قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ استاناعا رەسمي ساپارمەن كەلگەن ەقىۇ-نىڭ ءىس باسىنداعى توراعاسى – ليتۆا رەسپۋبليكاسىنىڭ سىرتقى ىستەر ءمينيسترى اۋدرونيۋس اجۋباليسپەن كەزدەسىپ, كەلىسسوزدەر جۇرگىزدى. قازاقستاننىڭ جەتەكشى ۇيىمعا توراعالىعىنىڭ ناتيجەسى جانە قازاقستان – ليتۆا ەكىجاقتى ىنتىماقتاستىعى ەلورداداعى كەلىسسوزدەردىڭ وزەگىنە اينالدى.
«مەن اجۋباليس مىرزانىڭ قازاقستانعا كەلگەنىنە وتە قۋانىشتىمىن. ول تەك ءبىزدىڭ ارىپتەسىمىز, ياعني سىرتقى ىستەر ءمينيسترى عانا ەمەس, سونداي-اق, ەقىۇ-نىڭ قازىرگى ءىس باسىنداعى توراعاسى. قازاقستان اتالعان ۇيىمعا توراعا بولعان كەزدەن بۇرىن دا قوس مەملەكەت اراسىندا جاقسى ارىپتەستىك بايلانىس ورناعان بولاتىن. قازاقستان مەن ليتۆا ەقىۇ «ۇشتىگىنە» كىرەدى. سوندىقتان, ءبىز ەكى ەلدىڭ ۇيىم اياسىنداعى بايلانىسىن ودان ءارى دامىتۋ, استانا دەكلاراتسياسىندا نەگىزى قالانىپ ۇلگەرگەن شارالاردى ودان ءارى جۇرگىزۋ باعىتىندا بىرلەسە جۇمىس اتقارۋىمىز قاجەت. وسى رەتتە, ليتۆا مەملەكەتىنە وزىنە جۇكتەلگەن وسىناۋ جوعارى ءارى قيىن ميسسيانى تابىستى اياقتاۋىن تىلەيمىز. ءبىز سىزدەرگە ءاردايىم ءوز تاراپىمىزدان قولداۋ-كومەك كورسەتەمىز. بۇل, ەڭ الدىمەن, بارلىعىمىزعا ورتاق ماقسات-ءمۇددەگە جەتۋگە سەپ بولارى ءسوزسىز. ول ماقسات مىناۋ: ۇيىمدى ودان ءارى نىعايتۋ جانە ونىڭ قازىرگى زامانداعى كۇردەلى ماسەلەلەردىڭ جاۋابىن ىزدەۋىنە جول اشۋ», – دەدى قانات ساۋداباەۆ. مەملەكەتتىك حاتشى – سىرتقى ىستەر ءمينيسترى كەلىسسوز كەزىندە ۇيىم قىزمەتىن جانداندىرۋدا ەۋرواتلانتيكالىق جانە ەۋرازيالىق قاۋىپسىزدىكتىڭ بىرتۇتاستىعى ايرىقشا مانگە يە بولۋى كەرەكتىگىن العا تارتتى. «بۇل ۇيىمنىڭ ماڭىزدى باعىتىنا اينالۋى ءتيىس», – دەدى ق.ساۋداباەۆ.
اۋدرونيۋس اجۋباليس ءوز سوزىندە قازاقستان ەلورداسى – استاناعا وسىمەن 4-ءشى مارتە اتباسىن تىرەپ وتىرعانىن تىلگە تيەك ەتتى. «مەن ءوز ءارىپتەستەرىممەن, ەقىۇ «ۇشتىگى» وكىلدەرىمەن كەزدەسكەنىمنەن ايرىقشا اسەر الىپ وتىرمىن. وسى ورايدا, مىنانى باسا ايتقىم كەلەدى: قازاقستاننىڭ ەقىۇ-عا توراعالىعى جارقىن ءىز قالدىردى. مەن ۇيىمعا مۇشە ەلدەرگە مىندەتتەمە بەلگىلەپ بەرگەن استانا ءسامميتى تۋرالى عانا ايتىپ وتىرعان جوقپىن. ۇيىم قۇرامىنداعى ەلدەر اراسىنداعى دەموكراتيالىق بايلانىستاردىڭ جوعارى ستاندارتىن قالىپتاستىرۋدا دا قازاقستاننىڭ قوسقان ۇلەسى ۇلكەن. بۇل ليتۆا مەملەكەتىنە وسى جۇمىستى ودان ءارى جۇيەلى جۇرگىزۋگە دە ءمۇمكىندىك بەرەدى. وعان قازاقستاننىڭ كومەگى ايرىقشا قاجەت», – دەدى ا. اجۋباليس.
ليتۆا سىرتقى ىستەر ءمينيسترى ءوز كەزەگىندە قازاقستان تۋرالى تاعى ءبىر وڭ پىكىر ءبىلدىردى. ول: «ەلىمىزدىڭ ۇيىمعا جاڭاشا, وڭ سەرپىن بەرگەندىگى» ەكەن. «بۇل ۇيىمنىڭ قايتادان «تۇلەۋىنە» ىقپال ەتكەنىن ايتۋىمىز قاجەت», – دەدى بۇل تۋراسىندا ليتۆا وكىلى.
اڭگىمە بارىسىندا تاراپتار قازاقستان پرەزيدەنتىنىڭ باستاماسىمەن 11 جىلدىق ۇزىلىستەن كەيىن ۇيىمنىڭ جاڭا ەۋرازيالىق ىنتىماقتاستىق ۆەكتورىن ايقىنداپ بەرگەن استانا ءسامميتىنىڭ ناتيجەلەرىن جۇزەگە اسىرۋ, جاڭا سىناقتار مەن قاۋىپتەرگە قارسى تۇرۋدا باتىس پەن شىعىس اراسىنداعى ۇنقاتىسۋدى رەتكە كەلتىرۋ ماسەلەلەرىن تالقىلادى.
ءلايلا ەدىلقىزى.