وسپادارلىق دەپ وسىنى ايتادى

پوليتسيا قىزمەتكەرىنە اسىراندى توبەتتى ايتاقتاعانى نەسى؟! جاقىندا جەزقازعان قالاسىندا ءۇش پوليتسيا قىزمەتكەرى قوعامدىق ورىننىڭ شىرقىن بۇزعانى ءۇشىن ەكى جۇمىسسىز ەركەكتى تارتىپكە شاقىرعان. ءتارتىپ ساقشىلارى بالا-شاعانىڭ كوزىنشە اراق ءىشىپ, بالاعات ءسوز ايتىپ وتىرعان ەكەۋىنىڭ ۇستىنەن اكىمشىلىك حاتتاما تولتىرا باستايدى. مىنە, سول كەزدە الگى ەكەۋدىڭ ءبىرى پوليتسيا قىزمەتكەرلەرىنە روتۆەيلەر تۇقىمدى تايىنشاداي توبەتتى ايتاقتاپ قوسقان. ەگەر دە ءتارتىپ ساقشىسىنىڭ ءبىرى تاپانشاسىن سۋىرىپ الىپ وق اتپاعاندا, قاباعان ءيتتىڭ قانداي ءىس قىلارى  ءبىر قۇدايعا عانا ايان ەدى. البەتتە, قورقىتۋ ءۇشىن اتقان وقتان يت زارداپ شەككەن جوق. ەسەسىنە, ءيتتى ايتاقتاپ قوسقان يەسىنىڭ ەندى باسىنا قارا بۇلت ۇيىرىلەرى ءسوزسىز. قازىرگى تاڭدا ونىڭ ۇستىنەن قىلمىستىق كودەكسىنىڭ 379-بابىنىڭ 1-تارماقشاسى بويىنشا («بيلىك وكىلىنە باعىنباۋ») قىلمىستىق ءىس قوزعالدى. ەگەر دە كۇدىكتىنىڭ كىناسى دالەلدەنەر بولسا, وندا وعان 100 ايلىق ەسەپتىك كورسەتكىشكە دەيىنگى مولشەردە ايىپپۇل سالىنادى, نە ول 120 ساعاتقا دەيىنگى مەرزىمگە قوعامدىق جۇمىستارعا تارتىلادى, بولماسا 45 تاۋلىككە دەيىنگى مەرزىمگە قاماققا الۋعا جازالانادى. قايرات ءابىلدينوۆ, «ەگەمەن قازاقستان»