29 تامىزدا استاناداعى تاۋەلسىزدىك سارايىندا سەمەي يادرولىق سىناق پوليگونىنىڭ جابىلۋىنا 25 جىل تولۋىنا ارنالعان «يادرولىق قارۋسىز الەم قۇرۋ» حالىقارالىق كونفەرەنتسياسى ۇيىمداستىرىلعالى وتىر. فورۋم بۇۇ باس اسسامبلەياسىنىڭ قارارىنا سايكەس جىل سايىن اتالاتىن يادرولىق سىناقتارعا قارسى ءىس-قيمىلدىڭ حالىقارالىق كۇنى اياسىندا وتەدى.
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ كونفەرەنتسيادا سويلەيتىن ءسوزى جيىنعا قاتىسۋشىلار نازارىن اۋداراتىن باستى وقيعا بولماق.
فورۋم بارىسىندا جالپى وتىرىس, سونداي-اق, «بۇۇ جانە قارۋسىزدانۋ ۇدەرىستەرى: كەلەشەگى قانداي؟ «الەم. ءححى عاسىر» مانيفەسى», «يادرولىق تەجەۋدەن باس تارتۋ – حالىقارالىق قاۋىپسىزدىكتىڭ جاڭا سيپاتى», «يادرولىق قارۋدان ازات ايماقتار. ورنىقتى الەمنىڭ گەوگرافياسى», «يادرولىق قارۋسىزدانۋ سالاسىنداعى ازاماتتىق قوعامنىڭ ءرولى» تاقىرىپتارى بويىنشا ءتورت پانەلدىك سەسسيا وتەدى. كونفەرەنتسيانىڭ قوسالقى ۇيىمداستىرۋشىسى پارلامەنتشىلەردىڭ يادرولىق قارۋدى تاراتپاۋ جانە جويۋ جولىنداعى (PNND) حالىقارالىق ۇيىمى بولىپ تابىلادى. فورۋمعا قاتىسۋشىلار يادرولىق قارۋدى قولدانۋ جانە سىناۋ قۇرباندارىن ەسكە الىپ, قارۋسىزدانۋ جانە تاراتپاۋدىڭ وزەكتى ءماسەلەلەرىن قارايدى جانە حالىقارالىق قاۋىپسىزدىكتى نىعايتۋ جونىندەگى ۇسىنىستارىن ورتاعا سالادى دەپ كۇتىلۋدە.
كونفەرەنتسيانى ۇيىمداستىرۋ كوميتەتىنىڭ باسشىسى, سەنات ءتوراعاسى قاسىم-جومارت توقاەۆتىڭ ءپىكىرىنشە, سەمەي پوليگونىنىڭ جابىلۋىنا 25 جىل تولۋى جاھاندىق ماڭىزى بار داتا بولىپ تابىلادى. «قازاقستان پرەزيدەنتى نۇرسۇلتان نازارباەۆ – جاھاندىق يادرولىق قارۋعا قارسى قوزعالىستىڭ كوشباسشىسى بولىپ ءىس جۇزىندە مويىندالعان تۇلعا. ەلباسىنىڭ سەمەي يادرولىق پوليگونىن تولىقتاي جابۋ تۋرالى شەشىمى – الەمدىك قارۋسىزدانۋ تاريحىندا العاشقى جانە سوڭعى مىسال. مەملەكەت باسشىسىنىڭ «الەم. ءححى عاسىر» مانيفەسىنىڭ نەگىزىندە قارۋسىزدانۋ يدەياسى جاتىر. سەمەي پوليگونىنىڭ جابىلۋىنا 25 جىل تولۋى – جەر بەتىندە ورنىقتى الەم قۇرۋدىڭ ءبىرىنشى كەزەكتە ماڭىزدىلىعى جانە قاۋىپسىزدىك پروبلەمالارىنا جاڭا بىرلەسكەن شەشىمدەر ۇسىنۋ تۋرالى بۇكىل الەمدىك قوعامداستىققا ويلانۋدىڭ ەڭ وڭتايلى مۇمكىندىگى», – دەپ اتاپ ءوتتى ق.توقاەۆ.
استانا كونفەرەنتسياسىنا بۇۇ باس حاتشىسىنىڭ ورىنباسارى, بۇۇ جەنەۆا ءبولىمىنىڭ باس ديرەكتورى, قارۋسىزدانۋ جونىندەگى كونفەرەنتسيانىڭ باس حاتشىسى مايكل ميوللەر, يادرولىق سىناققا جالپىعا بىردەي تىيىم سالۋ تۋرالى شارت ۇيىمى دايارلاۋ كوميسسياسىنىڭ اتقارۋشى حاتشىسى لاسسينا زەربو, پارلامەنتارالىق وداقتىڭ پرەزيدەنتى جانە PNND تەڭ توراعاسى سابەر چاۋدحاري, پانافريكا پارلامەنتىنىڭ پرەزيدەنتى رودجەر نكودو دانگ, بولگاريانىڭ ۆيتسە-پرەزيدەنتى مارگاريتا پوپوۆا, مارشالل ارالدارى نيتيدجەلىنىڭ (پارلامەنت) توراعاسى كەنەف كەدي, ەۋروپا كوميسسياسىنىڭ بۇرىنعى پرەزيدەنتى جانە يتاليا پرەمەر-ءمينيسترى بولعان رومانو پرودي, ءيزرايلدىڭ بۇرىنعى پرەمەر-ءمينيسترى ەحۋد باراك, اۆستريانىڭ بۇرىنعى فەدەرالدىق كانتسلەرى الفرەد گۋزەنباۋەر, پولشانىڭ بۇرىنعى پرەزيدەنتى الەكساندر كۆاسنەۆسكي, «نەۆادا-سەمەي» انتييادرولىق قوزعالىسىنىڭ نەگىزىن سالۋشى ولجاس سۇلەيمەنوۆ, باسقا دا حالىقارالىق ۇيىمداردىڭ, ۇكىمەتتىك ەمەس ۇيىمداردىڭ كورنەكتى وكىلدەرى, جالپى العاندا, ەلۋدەن استام ەلدىڭ بەلگىلى ءدىني قايراتكەرلەرى قاتىسادى.
استانا كونفەرەنتسياسىندا قورىتىندى قۇجات قابىلداناتىن بولادى.
ساۋلەبەك ءبىرجان