ءبىز ەلىمىزدىڭ اسپانىندا ۇشىپ جۇرگەن تورعايىمىزدى ماقتاسا دا, ءماز بولىپ قالاتىن حالىقپىز. بۇل كوڭىلدىڭ اقتىعىن, جۇرەكتىڭ تازالىعىن بىلدىرەدى. تەگىندە ماقتاناتىن نارسەگە ماقتانا, قۋاناتىن نارسەگە قۋانا بىلگەنگە نە جەتسىن!
ەلىمىزگە قاتىستى قۋانا جاريا ەتۋگە جارامدى جاقسى حابارلار ءاردايىم بولىپ تۇرادى. سونىڭ ءبىرى – جاقىندا الەمگە ايگىلى Forbes جۋرنالىنىڭ رەسەيلىك بولىمشەسى الماتى تۇبىندەگى شىمبۇلاق شاڭعى كۋرورتىنىڭ الەمدەگى ەڭ تاڭداۋلى توپ-وندىقتى باستاپ تۇرعانداردىڭ ءبىرى ەكەنىن اتاپ كورسەتىپتى. شاڭعى كۋرورتتارىنىڭ رەيتينگىلەرىن انىقتاۋدى RoomGuru.ru ينتەرنات-پورتالىمەن بىرگە جۇرگىزگەن Forbes ماماندارى ولاردى بىرنەشە قىرىنان الىپ قاراستىرعان ەكەن. بۇعان كۋرورتتىڭ ورنالاسقان اۋماعى, تابيعاتىنىڭ جانعا جايلىلىعى, اۋاسىنىڭ تازالىعى, وندا دەمالۋ قۇنى مەن جاسالاتىن سەرۆيستىك قىزمەتى تۇگەل كىرەدى. ءبىر قىزىعى, جاھان جۇرتى بۇگىندە قىسى-جازى جاپا-تارماعاي بارىپ دەمالىپ جاتاتىن الپىدەگى كۋرشەۆەل بۇل وندىقتىڭ تىزىمىندە جوق. ال الماتىنىڭ شىمبۇلاعى توپ توعىسىندا ەكىنشى بولىپ تۇر.
وسىندايدا بۇدان بەس عاسىر بۇرىن ءومىر سۇرگەن نوعايلى-قازاقتىڭ ۇلى جىراۋى دوسپامبەت بابامىزدىڭ «اينالا بۇلاق باسى تەڭ, ازاۋلىنىڭ ىستانبۇلدان نەسى كەم؟» دەپ كەلەتىن تولعامدى تولعاۋى ەرىكسىز ويعا ورالادى. شىنىندا دا شىمبۇلاقتىڭ وزگە جاقتان نەسى كەم؟ اسپانمەن تالاسقان تاۋدىڭ ۇشار باسىندا, تەڭىز دەڭگەيىنەن 2 270 مەتر بيىكتىكتە, تالعار اسۋىنىڭ قيا بوكتەرىندەگى شىمبۇلاق شاتقالىنىڭ قويناۋىندا جاتقان اتىراپتىڭ اۋاسى قانداي ساف, اۋماعى قانداي كوركەم! مۇندا تاۋ شاڭعىسى سپورت كەشەنى اشىلعانىنا دا 60 جىلدان اسىپ كەتىپتى. دالىرەگى, 1954 جىلدىڭ قىسىندا كەلۋشىلەرگە قۇشاعىن ايقارا اشقان شاڭعى تراسساسى سودان بەرى كوپشىلىككە قالتقىسىز قىزمەت ەتىپ كەلە جاتىر. شاتقالداعى ەنى 25 مەترگە تولاتىن جارىس جولىنىڭ شاڭعىشىلار ءۇشىن بارىنشا قولايلى ەكەنىن دە مۇندا كەلگەندەردىڭ ءبارى ايتادى. ماماندار تراسسانىڭ تەحنيكالىق سيپاتتاماسى جاعىنان ەۋروپانىڭ جوعارى دەڭگەيدەگى جارىس جولدارىنىڭ ەشبىرىنەن كەم ەمەس ەكەنىن دە العا تارتادى. مۇنداعى سىرعاناق قارىنىڭ ساپاسى دا جوعارى. وسىلاردىڭ ءناتيجەسىندە شىمبۇلاق شاڭعى جولىندا جوعارى جىلدامدىق كورسەتۋگە ءمۇمكىندىك بەرەدى.
