ۇلىبريتانيانىڭ كوۆەنتري قالاسىنداعى ۋوريك ۋنيۆەرسيتەتىنىڭ زەرتتەۋشىلەرى كوكونىس پەن جەمىس-جيدەكتى كوپ جەۋ ادامداردىڭ وزدەرىن باقىتتى سەزىنۋىنە اسەر ەتەتىنىن انىقتادى. كوكونىس پەن جەمىس-جيدەكتى كوپ جەيتىندەر وزدەرىن جاقسى جۇمىس ىستەيتىن, باقۋاتتى ءومىر سۇرەتىن ادامداردان كەم سەزىنبەيدى ەكەن.
زەرتتەۋ كەزىندە كەزدەيسوق 12 مىڭ ادام تاڭداپ الىنىپ, ولاردىڭ كۇن سايىنعى تۇتىناتىن تاعامدارى مەن پسيحولوگيالىق جاعدايلارى تۋرالى كۇندەلىك جۇرگىزىلگەن. 2007, 2009, 20013 جىلدارداعى تاماقتانۋ ءتارتىبى مەن پسيحولوگيالىق احۋالدارى سالىستىرىلعان. ءناتيجەسىندە, ولار كوكونىس پەن جەمىس-جيدەكتى نەعۇرلىم كوبىرەك جەگەن كۇندەرى سوعۇرلىم باقىتتى سەزىنەتىنىن بايقاعان. زەرتتەۋشىلەردىڭ پايىمداۋىنشا, وسىمدىكتەردىڭ قۇرامىنداعى كاروتينويدتار اعزاداعى قىشقىلدى قالپىنا كەلتىرۋگە كومەك-تەسەدى. سايكەسىنشە, گورمون دەڭگەيىنىڭ ارتۋىنا اسەر ەتەدى.
عالىمدار سالاماتتى ءومىر سالتىن ۇستانۋ ءبىر كۇندە ناتيجە بەرە قويمايتىنىن, الايدا ول ادامداردىڭ كوڭىل-كۇيلەرىنىڭ جاقسارۋىنا بىردەن اسەر ەتەتىنىن ايتادى. الداعى ۋاقىتتا ۋوريك ۋنيۆەرسيتەتىنىڭ جاڭالىعى دەنساۋلىق ساقتاۋدا, سالاماتتى ءومىر سالتىن ناسيحاتتاۋدا پايدالانىلماق.
ارنۇر اسقاروۆ,
«ەگەمەن قازاقستان»