ورگە ۇمتىلىپ, كەڭگە تالپىنعان, سونىڭ ناتيجەسىندە ەلىنىڭ ەلەۋلىسىنە اينالعان تۇلعا تۋرالى 17 شىلدەدە اتاپ وتىلەتىن مەتاللۋرگتەر كۇنىنە وراي ءسوز قوزعاۋىمىزدىڭ دا رەتى كەلىپ وتىرعان سىڭايلى. كەيىپكەرىمىز كىم؟ ول – ءتۇستى مەتالداردىڭ «ءتىلىن» بىلەتىن ينجەنەر-مەتاللۋرگ, تەحنيكا عىلىمدارىنىڭ كانديداتى, قازاق كسر جوعارى كەڭەسىنىڭ قۇرمەت گراموتاسىمەن, ەكى مارتە «قۇرمەت بەلگىسى» وردەنىمەن ماراپاتتالعان ارداگەر جولداسبەك سمايلوۆ.
سمايلوۆتار اۋلەتىن مەتاللۋرگتەر اۋلەتى دەگەنىمىز ورىندى. اكەسى دە, بالالارى دا مەتاللۋرگتەر. اكەسى بەكماعامبەتتىڭ مەتالل قۇياتىن تسەحتاعى قايناعان قىزۋ جۇمىسى بالا جولداسبەكتىڭ مەتالل ءتىلىن بىلۋگە دەگەن قۇمارلىعىن ارتتىرىپ, قازاقتىڭ تاۋ-كەن ينستيتۋتىنىڭ ينجەنەر-مەتاللۋرگ ماماندىعىنا تۇسۋىنە سەبەپشى بولسا, ودان ءارى وندىرىستە شىڭدالعان تۇلعا بولىپ قالىپتاسۋىنا زور ىقپالى تيگەنىن ءومىردىڭ ءوزى دالەلدەدى. بۇعان قوسا ءوزىنىڭ ۇلى سەرىك پەن قىزى گۇلنار دا ينجەنەر-مەتاللۋرگ ماماندىعىن تاڭداپ, ەكەۋى دە ءوز سالاسى بويىنشا تەحنيكا عىلىمدارىنىڭ كانديداتى اتاندى. كەلىنى ءمادينا ساۋىققىزى تاكەجانوۆا دا مەتاللۋرگ, ال كىشى قىزى ايگۇل دارىگەر. مىنە, اۋلەتتەن جالعاسقان بۇل عاجاپ قاسيەتتى, ونىڭ ىشىندە ەڭ اۋىر سالانى يگەرۋدە ەلى ءۇشىن قىرۋار ەڭبەك ەتكەن سمايلوۆتار وتباسىن مەتاللۋرگتەر كۇنىندە قالاي كوسىلتىپ جازساق تا لايىق.
كەيىپكەرىمىز ەڭبەككە دەگەن عاجاپ قاسيەتىن جوعارى وقۋ ورنىنان سوڭ 1957 جىلى وسكەمەن قورعاسىن-مىرىش كومبيناتىنىڭ اگلومەراتسيا تسەحىندا قاتارداعى جۇمىسشى بولىپ جۇرگەندە-اق تانىتتى. ارادا جىل وتپەي جاتىپ-اق, بىردەن زاۋىتتىڭ اگلومەراتسيا مەن كەننىڭ بىرىكتىرىلگەن الىپ تسەحىنىڭ اعا ماستەرى بولۋى – سونىڭ دالەلى. ول رافيناتسيا تسەحىنىڭ ۇجىمىن باسقارعاندا ينجەنەرلىك قابىلەتىنىڭ مىعىمدىعىن ودان ارمەن ءجىتى تانىتا ءتۇستى. مۇنىڭ ءبىرىنشى ايعاعى – ونىڭ تازا قورعاسىن الۋعا قاجەتتى جاڭا قازاننىڭ جوباسىن جاساپ, ونى بارناۋل قالاسىندا قۇيدىرىپ اكەلىپ, ىسكە قوستىرۋى. سول جاڭا قازان زاۋىتقا قورعاسىن قورىتۋدى 20 پايىزعا ارتتىرۋعا مۇمكىندىك بەردى.
ج.سمايلوۆتىڭ ونەرتاپقىش ينجەنەر-مەتاللۋرگ ەكەنىنە ودان كەيىنگى ايعاقتار: ونىڭ سول كەزدەگى «چۋشكا» دەپ اتالاتىن سالماعى 41 كيلوگرامدىق قورعاسىن «كىرپىشتى» ەندى بىردەن ءبىر توننا ەتىپ قۇيۋ جانە قورعاسىندى مىستان تازارتۋ ادىستەرى. وسى سوڭعى مىس تازارتۋ ءادىسى كەزىندە وندىرىسكە بىردەن 486 مىڭ سوم تازا پايدا اكەلدى. ىزدەنىمپاز ينجەنەردىڭ بۇل اتالعان ادىستەرىن تاباندا نەمىستەر باستاپ, بۇكىل الەم كەنشىلەرى قابىلداپ الدى. بىردە دىنمۇحاممەد قوناەۆتىڭ وسى ۇجىمعا بارعاندا: «مۇنىڭ ءبارىن ءبىزدىڭ ينجەنەرىمىز سمايلوۆ جولداس ويلاپ تاپقان با؟!» – دەگەن تاڭدانىسىن نەگە ايتپاسقا؟!.
جولداسبەك بەكماعامبەت ۇلىنىڭ تالانتتى ونەرتاپقىش ەكەنىنە جانە ءبىر ايعاق – ونىڭ سول جابدىقتاعى قىزمەت ەتۋ مەرزىمىن ەكى ەسە ۇزارتۋدى قامتاماسىز ەتكەن, اككۋمۋلياتورداعى قورعاسىن قۇرامىنا 0,5-1 پايىز مىشياك قوسۋ جونىندە تاپقان جاڭالىعى. قازىر بۇل ەڭبەكتىڭ ناتيجەسى الەمدەگى اككۋمۋلياتور زاۋىتتارىندا قولدانىلۋدا.
وسىنداي ىرگەلى كومبيناتتا ج.سمايلوۆ راتسيوناليزاتورلىق ىسپەن بەلسەندى اينالىسىپ, جيىرماعا جۋىق اۆتورلىق كۋالىككە يە بولدى. وسىناۋ ايرىقشا جەتىستىكتەرى ءۇشىن «قازاق كسر-ءنىڭ ەڭبەك سىڭىرگەن راتسيوناليزاتورى» دەگەن قۇرمەتتى اتاق بەرىلدى. بۇدان ءارى ءوز سالاسى بويىنشا كانديداتتىعىن قورعادى. ەلۋدەن استام عىلىمي جانە وتىزعا جۋىق عىلىمي-كوپشىلىك ەڭبەكتەرىن جازدى. مۇنىڭ ءبارى دە ءوز زامانىندا باسىلىم بەتتەرىندە جاريالانىپ, ماماندار تاراپىنان جوعارى باعاسىن الدى.
ول ەندى الدىمەن ءوزى جۇمىس ىستەپ جۇرگەن زاۋىتتىڭ كاسىپوداق ۇيىمىنىڭ توراعالىعىنا, كەيىن بۇكىل كومبينات كاسىپوداعى ۇيىمىنىڭ توراعالىعىنا سايلاندى. ودان ءبىراز ۋاقىت وتكەننەن كەيىن ول قازاق كسر ءتۇستى مەتاللۋرگيا مينيسترلىگىنىڭ تەحنيكالىق باسقارماسى باستىعىنىڭ ورىنباسارلىعىنا كوتەرىلىپ, ودان ءارى قازاقستان كومپارتياسى ورتالىق كوميتەتى اۋىر ونەركاسىپ ءبولىمىنىڭ قارا جانە ءتۇستى مەتاللۋرگيا, سونداي-اق, گەولوگيا سەكتورىن باسقاردى. بۇل قىزمەتتە قاجىماس قايرات يەسى, ءبىلىمدار مەتاللۋرگ-ينجەنەر, قارا قىلدى قاق جارار ءادىل ازامات ج.سمايلوۆ – قاراعايلى مەن جەزكەنت كەن-بايىتۋ كومبيناتتارىندا, جەزقازعان, بالقاش, اقشاتاۋ كەن-مەتاللۋرگيا, قاراعاندى مەتاللۋرگيا كومبيناتتارىنىڭ, شىمكەنت, جامبىل فوسفور ءوندىرىس ورىندارىنىڭ, اقتوبە, اقسۋ فەرروبالقىتۋ زاۋىتتارىنىڭ جۇمىسىنداعى كەمشىلىكتەردىڭ بەتىن اشىپ, ولاردى دۇرىس جولعا قويۋعا باسشىلىق جاسادى. قاراعاندى مەتاللۋرگيا كومبيناتىندا الىپ اق قاڭىلتىر تسەحىن ىسكە قوسۋدىڭ باسى-قاسىندا بولدى.
