اقش پرەزيدەنتى باراك وباما باحرەين كورولىنىڭ كادرلىق وزگەرتۋلەر جونىندە قابىلداعان شەشىمىن قولدادى, دەپ حابارلايدى ۆۆس اگەنتتىگى.
وسىدان ەكى كۇن بۇرىن كورول, ءوزى اتاپ كورسەتكەندەي, ەلدە داعدارىس تۋىن ۋشىقتىرعان ءۇش ءمينيستردى وتستاۆكاعا جىبەردى. سول سياقتى, باراك وباما مۇراگەر حانزادا سالمان بين حاماد ءال-حاليفانىڭ باستاماسىمەن قولعا الىنعان وپپوزيتسيامەن اراداعى ۇنقاتىسۋعا دا قولداۋ بىلدىرگەن. باحرەيننىڭ ەجەلگى ارىپتەسى رەتىندە, اقش باحرەيندەگى تۇراقتىلىقتىڭ ەل تۇرعىندارىنىڭ رەفورمالارعا دەگەن امبەباپ قۇقىقتارىنىڭ ساقتالا وتىرىپ نىعايا تۇسەتىنىنە سەنىم بىلدىرەدى, دەلىنگەن اقش پرەزيدەنتىنىڭ حاتىندا.
امر مۋسا پرەزيدەنتتىكتەن ءۇمىتتى
اراب مەملەكەتتەرى ليگاسىنىڭ باس حاتشىسى امر مۋسا الداعى وتەتىن سايلاۋدا ءوزىنىڭ كانديداتۋراسىن ەگيپەت پرەزيدەنتتىگىنە ۇسىنباق نيەتى بار ەكەنىن مالىمدەدى, دەپ حابارلايدى يتار-تاسس.
پرەزيدەنت سايلاۋى ەگيپەتتىڭ بۇرىنعى پرەزيدەنتى حوسني مۇباراك وتستاۆكاعا كەتكەننەن كەيىن جارتى جىلدىڭ ىشىندە ءوتۋى ءتيىس. ال مۇباراك ۇكىمەتكە قارسى ەرەۋىلدەر سالدارىنان وكىلەتتىكتەردى قارۋلى كۇشتەردىڭ جوعارى كەڭەسىنە بەرىپ, 11 اقپان كۇنى وتستاۆكاعا كەتتى. ەگيپەتتەگى ەرەۋىلدەر كەزىندە امر مۋسا نارازى توپقا قولداۋ كورسەتىپ, حوسني مۇباراكتىڭ وتستاۆكاعا كەتۋىن تالاپ ەتكەن بولاتىن.
كاسىپوداقتار سەۋلدى ايىپتايدى
ۆاشينگتون مەن سەۋلدەن امەريكا مەن وڭتۇستىك كورەيانىڭ بىرلەسكەن اسكەري مانەۆرلەر وتكىزۋدەن باس تارتۋىن تالاپ ەتكەن دۇيسەنبى كۇنى كحدر مەن وڭتۇستىك كورەيانىڭ كاسىپوداق ۇيىمدارى وزدەرىنىڭ بىرلەسكەن دەكلاراتسياسىندا.
«الدىن-الا جوسپارلانعان ۋشىقتىرۋ بولىپ تابىلاتىن» وسىناۋ جاتتىعۋلار سالدارى كورەيا تۇبەگىندەگى احۋالدى سوعىس جاعدايىنا جەتكىزۋى مۇمكىن, دەپ اتاپ كورسەتىلگەن قۇجاتتا. مۇنداي جاعدايدا سەۋل رەجىمى كحدر-دىڭ بارلىق داۋلى ءماسەلەلەردى كەلىسسوزدەر ارقىلى شەشۋ, سول سياقتى, تۇبەكتەگى بەيبىتشىلىك پەن تۇراقتىلىقتى نىعايتۋ تۋرالى ۇسىنىسىنا شۇعىل تۇردە ۇنقاتۋى ءتيىس, دەپ ەسەپتەيدى سولتۇستىك پەن وڭتۇستىك كاسىپوداقتارى. قۇجاتتا ەكى ەل كاسىپوداقتارىنىڭ قارىم-قاتىناسىنا تىيىم سالعان سەۋل ارەكەتى دە ايىپتالادى.
تۇركيانىڭ ەكس-پرەمەرى قايتىس بولدى
ۇزاققا سوزىلعان ناۋقاستان كەيىن 85 جاسقا قاراعان شاعىندا تۇركيادا قازىرگى زامانعى ساياسي يسلامنىڭ نەگىزىن قالاۋشى نادجمۋددين ەرباكان قايتىس بولدى, دەپ حابارلايدى بي-بي-سي اگەنتتىگى.
ول ەلدىڭ قازىرگى پرەمەر-ءمينيسترى رەدجەپ تايپ ەردوعاننىڭ تالىمگەرى بولىپ سانالدى. 1996 جىلى ن. ەرباكان تۇركيانىڭ پرەمەر-ءمينيسترى بولدى. بىراق ەلدىڭ زيالى سيپاتتاعى كونستيتۋتسياسىنىڭ نەگىزىنە نۇقسان كەلتىرمەك دەپ ەسەپتەگەن اسكەريلەر ونى قىزمەتتەن كەتىرگەن بولاتىن.
يزرايل اۆياسوققى جاسادى
يزرايل گازا سەكتورىنا اۆياتسيادان كەزەكتى سوققى جاساپ, سونىڭ سالدارىنان ءبىر پالەستينالىق اسكەري قازا تاپسا, تاعى ءبىر ادام جاراقات الدى, دەپ حابارلايدى «ماياك» راديوسى.
