كەشە اقوردادا مەملەكەت باسشىسى نۇرسۇلتان نازارباەۆ ەقىۇ-نىڭ ءىس باسىنداعى توراعاسى – ليتۆانىڭ سىرتقى ىستەر ءمينيسترى اۋدرونيۋس ءاجۋباليستى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ باسپاسوز قىزمەتى.
كەزدەسۋ بارىسىندا قازاقستان مەن ەقىۇ اراسىنداعى ىنتىماقتاستىقتى دامىتۋ ماسەلەسى تالقىلاندى.
– قازاقستاننىڭ ەقىۇ-عا ءتوراعالىعى ۇيىمنىڭ تاريحىندا تەرەڭ ءىز قالدىردى. ون ءبىر جىلدان كەيىن العاش رەت استانادا وتكەن سامميتتە ۇيىمعا مۇشە مەملەكەتتەر وزدەرىنىڭ ەقىۇ-نىڭ نەگىزىن قۇراۋشى قاعيداتتاردى ۇستاناتىندىقتارىن تاعى دا قۋاتتاعانى وتە ماڭىزدى. ليتۆا ءىس باسىنداعى توراعا رەتىندە ءوز جۇمىسىن وسى نەگىزدە جۇرگىزەتىن بولادى, – دەپ اتاپ ءوتتى ا.اجۋباليس پرەزيدەنت ن.نازارباەۆپەن اڭگىمە بارىسىندا.
ەقىۇ-نىڭ ءىس باسىنداعى ءتوراعاسى – ليتۆا رەسپۋبليكاسىنىڭ سىرتقى ىستەر ءمينيسترى ليتۆا ەقىۇ-نىڭ «ۇشتىگى» اياسىندا قازاقستانمەن تىعىز ىنتىماقتاستىق ورناتۋعا مۇددەلىلىك تانىتىپ وتىرعانىن اتاپ ءوتتى. اسىرەسە, بۇل ورتالىق ازيا ايماعىنداعى پروبلەمالارعا قاتىستى.
– قىرعىزستانداعى داعدارىس كەزىندە قازاقستان ەقىۇ-نىڭ ءتوراعاسى رەتىندە بەلسەندى ءارى جىلدام ارەكەت جاساپ, احۋالدى تۇراقتاندىرۋشى ءرول اتقاردى. ءسىزدىڭ ەلىڭىز مۇنداي جاعدايدا قالاي ءتيىمدى جۇمىس ىستەۋ كەرەكتىگىن كورسەتتى, – دەدى ەقىۇ-نىڭ ءىس باسىنداعى توراعاسى.
باق وكىلدەرىنە ارنالعان بريفينگتە ا.اجۋباليس استانادا 11 جىلدان سوڭ العاش رەت وتكەن ەقىۇ ءسامميتىنىڭ زور ءمان-ماڭىزى بارىن اتاپ ءوتتى.
– ءبىز قازاقستاننىڭ بسۇ-عا كىرۋ ماسەلەسىن تالقىلادىق. ەۋرووداقتىڭ كوزقاراسى تۇرعىسىنان العاندا, بۇل – تازا بيزنەس ءۇشىن جاعداي جاساۋعا نەگىز بولاتىن ۇيىم. ەڭ باستىسى, قازاقستان ءوز تاۋەلسىزدىگىن العان 20 جىل ىشىندە ەكونوميكالىق قارقىندى دامۋعا قول جەتكىزدى. ايماقتا دا, الەمدە دە ەلدىڭ بەدەلى بارعان سايىن ارتا تۇسۋدە. بيزنەس ءۇشىن بارلىق جاعداي جاسالۋدا. قوعامداعى جاعداي تۇراقتى. مەن سونداي-اق نۇرسۇلتان نازارباەۆقا ليتۆا پرەزيدەنتى اتىنان تاۋەلسىزدىك كۇنىمەن قۇتتىقتاۋى جانە قازاقستانعا شاقىرعان ىقىلاسى ءۇشىن العىس ايتتىم, – دەدى ا.اجۋباليس.
سونىمەن قاتار, ەقىۇ-نىڭ ءىس باسىنداعى توراعاسى – ليتۆا رەسپۋبليكاسىنىڭ سىرتقى ىستەر ءمينيسترى استانانىڭ اسەمدىگىنە ءوز تاڭدانىسىن ءبىلدىردى.
– قازاقستان تاۋەلسىزدىگىنىڭ باستاپقى كەزىندە قولعا الىنعانىن ەسكەرە كەلگەندە, استانانى كوشىرۋ باتىل شەشىم بولدى. ءسىز ءوز ەلورداڭىزدى, ءوز استاناڭىزدى ماقتان تۇتا الاسىز, – دەدى ا.اجۋباليس.