كەڭەستىك كەزەڭدە ونەركاسىپ ءوندىرىسىن باسقارۋدىڭ قانشاما قىر-سىرىن مەڭگەرگەن جولداسبەك بەكماعامبەت ۇلى ەلىمىز تاۋەلسىزدىك العان كەزدە نارىقتىق قاتىناس تالاپتارىنا تەز بەيىمدەلىپ, 1992 جىلى رەسپۋبليكامىزداعى كەن وندىرەتىن زاۋىتتار, كومبيناتتار, باسقا دا كەنىشتەردىڭ باسىن بىرىكتىرىپ «قازاقتۇستىمەتالدار» كونتسەرنىن قۇرىستى. سونىڭ باس ديرەكتورىنىڭ ورىنباسارى بولدى. كەيىن ول كونتسەرندى ءىرى ۇلتتىق كورپوراتسياعا اينالدىرۋعا اتسالىسىپ, ونىڭ ۆيتسە-پرەزيدەنتى قىزمەتىن اتقاردى. بۇگىندە «كازتسينك» اشىق اكتسيونەرلىك قوعامى اتانىپ وتىرعان تاۋەلسىز ەلىمىزدەگى الىپ كاسىپورىندا ينجەنەر-مەتاللۋرگ ج.سمايلوۆتىڭ دا وزىندىك قولتاڭباسى بار.
2007 جىلدان باستاپ مەتاللۋرگيا مينيسترلىگىندە قىزمەت ەتكەن ارداگەرلەردىڭ باسىن قۇراپ «قامقورشى» دەپ اتالاتىن قوعامدىق ۇيىم قۇرعان. 100-گە جۋىق مۇشەسى بار بۇل ۇيىمدى كۇنى كەشەگە دەيىن ءوزى باسقاردى. سونداي-اق, وسى ۇجىمدى قۇرۋعا اتسالىسقان ۆ.پ.سيمونوۆكە, ۆ.ۆ.بەدنوۆقا, ت.ۆ. ستۋدەنتسوۆاعا, ق.باتىرعوجينعا جانە ب.تۇرعانباەۆقا ج.سمايلوۆتىڭ العىسى شەكسىز.
د.قوناەۆ باستاعان تۇلعالاردىڭ تىكەلەي مۇرىندىق بولۋىمەن رەسپۋبليكامىزدا قانشاما ونەركاسىپ وشاقتارى – فابريكا, زاۋىتتار, كومبيناتتار ورنادى. مۇنداعى ماقسات – قازاق جەرىنىڭ ءوز يەسىن – قازاقتاردى ونەركاسىپ وندىرىسىنە جاپپاي تارتىپ, ولاردىڭ وزدەرىنىڭ اراسىنان شەكسىز كەن بايلىعىمىزدى ۇلتتىق قازىناعا اينالدىراتىن ونەركاسىپ ورىندارىن باسقاراتىن جوعارى ءبىلىمدى, بىلىكتى ينجەنەر مامان كادرلار دايارلاپ, جەتىلدىرۋ ەدى. دىتتەگەن ماقسات ورىندالىپ, مەتاللۋرگيا سالاسىن ەۆنەي بوكەتوۆ, ساۋىق تاكەجانوۆ, ءمىنايدار رامازانوۆ, تەمەش سادۋاقاسوۆ, دالاباي ەشپانوۆ, ىرزاباي قوبدابەرگەنوۆ, مۇرات بايبەكوۆ, بايان راقىشەۆ, اقان نۇرسۇلتانوۆ, كەشىرىم بوزتاەۆ جانە ءبىزدىڭ كەيىپكەر جولداسبەك سمايلوۆ مەڭگەردى. بۇل اتالعانداردىڭ ءبارى دە كەيىن ءوز ماماندىقتارىنىڭ مايتالماندارى بولدى. ولاردىڭ قاي-قايسىسى دا قازاقستاننىڭ ونەركاسىپ ءوندىرىسىنىڭ تاسىن ورگە دومالاتتى. سونىڭ ناتيجەسىندە قازاقستاندا عانا بىردەن-ءبىر وداقتىق ءتۇستى مەتاللۋرگيا مينيسترلىگى قۇرىلعان ەدى.