ءيزرايلدىڭ اسكەري ۇشاقتارى سەنبى كۇنى دە گازا سەكتورىنىڭ ءتورت جەرىنە اۋەدەن سوققى جاساپ, سونىڭ سالدارىنان ءتورت ادام جاراقات العان بولاتىن. ايتا كەتۋ كەرەك, 2007 جىلدىڭ جازىنان بەرى گازا سەكتورى حاماس يسلام قوزعالىسىنىڭ باقىلاۋىندا.
وماندا 50 مىڭ جاڭا جۇمىس ورنى اشىلماق
وماننىڭ سۇلتانى كابۋس بەن سايد جەكسەنبى كۇنى 50 مىڭ جاڭا جۇمىس ورنىن تاعايىنداۋ تۋرالى دەكرەت شىعاردى, دەپ حابارلايدى وسى ەلدىڭ اقپارات اگەنتتىگى.
سوعان سايكەس ادام رەسۋرستارى مينيسترلىگىندە جۇمىسسىز رەتىندە تىركەلگەن ءار ادام جۇمىسقا ورنالاسقانعا دەيىن ايىنا 150 ريال (490 دوللار) الىپ تۇراتىن بولادى. سۇلتاننىڭ تاپسىرماسى بويىنشا اۋلا ىستەرى ءجونىندەگى مينيستر حالىق تولقۋلارى ورىن العان سۋحار قالاسىنا بارىپ, وندا ەرەۋىلشىلەرمەن كەزدەسىپ, ولاردىڭ تالاپتارىن تىڭداعان. قازىرگى ۋاقىتتا قالادا جاعداي تۇراقتالا باستاعان كورىنەدى.
شىعىن – 15 ميلليارد دوللار
جاڭا زەلانديانىڭ كرايستچەرچە قالاسىنداعى 147 ادامنىڭ ءومىرىن جالماعان جەر سىلكىنىسىنىڭ زارداپتارىن جويۋ ەل ەكونوميكاسى ءۇشىن شامامەن 15 ميلليارد دوللارعا تۇسپەك, دەپ حابارلايدى اسسوشەيتەد پرەسس اگەنتتىگى وسى ەلدىڭ پرەمەر-مينيسترى دجون كەيدىڭ مالىمدەمەسىنە سىلتەمە جاساي وتىرىپ.
كەيدىڭ ايتۋىنشا, 90 ميلليون دوللارداي اقشا اپات سالدارىنان جۇمىسسىز قالعان حالىققا ەڭبەكاقى تولەۋگە كەتپەك. 22 اقپاندا بولعان الاپات ءزىلزالا قالانىڭ ورتالىق بولىگىن تولىقتاي جەرمەن جەكسەن ەتكەن بولاتىن. سەيسمولوگتاردىڭ ايتۋلارىنشا, 6,3 بالل بولعان جەر سىلكىنىسىنىڭ كىندىگى قالاعا جاقىن جەردە بولعان كورىنەدى.
پرەزيدەنت رەزيدەنتسياسىنا شابۋىل جاسالدى
جەكسەنبى كۇنى كونگو دەموكراتيالىق رەسپۋبليكاسىنىڭ استاناسى كينشاسادا ەل پرەزيدەنتى جوزەف كابيلانىڭ رەزيدەنتسياسىنا قارۋلى شابۋىل جاسالعان.
كونگو ۇكىمەتىنىڭ رەسمي وكىلى لامبەر ماندەنىڭ حابارلاۋىنشا, شابۋىلدى قارۋلانعان بەلگىسىز توپ جاساعان. رەسپۋبليكالىق گۆارديا جاۋىنگەرلەرىمەن بولعان اتىستا شابۋىل جاساعانداردىڭ 6-ۋى قازا تاپقان. ءسوز رەتىندە ايتا كەتسەك, 39 جاسار جوزە كابيلا وسى ەلدىڭ ءۇشىنشى پرەزيدەنتى بولعان ءوز اكەسى لوران-دەزيرە كابيلا ولتىرىلگەننەن كەيىن كەلگەن ءتورتىنشى پرەزيدەنت. سول سياقتى ول 2006 جىلى ەلدەگى دەموكراتيالىق سايلاۋ بارىسىندا سايلانعان تۇڭعىش مەملەكەت باسشىسى بولىپ تابىلادى.
فرانتسيادا مينيسترلەر اۋىستى
تۋنيستەگى ساياسي وزگەرىستەر فرانتسۋز ۇكىمەتىندەگى شۋلى وتستاۆكالارعا ۇلاستى, دەپ حابارلايدى رەسەيدىڭ نتۆ تەلەارناسى.
سىرتقى ىستەر ءمينيسترى ميشەل الو-ماري ءوز قىزمەتىنەن كەتتى. وپپوزيتسيا, سول سياقتى, قۇقىق قورعاۋشىلار مەن ءباسپاسوز ونى ءتۋنيستىڭ تاقتان تايدىرىلعان پرەزيدەنتىمەن جاقىن قارىم-قاتىناستا بولدى دەپ ايىپتاپ وتىر. تۋنيستەگى تارتىپسىزدىكتەر كەزىندە ول بەن الي رەجىمىن قولداۋعا ۋادە بەرىپتى-ءمىس. سىرتقى ساياسات ۆەدومستۆوسى باسشىسىنىڭ ورىنتاعىنا فرانتسيانىڭ ەڭ تاجىريبەلى ساياساتكەرلەرىنىڭ ءبىرى اللەن جيۋپپە وتىردى.
ينتەرنەت ماتەريالدارى نەگىزىندە ازىرلەندى.