كەشە پارلامەنت سەناتىنىڭ توراعاسى قاسىم-جومارت توقاەۆ ەقىۇ-نىڭ ءىس باسىنداعى توراعاسى – ليتۆا رەسپۋبليكاسىنىڭ سىرتقى ىستەر ءمينيسترى اۋدرونيۋس اجۋباليسپەن كەزدەستى, دەپ حابارلادى وسى پالاتانىڭ ءباسپاسوز قىزمەتى.
كەزدەسۋ بارىسىندا 2011 جىلعى ليتۆا توراعالىعىنداعى باسىمدىقتار, سونداي-اق ەكىجاقتى جانە كوپجاقتى تۇرپاتتاعى پارلامەنتارالىق ءوزارا ءىس-قيمىل ماسەلەلەرى تالقىلاندى.
ق.توقاەۆ 2010 جىلعى قازاقستان توراعالىعى كەزىندەگى باسىمدىقتار مەن باستامالاردى قولداۋعا وراي ريزاشىلىق بىلدىرە وتىرىپ, «حەلسينكي اكتىسىندە ايتىلعان ەرەجەلەر مەن قاعيدالار قايتا ناقتىلانىپ, قابىلدانعان استانا دەكلاراتسياسى كۇللى ەقىۇ قوعامداستىعىنداعى زور جەتىستىك بولىپ تابىلادى», دەدى. توراعا سونداي-اق «ءبىز ليتۆا توراعالىعىنىڭ باعدارلاماسىن قولدايمىز جانە ۇيىمنىڭ تيىمدىلىگىن كۇشەيتۋ جونىندەگى جوسپارلاردى ورىنداۋعا جاردەمدەسۋگە ءازىرمىز», دەدى.
ەقىۇ, ەۋروپا كەڭەسى جانە ناتو پارلامەنتتىك اسسامبلەيالارى سەكىلدى ءىرى پارلامەنتارالىق ۇيىمدار اياسىندا قازاقستان مەن ليتۆا دەپۋتاتتارىنىڭ ىنتىماقتاستىعى جالعاسىپ كەلە جاتقانى تۋرالى اتاپ وتكەن توراعا ءوزارا مەملەكەتارالىق بايلانىستىڭ ماڭىزدى قۇرامى – پارلامەنتارالىق ۇنقاتىسۋدى ودان ءارى بەلسەندىلەندىرۋدى جاقتايتىنىن ايتتى.
ق.توقاەۆ ليتۆا سەيمىنىڭ توراعاسى يرەنا دەگۋتەنەگە قولايلى ۋاقىتتا قازاقستانعا كەلۋگە شاقىرۋىن جەتكىزدى.
بيىلعى 3 ساۋىردە قازاقستاندا بولاتىن پرەزيدەنتتىك سايلاۋعا قاتىستى سەنات توراعاسى: «ءبىز حالىقارالىق ستاندارتتارعا ساي اشىق جانە ءادىل سايلاۋ وتكىزۋدى تولىق قامتاماسىز ەتەمىز», دەدى. توراعانىڭ ايتۋىنشا, سايلاۋدى بايقاۋ جونىندەگى مىندەتتەردى ورىنداۋ ءۇشىن بارلىق قاجەتتى جاعداي جاسالاتىن بولادى.
قازاقستاننىڭ ەقىۇ-عا ءتوراعالىق ەتۋىنىڭ ناتيجەلەرىن جوعارى باعالاي كەلىپ, ا.اجۋباليس «ۇيىمنىڭ جوعارى لاۋازىمىندا ليتۆا قازاقستاندى زور وداقتاس رەتىندە تانيدى», دەگەن پىكىر ءبىلدىردى.
ونىڭ ايتۋىنشا, يسلام كونفەرەنتسياسى ۇيىمىنا ءبىزدىڭ ەلىمىزدىڭ تابىستى توراعالىق ەتەتىنىنە كۇمان جوق, ويتكەنى «قازاقستاننىڭ ءوزىن جاقسى جاعىنان كورسەتۋىنە جانە ايماققا ۇلگى بولۋعا الەۋەتى دە, مۇمكىندىكتەرى دە جەتەدى».