندەت – بيۋدجەتتەن جۇمسالعان ءار تەڭگەنىڭ وبلىس ەكونوميكاسىنا تيگىزەتىن اسەرىنىڭ ناتيجەلى بولۋىن ۇيىمداستىرۋ. سەبەبى, بيۋدجەت قاراجاتى ەسەبىنەن وبلىس حالقىنىڭ كوپتەگەن الەۋمەتتىك-ەكونوميكالىق ماڭىزدى ماسەلەلەرى شەشىلەدى», – دەدى.
جيىندا بايانداما جاساعان كوميتەت مۇشەسى ومارحان وكسىكباەۆ بيۋدجەتارالىق قاتىناستاردى ۇيىمداستىرۋدى جاقسارتۋ, سونداي-اق, ولاردى ودان ءارى جەتىلدىرۋ باعىتتارىن دۇرىس تاڭداۋدى قامتاماسىز ەتۋ ورتاق ماسەلە ەكەندىگىن ايتتى.
قازاقستان ءوسۋ, دامۋ ۇستىندە. ونىڭ تەك وبلىستارعا ءبولىپ وتىرعان قارجىسىنىڭ ءوزى كورشىلەس مەملەكەتتەردىڭ ءبىر جىلدىق بيۋدجەتىمەن پارا-پار. اناۋ ءبىر جىلى وڭتۇستىك قازاقستان وبلىسىنا بولىنگەن قارجى قىرعىزستان مەملەكەتىنىڭ كىرىسىمەن تەڭ ەكەندىگى مىسالعا كەلتىرىلگەن ەدى.
وبلىس اكىمىنىڭ ورىنباسارى ەربول سادىر جاساعان بايانداماسىندا بيۋدجەتتى جوسپارلاۋ مەن ورىنداۋ تەتىكتەرىن تۇراقتى جەتىلدىرۋ ناتيجەسىندە وبلىسىمىزدا تاۋەلسىزدىك العان جىلداردان بەرى 1491 مەكتەپكە دەيىنگى ۇيىم اشىلىپ, بالالاردى مەكتەپكە دەيىنگى بىلىممەن قامتۋ دەڭگەيى 14%-دان 83,3%-عا جەتكەنى ايتىلدى. سونداي-اق, وسى جىلداردا وبلىستا 444 جاڭا مەكتەپ سالىنىپ, 117 اپاتتى مەكتەپتىڭ ماسەلەسى شەشىلدى. دەنساۋلىق ساقتاۋ سالاسىندا 347 جاڭا نىسان پايدالانۋعا بەرىلدى. بۇدان بولەك, وبلىستا 8,9 ملن شارشى مەتر تۇرعىن ءۇي پايدالانۋعا بەرىلىپ, 100 مىڭنان استام وتباسى باسپانالى بولدى. سونىمەن قاتار, ورتالىقتاندىرىلعان سۋمەن قامتۋ 51,9%-دان 71,3%-عا جانە گازبەن قامتۋ 33,1%-دان 57,2%-عا جەتتى. ەرەكشە كوڭىل ءبولىپ ايتاتىن ماسەلە, ءوڭىرىمىزدىڭ ەكونوميكاسىنا بيۋدجەت ەسەبىنەن كورسەتىلگەن قولداۋ ناتيجەسىندە جۇمىسسىزدىق دەڭگەيى 11,4%-دان 5,2%-عا تومەندەدى. سونىمەن قاتار, مۇعالىمدەردىڭ, دەنساۋلىق ساقتاۋ, جالپى العاندا, بارلىق بيۋدجەتتەن قارجىلاندىرىلاتىن مەكەمە قىزمەتكەرلەرىنىڭ ەڭبەكاقىسى كوبەيدى, دەپ تالداۋ جاساپ بەردى.
بۇدان كەيىن پارلامەنت ءماجىلىسىنىڭ قارجى جانە بيۋدجەت كوميتەتىنىڭ ءتورايىمى گۇلجان قاراعۇسوۆا باستاعان دەپۋتاتتار توبى «شىمكەنت» كەدەندىك راسىمدەۋ ورتالىعىندا بولدى.
كوشپەلى ءماجىلىستى قورىتىندىلاعان گۇلجان قاراعۇسوۆا ءوڭتۇستىك قازاقستان وبلىسىنىڭ ۇلكەن قارجىعا ونشالىقتى ءزارۋ ەمەستىگىن اتاپ كورسەتتى. وتكەن جىلمەن سالىستىرعاندا سالىقتىڭ 50 پايىزعا ارتىق جينالعاندىعى وڭىردە كاسىپكەرلىك سالاسىنىڭ ۇلكەن قارقىنمەن دامىپ كەلە جاتقاندىعىن بايقاتاتىنىن ايتتى. كەدەندىك راسىمدەۋگە قاتىستى كاسىپكەرلەر ايتقان ماسەلەلەرگە تالداۋ جاساعان ءتورايىم سالىق جانە كەدەن زاڭنامالارىن جەتىلدىرۋ جايىندا ۇسىنىستار جيناقتالىپ جاتقاندىعىنا كوڭىل اۋداردى.
وڭىردەگى وزگەرىستەردى, كۇرمەۋلى ماسەلەلەردى پارلامەنت قابىرعاسىنان اتتاپ شىقپاي, ورىنتاقتا وتىرىپ شەشۋ كوپ جاڭساقتىققا جول بەرگىزەدى. كوشپەلى ماجىلىستە دەپۋتاتتار تۇرعىنداردىڭ وتىنىشتەرىن, ۇسىنىستارىن تىڭداۋ ارقىلى جەرگىلىكتى جەردەگى جاعدايعا قانىعىپ قايتتى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى