«ەير استانا» ۇلتتىق اۋە تاسىمالداۋشى 2017 جىلعى الماتىداعى 28-ءشى بۇكىلالەمدىك قىسقى ۋنيۆەرسيادانىڭ ۇيىمداستىرۋ كوميتەتىمەن ىنتىماقتاستىق جونىندە كەلىسىم جاساستى.
«ەير استانا» اق پرەزيدەنتى پيتەر فوستەر مەن 2017 جىلعى ۋنيۆەرسيادا ديرەكتسياسىنىڭ باسشىسى نايل نۇروۆ قول قويعان قۇجات نەگىزىندە بۇل قازاقستاندىق اۋە كومپانياسى ويىندار دەمەۋشىسى اتانىپ, ۋنيۆەرسيادانىڭ رەسمي سەرىكتەسى دەپ تانىلدى.
جاسالعان كەلىسىمگە سايكەس, «ەير استانا» سپورتشىلار مەن ديرەكتسيانىڭ رەسمي دەلەگاتسيا وكىلدەرىنىڭ جەرگىلىكتى جانە حالىقارالىق اۋە رەيستەرىنە ەداۋىر جەڭىلدىكتەر جاساپ قانا قويماي, ەستافەتا الاۋىن استانادان جانە 15 وڭىردەن الماتىعا جەتكىزۋدى جانە ديرەكتسيا وتكىزەتىن ءىس-شارالاردى ءوز كوممۋنيكاتسيا تەتىكتەرى ارقىلى ناسيحاتتاۋدى اقىسىز ءتۇردە جۇزەگە اسىرماق.
«قىسقى ۋنيۆەرسيادانى ۇيىمداستىرۋ ىسىندە ءبىزدىڭ دە كومەگىمىزدىڭ تيەتىنىنە قۋانىشتىمىز. ەڭ ءىرى سپورتتىق سايىستاردىڭ ءبىرى سانالاتىن ۋنيۆەرسيادانىڭ الماتىدا ءوتۋى قازاقستان الەۋەتىن الەمگە تانىتۋعا, ەلدىڭ تانىمالدىعى مەن تۋريستىك ءمۇمكىندىگىنىڭ ارتۋىنا ىقپالىن تيگىزبەك. «ەير استانا» ءۇشىن اتالعان شاراعا قولداۋ كورسەتۋ زور ءمارتەبە», – دەدى «ەير استانا» اۋە كومپانياسىنىڭ پرەزيدەنتى پيتەر فوستەر.
ال ۋنيۆەرسيادا ديرەكتسياسىنىڭ باسشىسى نايل نۇروۆ «ەير استانانىڭ» الەمدەگى ەڭ ءۇزدىك اۋە كومپانيالارىنىڭ ءبىرى ەكەنىن, سوندىقتان ويىنداردى ۇيىمداستىرۋ كوميتەتى ءۇشىن بۇل اۋە كومپانياسىمەن ىنتىماقتاستىق ورناتۋ – الماتىداعى قىسقى ۋنيۆەرسيادانىڭ ويداعىداي وتۋىنە دەگەن سەنىمدى ارتتىرا تۇسەتىنىن جەتكىزدى.
ميرا بايبەك,
«ەگەمەن قازاقستان»
الماتى