وسى كۇندەرى قۇرامىندا بيزنەس قاۋىمداستىق, دامۋ ينستيتۋتتارى جانە ۇكىمەتتىك ەمەس ۇيىمداردىڭ وكىلدەرى مەن ءدىن ساراپشىلارى بار 200 مامان ەلباسى تاپسىرماسىمەن اقتوبە ءوڭىرىن ارالاپ جۇرگەنى بەلگىلى. بۇگىنگە دەيىن ولار «حالىقتىڭ قاۋىپسىزدىگىن قامتاماسىز ەتۋ» جوباسى اياسىندا قالا, اۋدان, اۋىل حالقىمەن كەزدەسۋلەر وتكىزىپ, وعان 57 مىڭ تۇرعىننىڭ قاتىسۋىن قامتاماسىز ەتتى. جەر جەرلەردە ۇيىمداستىرىلعان شارالاردا ازاماتتارعا مەملەكەتتىك جانە سالالىق باعدارلامالاردى جۇزەگە اسىرۋ ماسەلەلەرى مەن ونىڭ تەتىكتەرى تۇسىندىرىلۋدە. وسىلايشا, وڭىردە بيزنەس ورتانىڭ ءورىسىن كەڭەيتۋگە ەرەكشە كوڭىل بولىنۋدە.
ءتۇيىنى تارقاماعان كوكەيكەستى ماسەلەلەردى جەدەل شەشۋ ءۇشىن قۇرىلعان ارنايى توپ وسى كۇنگە دەيىن جەرگىلىكتى اكىمدىكتەردىڭ وكىلدەرىمەن بىرگە اقتوبە قالاسى مەن مۇعالجار, تەمىر, شالقار, حرومتاۋ جانە العا اۋداندارىنىڭ تۇرعىندارىمەن كەزدەستى. سونىمەن قاتار, ولار شاعىن جانە ورتا بيزنەس وبەكتىلەرىندە بولىپ, 167 كاسىپكەرگە قىزمەت اياسىن كەڭەيتۋگە قاتىستى قوسىمشا كەڭەس بەرىلدى. جوسپارلى جيىندار قاتارىندا اۋىل جاستارى ءۇشىن ءوز بيزنەستەرىن ۇيىمداستىرۋ مەن ونى جۇرگىزۋ بويىنشا ترەنينگ, سەمينار, شەبەرلىك كلاستارى جۇرگىزىلىپ جاتقانىن ايتا كەتەيىك. ايماق جاستارىنا بيزنەس جوسپار جاساۋ ۇيرەتىلىپ, ءوتىمدى بيزنەس-يدەيالاردى جۇزەگە اسىرۋعا كەڭەس بەرىلۋدە.
مەملەكەت باسشىسىنىڭ تاپسىرماسىنا سايكەس ىسكە كىرىسكەن ۆەدوموستۆوارالىق توپ جۇمىسىنىڭ باعىتى – ءپاتريوتيزمدى كوتەرۋ, وتباسىلىق قۇندىلىقتاردى ءدارىپتەۋ مەن ۇلتارالىق كەلىسىمدى نىعايتۋ بولىپ تابىلسا, ماماندار ەلدى وسىعان ۇيىستىرۋ جولىندا دا اۋقىمدى ءتۇسىندىرۋ جۇمىستارىن جۇرگىزۋدە.
نۇرلىبەك دوسىباي,
«ەگەمەن قازاقستان»