سوڭعى جىلدارى شاتقالعا دەمالۋ ءۇشىن كەلەتىن تۋريستەر سانى دا ارتىپ كەلەدى. ايتالىق, 2010 جىلى بۇلاردىڭ قاتارى نەبارى 12 مىڭ ادام بولسا, كەلەسى جىلى 33 مىڭنان اسىپ تۇسكەن. قازىر 50 مىڭعا جۋىقتايدى. وسىندا كەلۋشىلەر اراسىندا كەزىندە كورشى ەلدەردىڭ پرەزيدەنتتەرى دە, ءارتۇرلى حانزادالار دا بولدى. دەگەنمەن, شاڭعى كۋرورتىنا اتباسىن تىرەۋشىلەردىڭ باسىم بولىگىن ءوز وتانداستارىمىز قۇراپ وتىر. ولار شامامەن 75 پايىزعا تۇراقتالسا, شەتەلدەردەن كەلۋشىلەر 25 پايىزدىڭ ماڭىنان قايىرىلادى. ال كەشەندە قىسقى سپورت تۇرلەرىنە قىزىعۋشىلىق بىلدىرەتىن ادامداردىڭ بارىنە جاقسى جاعداي جاسالعان. مۇندا تەك تاۋ شاڭعى مەكتەبىندە عانا 40-قا جۋىق نۇسقاۋشى جۇمىس ىستەيدى. ولار ءبىر مەزگىلدە 40 اداممەن دەربەس جۇمىستار جۇرگىزە الادى. سونىمەن قاتار, توپتىق ساباقتار تۇرىندە جاتتىعۋلار جاسالاتىن بولسا, بىردەن 200 ادامدى شاڭعى تەبۋگە ۇيرەتۋگە مۇمكىندىك تۋار ەدى.
ايتۋلى كۋرورتتىڭ تاعى ءبىر ەرەكشەلىگى رەتىندە مەدەۋ-شىمبۇلاق اسپالى جولىن ايتۋعا بولادى. تاسىمال قاشىقتىعى جاعىنان ول الەمدە وسىنداي جولداردىڭ اراسىنداعى ءۇشىنشى ورىندى الادى. ونىڭ ارقانىمەن سىرعىپ جۇرەتىن 6 ادامدىق 114 كابيناسى 2 مىڭنان استام جولاۋشىنى 15 مينۋتتا دىتتەگەن قاپتالعا جەتكىزىپ بەرەدى. اسپالى جولدىڭ قاۋىپسىزدىك دەڭگەيى دە جوعارى. ول حالىقارالىق قاۋىپسىزدىك ستاندارتتارىنا تولىق ساي جاسالعان. بۇدان بولەك, كۋرورتتىڭ تاۋ شاڭعى باۋرايلارى شاڭعى سپورتى تۇرلەرىنىڭ حالىقارالىق فەدەراتسياسىنىڭ سەرتيفيكاتىن العان.
ەندى Forbes جۋرنالىنىڭ توپ-وندىعى كوشىن رەسەيدىڭ سوچي وڭىرىندەگى كراسنايا پوليانا كۋرورتىنىڭ باستاپ تۇرعانىن دا ايتا كەتەيىك. وندا جەتى كۇندىك دەمالىس ۋاقىتىنىڭ قۇنى 101,4 مىڭ رۋبلگە تۇسەدى. ال شىمبۇلاق ەكى ادامعا ءبىر اپتالىق جازعى دەمالىس وتكىزۋ ءۇشىن بار-جوعى 39 مىڭ رۋبل الادى ەكەن. ماسكەۋدەن ۇشىپ كەلىپ-قايتاتىن بيلەتتىڭ پ ۇلىن قوسقاندا, بۇل شىعىن 81 مىڭ رۋبلگە بارادى. سول سياقتى بۇل ساپتا شاحداگ (ازەربايجان, 61 مىڭ رۋبل), شەرەگەش (رەسەي, كەمەروۆو وبلىسى, 65,4 مىڭ رۋبل), باكۋرياني (گرۋزيا, 55,6 مىڭ رۋبل), بۋكوۆەل (ۋكراينا, لۆوۆ, 55,3 مىڭ رۋبل), ينسبرۋك (اۆستريا, 141,2 مىڭ رۋبل), لا مولينا (يسپانيا, بارسەلونا, 94 مىڭ رۋبل), بيارريتس (فرانتسيا, 151,8 مىڭ رۋبل), ەنگادين-سانكت-موريتس (شۆەيتساريا, تسيۋريح, 137 مىڭ رۋبل) سەكىلدى تاۋلى كۋرورتتار بار.
سەرىك ءپىرنازار,
«ەگەمەن قازاقستان»
سۋرەتتەردى تۇسىرگەن
دوسجان بالابەك ۇلى