ءبىر كەزدەگى ءبىر اۋلەتتىڭ جالعىز تۇياعى, ال اتا-اناسىنىڭ بار پاك تىلەۋى ءوزىنىڭ ۇستىندە بولعان جولداسبەك اقساقالدان اۋىر وندىرىستەگى جەتىستىكتەرىنىڭ سەبەبىن سۇراعاندا: «اركىم ءوزى شىققان تاۋىم بيىك بولسىن دەگەن ءۇمىت دۇنيەسىنىڭ جەلكەن قايىعىمەن جۇرەدى. مەن ايتار ەدىم, بوس قيالدان گورى ەڭبەگىڭە سەن. تاۋەكەلدىڭ تورەسى سول. تازا ەڭبەگىڭ تاۋعا دا شىعارادى, داۋىلدان دا الىپ وتەدى. ءار كاسىپتىڭ ءوز قيىندىعى مەن قىزىعى بار. اڭگىمە سۇيگەن ىستەن ءسۇيىنىش تابۋدا عوي. مەن قازاقستاننىڭ اسا ءىرى ونەركاسىپ ورنىندا العاشقى ەڭبەك جولىمدى باستاعاندا وسىعان انىق كوز جەتكىزىپ, ومىرلىك قاعيداعا اينالدىردىم», – دەپ ەدى كەڭ ويلاپ, كەڭ پىشەتىن ابىز جۇرەك.
جولداسبەك سمايلوۆ تەك مەتاللۋرگ ەمەس, ونىڭ قالام ۇستايتىن قابىلەتى دە بار. بالا كۇننەن جۇرەگىنە جاقىن دۇنيەلەردى قاعازعا ءتۇسىرىپ, ءتۇرتىپ ءجۇرۋدى ادەتكە اينالدىرعان. تورگە جەتەلەگەن وسىناۋ تىنىمسىز جازبانىڭ جەمىسى بولار زەينەتكەرلىككە شىققاننان سوڭ ايتۋلى ءۇش ەڭبەگىن جازىپ, ءۇش كىتاپ ەتىپ شىعاردى. 2005 جىلى «جۇرەك جىرى, كوڭىل سىرى» اتتى جىر كىتابى, 2008 جانە 2010 (قايتا باسىلعان) جىلدارى «قاراكەسەك شانشار ابىز اۋلەتى» اتتى شەجىرە كىتابى وقىرماندارعا جول تارتتى.
بۇل ەڭبەكتەردى جازعاندا اۆتوردىڭ كوز جانارىنىڭ ءبىرى كورۋدەن قالسا, سوڭعى ەڭبەگىن دايىنداۋ ۇستىندە ەكىنشى جانارىنىڭ دا كورۋى السىرەپ, ءى توپتاعى مۇگەدەكتىك العانىنا قاراماستان, باس رەداكتورى ءھام قۇراستىرۋشىسى بولىپ «قازاقستاننىڭ ءتۇستى مەتاللۋرگياسىنىڭ تاريحى» اتتى 564 بەتتەن تۇراتىن ەنتسيكلوپەديالىق تۇرعىداعى قوماقتى كىتابىن 2011 جىلى جارىققا شىعاردى.
قازاقستان ەكونوميكاسىنىڭ نەگىزىن قالاپ وتىرعان تابيعي بايلىعى – ءتۇستى مەتاللۋرگيانىڭ تاريحىن قامتىعان وسىناۋ تۇڭعىش ەڭبەكتى وسى سالانىڭ ءبىر توپ كاسىبي مامانى ۇلكەن ماراپاتقا لايىقتى دەپ بىلەدى. جالپى, ءتۇستى مەتاللۋرگيا تاريحىن جازۋعا تالپىنعاندار كوپ بولدى, تالاي كىتاپ شىقتى دا. بىراق ولار كوبىنەسە جەكەلەگەن كاسىپورىنداردىڭ تەحنولوگياسىن عانا قامتۋمەن شەكتەلگەن. ال «قازاقستاننىڭ ءتۇستى مەتاللۋرگياسىنىڭ تاريحى» سالماقتى ەڭبەك. سول سالماقتى كوتەرىپ شىعۋ ءۇشىن دە بىلىك, ءبىلىم, پاراسات كەرەك ەمەس پە. جيناقتىڭ تاعى ءبىر ماڭىزدىلىعى – اۆتور وسى سالانىڭ بىلگىر مامانى.
