قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ اۆستريا رەسپۋبليكاسىنىڭ ەۋروپالىق جانە حالىقارالىق ىستەر جونىندەگى فەدەرالدىق ءمينيسترى ميحاەل شپيندەلەگگەرمەن تەلەفون ارقىلى سويلەستى, دەپ حابارلادى ءسىم-ءنىڭ ءباسپاسوز قىزمەتى.
م.شپيندەلەگگەر ەقىۇ-داعى قازاقستان توراعالىعىنىڭ باستى ناتيجەلەرى – ۇيىمنىڭ ءسامميتىن استانادا وتكىزۋى مەن جوعارى دەڭگەيدەگى كەزدەسۋ قورىتىندىسى بويىنشا قابىلدانعان دەكلاراتسيانى ەرەكشە اتاي وتىرىپ, قازاقستاننىڭ جەمىستى توراعالىعىنا جوعارى باعا بەردى.
قازاقستان-اۆستريا ىنتىماقتاستىعىنىڭ وزەكتى ماسەلەلەرى مەن دامۋ بولاشاعىن قاراستىرا وتىرىپ, تاراپتار وتكەن جىلدىڭ جەلتوقسان ايىندا استانادا ءوتكەن پرەزيدەنت ن.نازارباەۆ پەن پرەزيدەنت ح.فيشەردىڭ كەلىسسوزدەرى ەكى ەلدىڭ اراسىنداعى قاتىناستاردىڭ بارلىق كەشەنىنە قۋاتتى كۇش بەردى. اڭگىمەلەسۋشى تاراپتار ىنتىماقتاستىق الەۋەتى تولىقتاي قولدانىلۋى قاجەت ەكەنىن اتاي وتىرىپ, ارىپتەستىكتى ودان ءارى دامىتا بەرۋگە نيەتتەرىن ءبىلدىردى. تاراپتار اۆستريانىڭ ەۋروپالىق جانە حالىقارالىق ىستەر جونىندەگى فەدەرالدى ءمينيسترى م.شپيندەلەگگەردىڭ قازاقستانعا رەسمي ساپارىن مامىر ايىندا وتكىزۋگە كەلىستى.