زايسان اۋدانىنىڭ اكىمى سەرىك زاينۋلدين كىندىك قانى تامعان تۋعان جەرىنە جاڭالىقتاردى الا كەلدى. وتكەن جىلدىڭ جازىندا جاڭا قىزمەتكە تاعايىندالا سالىسىمەن اۋداندىق ءبىلىم ءبولىمىنىڭ باستىعى ءسانيا ابدىعاليەۆانى جانە بىرنەشە مەكتەپتىڭ ديرەكتورىن شاقىرىپ الىپ, وقۋشىلاردىڭ جازعى دەمالىسىن ءتيىمدى وتكىزۋ ءۇشىن جىلىجاي سالۋ قاجەتتىلىگىنە توقتالدى. سونىڭ ءبىرى – دايىر اۋىلىنىڭ ءمۇكاراما ورتا مەكتەبىندە جىلىجاي سالۋ ماسەلەسى دە ءسوز بولدى. مەكتەپ ديرەكتورى اناربەك ءدۇتباەۆ تاپسىرما العان سوڭ جىلۋ قازاندىعى جانىنان 50 شارشى مەترلىك الاڭدى قورشاپ, ەسكى مەكتەپتەن قالعان ەسىك-تەرەزەلەردى قۇراستىرىپ, جىلىجايدى جاساقتادى. مەكتەپ مۇعالىمدەرىنىڭ بۇل تىرشىلىگىنە قۇدىكپەن قاراعاندار دا تابىلدى.
عىلىمي ورتالىق جەتەكشىسى اقىلبەك وماريەۆ, مەحانيزاتور بولات قۇرمانعوجين دەگەن ازاماتتار دا كۇن-ءتۇن دەمەي جىلىجايعا ەككەن ءجۇز ءتۇپ قيار, ءجۇز ءتۇپ قىزاناقتى كۇتىپ-باپتاي باستادى. ولارعا ۇستازدار مەن ءشاكىرتتەر دە قولعابىس جاساپ تۇردى. جەلتوقساندا ەگىلگەن قيار العاشقى ءونىمدى جاقىندا بەردى.
– ءبارىمىز اۋىلدا وستىك, جەردىڭ قادىرىن تۇسىنەمىز. الايدا جىلىجاي دەگەندى تەك ەستۋشى ەدىك, ەندى ونى تەرەڭ زەرتتەۋگە تۋرا كەلدى. وبلىس ورتالىعى مەن ونىڭ ماڭىنداعى اۋىلدارعا بارىپ, جىلىجايمەن تانىسىپ قايتتىق. قاقاعان قىستا كوكونىس ءوسىرۋ وڭاي شارۋا ەمەس. توپىراق ىلعالىن ۇنەمى قاداعالاپ, ۋاقتىلى قاجەتتى ءمولشەردە جىلۋ بەرمەسەڭ, جەمىستەر سەمىپ قالاتىنى تاعى بار. جىلدىڭ ءتورت مەزگىلىندە جاڭا پىسكەن كوكونىستى تۇتىنۋعا نە جەتسىن. قازىرگى كەزدە مەكتەپ جانىنداعى ينتەرناتتا قياردى جەپ, ءسالدەن كەيىن قىزاناق داستارقان مازىرىنە ەنەدى دەگەن ءۇمىتىمىز بار, – دەيدى مەكتەپ ديرەكتورى اناربەك دۇتباەۆ.
زايسان اۋدانىندا 20 ورتا, ون ورتالاۋ مەكتەپ بار. وتكەن وقۋ جىلىندا بىرىڭعاي ۇلتتىق تەستىلەۋ بويىنشا اۋدان كولەمىندە 85,2 بالل جينادىق. 27 شاكىرتىمىز «التىن بەلگىگە» يە بولدى. وقۋشىلاردىڭ جازعى دەمالىسىن ءماندى دە ءساندى وتكىزۋ باستى نازاردا. بارلىق مەكتەپتەردە قوسالقى شارۋاشىلىقتار قۇرىلعان. جازدا مەكتەپ جانىنداعى اۋلادا كوكونىس وسىرەدى. كەڭساي, ۇلكەن قاراتال اۋىلدارىندا دا جىلىجاي سالۋدى ۇيعارىپ وتىرمىز. بيىل اۋەزوۆ, لومونوسوۆ, امانگەلدى اتىنداعى ورتا, سارجىرا ءجانە جارسۋداعى ورتالاۋ مەكتەپتەرىندە كۇردەلى جوندەۋ جۇمىستارى ءجۇرگىزىلمەك. اۋدان اكىمى سەرىك زاينۋلدين اۋىل مەكتەپتەرىنىڭ جاعدايىمەن جاقسى تانىس. مەكتەپ توبەلەرىن شاتىرلاۋ, جوندەۋ جۇمىستارىنا قارجى تاۋىپ بەرگەلى وتىر. شاكىرتتەرگە تەرەڭ ءبىلىم, سانالى تاربيە بەرۋ الداعى ۋاقىتتا دا جالعاسا بەرمەك, – دەدى اۋداندىق ءبىلىم بەرۋ ءبولىمىنىڭ باستىعى ءسانيا ءابدىعاليەۆا.
جىلىجايدان شىعا بەرىستە سۋ جاڭا «پاز» اۆتوبۋسىن كوردىك. جاڭا كولىكتى اۋدان اكىمى ينتەرنات بالالارىنا بەرىپتى. تەك ءمۇكاراما مەكتەبى ەمەس, باسقا دا ءبىرنەشە اۋدان مەكتەپتەرى وسىنداي كولىكتەرگە يە بولعان. ءمۇكاراما مەكتەبىندە 41 ۇستاز قىزمەت ەتىپ, ءتورت ءجۇز وقۋشىعا ءبىلىم ءنارىن سۋسىنداتۋدا.
وڭداسىن ەلۋباي.
شىعىس قازاقستان وبلىسى, زايسان اۋدانى.
_____________________________________
سۋرەتتەردە: اۋداندىق وقۋ ءبولىمىنىڭ مەڭگەرۋشىسى ءسانيا ادىعاليەۆا, مەكتەپ ديرەكتورى اناربەك دۇتباەۆ, مەحانيزاتور بولات قۇرمانعوجين, جاڭا اۆتوبۋس.