بۇل جيناققا ەلىمىزدەگى ءتۇستى مەتاللۋرگيانىڭ دامۋىن سيپاتتايتىن كوپتەگەن ماتەريالدار مەن فوتوسۋرەتتەر توپتاستىرىلعان. اتالمىش سالانىڭ ءوسىپ-ءونۋى, وسى سالادا تەر توگىپ, قىرۋار ەڭبەك ەتكەن قازاق ينتەلليگەنتسياسى مەن جۇمىسشى تابىنىڭ كورنەكتى وكىلدەرى تۋرالى مول مالىمەتتەر جانە ءوندىرىس وشاقتارىنىڭ كورىنىستەرى مەن پانوراماسى بەرىلگەن. سونداي-اق, رەسپۋبليكامىزدىڭ بارلىق كەن ءوندىرۋ, بايىتۋ جانە مەتاللۋرگيالىق كاسىپورىندارىنىڭ جانە ولاردىڭ نەگىزگى تەحنولوگيالىق ۇدەرىستەرىنىڭ سيپاتتامالارى كەلتىرىلگەن. ولاردىڭ اراسىندا تەك ءىرى الپاۋىتتار عانا ەمەس, كىشىگىرىم كەنىشتەر, بايىتۋ فابريكالارى مەن زاۋىتتارى دا قامتىلادى.
«قازاقستاننىڭ ءتۇستى مەتاللۋرگياسىنىڭ تاريحىنىڭ» ءبىر داناسىن اۆتور جارىققا شىققان كەزدە ەلباسىمىز ن.نازارباەۆقا جولداعان بولاتىن. العاشقى ەڭبەك جولىن مەتاللۋرگيا سالاسىنان باستاعان پرەزيدەنتىمىز بۇل ەڭبەككە لايىقتى باعاسىن بەرىپ, اۆتورعا سول كەزدە جەدەلحات جىبەرىپ, حاتتا: «قۇرمەتتى جولداسبەك سمايلوۆ! ەلباسىمىز ن.ءا.نازارباەۆتى جاڭا جىلىمەن قۇتتىقتاپ, جاقسى تىلەكتەرىڭىزدى ايتىپ, «يستوريا تسۆەتنوي مەتاللۋرگي كازاحستانا» دەپ اتالاتىن كىتابىڭىزدى سىيلاعانىڭىز ءۇشىن كوپ راحمەت! حاتىڭىزبەن جانە كىتابىڭىزبەن تانىسقان پرەزيدەنت سىزگە العىسى مەن ىزگى تىلەكتەرىن جىبەرۋدى تاپسىردى. ءتۇستى مەتاللۋرگيا ءوندىرىسى جونىندە ازدى-كوپتى مالىمەت بەرەتىن بۇل ەڭبەك ءتيىستى ماماندار مەن وسى سالاعا قىزىعۋشىلىق تانىتاتىن وقىرماندار ءۇشىن قۇندى باسىلىم بولادى دەپ سەنەمىز. پرەزيدەنت سىزگە مىقتى دەنساۋلىق, باقىت, شىعارماشىلىق تابىس تىلەيدى. كىتاپ قازاقستان رەسپۋبليكاسى تۇڭعىش پرەزيدەنتىنىڭ مۇراجايى كىتاپحاناسىندا ساقتالاتىن بولادى», – دەپ قازاقستان رەسپۋبليكاسى پرەزيدەنتى كەڭسەسىنىڭ باستىعى م.قاسىمبەكوۆ قول قويعان.
