اقتوبە قالاسىندا «ستراتەگيا- 2020: ايەلدەرگە ارنالعان جاڭا ءمۇمكىندىكتەر» اتتى وبلىستىق كونفەرەنتسيا ءوتتى. كونفەرەنتسيا ماقساتى – ەلىمىزدىڭ تاۋەلسىزدىگىنىڭ 20 جىلدىعىنا وراي, قوعامدىق ساياسي جانە الەۋمەتتىك-ەكونوميكالىق دامۋىنداعى ايەلدەردىڭ ءرولىن كۇشەيتۋ, قازاقستاننىڭ ستراتەگيالىق دامۋ كۋرسىن ىسكە اسىرۋعا ايەلدەردىڭ اتسالىسۋىن ارتتىرۋ مەحانيزمدەرىن ازىرلەۋ بولىپ تابىلادى. وعان قاتىسقان مەملەكەتتىك ورگانداردىڭ, ساياسي پارتيالاردىڭ, ۇكىمەتتىك ەمەس, كاسىپوداق ۇيىمدارىنىڭ, باق وكىلدەرى مەن دەپۋتاتتار, ءبىلىم, دەنساۋلىق ساقتاۋ, مادەنيەت جانە سپورت ۇيىمدارىنىڭ جەتەكشى ماماندارى ءوڭىردەگى گەندەرلىك جانە وتباسىلىق-دەموگرافيالىق ساياساتتىڭ اعىمداعى پروبلەمالارىن ءجانە 2006-2016 جىلدارعا ارنالعان قر گەندەرلىك تەڭدىك ستراتەگياسىن جۇزەگە اسىرۋ پروتسەسىن تالقىلادى.
كونفەرەنتسيادا قوبدا اۋدانىنىڭ اكىمى ليۋبوۆ يسماعامبەتوۆا ەلىمىزدىڭ قوعامدىق-ساياسي جانە ءالەۋمەتتىك-ەكونوميكالىق دامۋىنداعى ايەلدەردىڭ ءرولى تۋرالى بايانداسا, ويىل اۋدانىنان كەلگەن جەكە كاسىپكەر گۇلجامال ءالىپ شاعىن بيزنەستەگى ايەلدەردىڭ قۇقىقتارى مەن مۇمكىندىكتەرىنە توقتالدى. تەمىر اۋدانىنداعى شۇبارقۇدىق گيمنازياسىنىڭ مۇعالىمى, «جاس وتان» جق كوشباسشىسى نازگۇل قاجىمۇقان قازىرگى زامانعى قازاقستان ايەلىنىڭ جاڭارۋ جولى حاقىندا وي ءوربىتتى. ودان كەيىن ءسويلەۋشىلەر مەملەكەتىمىزدىڭ گەندەرلىك ساياساتىن جانداندىرۋدا ساياسي پارتيالاردىڭ ءرولىن كۇشەيتۋگە, قۇندىلىقتاردى قالىپتاستىرۋداعى وتباسى رولىنە, وتاندى ءسۇيۋدىڭ وتباسىنان باستالاتىنىنا, گەندەرلىك ساياساتتاعى جاستاردىڭ رولىنە قاتىستى وي-پىكىرلەرىن ورتاعا سالدى.
كونفەرەنتسياعا قاتىسقان وبلىس اكىمى ەلەۋسىن ساعىندىقوۆ قىسقاشا ءسوز سويلەپ, وبلىستىڭ ەكونوميكالىق-الەۋمەتتىك دامۋ باعىتتارىمەن تانىستىردى. وڭىردە ەلباسى نۇرسۇلتان نازارباەۆتىڭ «بولاشاقتىڭ ىرگەسىن بىرگە قالايمىز» اتتى قازاقستان حالقىنا ارناعان بيىلعى جولداۋىنان تۋىندايتىن مىندەتتەر مەن مەجەلى جۇمىستاردى ورىنداۋعا مۇمكىندىك تولىق ەكەنىن اتاپ ءوتتى. وبلىستاعى ايەل ادامدارعا كورسەتىلىپ وتىرعان قامقورلىقتاردى تىلگە تيەك ەتە كەلىپ, قىز-كەلىنشەكتەر ارالاسپايتىن قوعامدىق ءومىردىڭ ءبىردى-ءبىر سالاسى جوق ەكەنىن العا تارتتى. اسىرەسە, قىز-كەلىنشەكتەر مەملەكەتتىك قىزمەت, بيزنەس جانە بانك, بيۋدجەتتىك سالادا بەلسەندى ەڭبەك ەتەتىنىن جەتكىزدى. ونىڭ ايتۋىنشا, گەندەرلىك ساياساتتاعى ۇلاعاتتى ۇستانىم قىز-كەلىنشەكتەردىڭ قاي سالادا دا ءوز قابىلەت-قارىمىن تولىق اشۋلارىنا جاعداي جاساپ وتىرعان كورىنەدى. ونىڭ دا جانى بار. وبلىس اكىمىنىڭ ەكى ورىنباسارى, ءبىر اۋداننىڭ اكىمى نازىك جاندى ايەل ادامدار. ال, اۋدان اكىمدەرىنىڭ ورىنباسارلارى, باسقارما باستىقتارى, اۋىلدىق وكرۋگ اكىمدەرى بولىپ تابىستى ەڭبەك ەتىپ جۇرگەن قىز-كەلىنشەكتەر قانشاما. بۇل ءجاي عانا پايىز قۋشىلىق ەمەس, ءوڭىردەگى قىز-كەلىنشەكتەردىڭ تاپسىرىلعان ىسكە ۇلكەن جاۋاپكەرشىلىكپەن كەلەتىندىگى, ىسكەرلىگى دەۋ ابدەن ورىندى.
ساتىبالدى ءساۋىرباي.
اقتوبە وبلىسى.