كىتاپتىڭ تۇساۋكەسەرىندە اۆتورعا جۇرەكجاردى پىكىر ايتقانداردىڭ دەنى وسى سالانىڭ مىقتى بىلگىرلەرى بولاتىن. سولاردىڭ ءبىرى توقساننان اسقان, ءتۇستى مەتاللۋرگيانىڭ مايتالمانى, گەولوگ, قازاقستاننىڭ ورتالىق پارتيا كوميتەتىندە 22 جىل قىزمەت اتقارعان يۋ.ل.شنەيدەر كىتاپقا مىناداي باعا بەرەدى: «كىتاپتا قازاقستاننىڭ ءتۇستى مەتاللۋرگيا سالاسىن ورگە كوتەرگەن ءتورت جارىم مىڭ ازاماتتىڭ ەسىمى مەن ءبىر مىڭ جەتى ءجۇز ادامنىڭ كەلبەتى بەرىلگەن. بۇل دەگەنىڭ – ناعىز قايناعان ەڭبەك قوي! ياعني, ناعىز ەڭبەكشىلەردىڭ تاريحى!» – دەپ تاڭدانسا, اكادەميك سۇلتانبەك قوجاحمەتوۆ: «بۇل كىتاپتىڭ جازىلۋ يدەياسىن دا, ونى ىسكە اسىرىپ, كىتاپتى جازعان دا جولداسبەكتىڭ ءوزى. جيناقتىڭ اۆتورى ەلگە تانىمال اقىن دا ەمەس, مايتالمان جازۋشى دا ەمەس. ول – ءتۇستى مەتالداردىڭ «ءتىلىن» بىلەتىن ينجەنەر-مەتاللۋرگ. بۇل از دەسەڭىز, عالىم, قوعام قايراتكەرى. كەشەگى كەڭەستىك داۋىردە پارتيا قىزمەتىندە, باسقا دا سالادا ەڭبەك ەتىپ, ەلىمىزدىڭ قارا جانە ءتۇستى مەتاللۋرگياسىن دامىتۋعا زور ۇلەس قوسقان بىلىكتى مامان رەتىندە تانىلعان ازامات», – دەپ تەبىرەنەدى. شىندىعىندا سولاي عوي. ءوز سالاسىنىڭ بىلگىر تۇلعاسى عانا ەمەس, وسى سالانىڭ تاريحىن تۇتاستاي قامتىعان ەنتسيكلوپەدياعا بەرگىسىز ەڭبەگىن كوزدەن قالىس, كوڭىلدەن تاسا قالدىرماي جەتپىستەن اسقاندا, ونىڭ ۇستىنە باستاعان ۇلكەن ءىسىنىڭ سوڭىنا جەتپەي ەكى جانارى بىردەي وقۋدان قالعان ساتتە اياقتاۋدىڭ قانداي سالماقتىلىعىن ءبىز ەجىكتەمەي-اق, كوزىقاراقتى جان تۇسىنەرى ءسوزسىز.
قازاق مەتاللۋرگياسى سالاسىنىڭ مايتالمان ساردارى جولداسبەك سمايلوۆتىڭ سانالى عۇمىرىندا وسىنداي سىندارلى بيىككە جەتۋى – سوقتىقپالى ءومىر سوقپاعىندا «جارتى قۇرتتى ءبولىپ جەگەن» جان-جارى, ۇلاعاتتى ۇستاز قاماريا عاپپارقىزىنىڭ شەكسىز شاراپاتىنىڭ ارقاسى. ۇزاق جىل عۇمىرلارىن سىيلاستىق پەن سۇيىسپەنشىلىككە بولەگەن جولداسبەك اعامىز بەن قاماريا جەڭگەمىزدىڭ وتاسقاندارىنا الپىس جىلدان استى. ەكەۋى قوعام مۇددەسى جولىنداعى قالتقىسىز قاجىرلى ەڭبەكتەرىمەن بىرگە اقار-شاقار اۋلەت شاڭىراعىنىڭ بەرەكە-بىرلىگىن مازداتىپ, 7 نەمەرە مەن 7 شوبەرە ءسۇيدى. نەمەرەلەرىنىڭ الدى ارمان ەكسپو كورمەسىنىڭ تۇركياداعى كوميسسارى بولسا, التىنايى بىلىكتى بانكير. بار ءومىرىن ءبىلىم بەرۋ سالاسىنا ارناعان ارداگەر ۇستاز قاماريا عاپپارقىزىنىڭ شاكىرتتەرى بۇگىندە ەگەمەن ەلىمىزدى گۇلدەندىرۋ جولىنداعى جاسامپاز ەڭبەككە جۇمىلعان.
ءىسى مەن ءسوزى الشاق كەتپەي, ەكەۋىن قابىستىرعان ابزال اعامىز ءتۇستى مەتاللۋرگياداعى ۇزاق جىلعى ەڭبەگىنە وراي, تاياۋدا ءتول مەرەكەسى قارساڭىندا «ەرەن ەڭبەگى ءۇشىن» مەدالىمەن ماراپاتتالدى.
قىزجىبەك باكىر
الماتى