مەملەكەتتىك قىزمەت ىستەرى مينيسترىنىڭ №104 بۇيرىعىمەن «ب» كورپۋسىنىڭ اكىمشىلىك مەملەكەتتىك لاۋازىمىنا ورنالاسۋعا كونكۋرس وتكىزۋ ەرەجەلەرىنە وزگەرىستەر ەنگىزىلدى.
بۇل وزگەرىستەر ءبىرىنشى ينستيتۋتتىق رەفورمانى جۇزەگە اسىرۋ جونىندەگى ۆەدومستۆوارالىق جۇمىس توبىنىڭ وتىرىسىندا ماقۇلداندى. ولار كونكۋرستىق كوميسسيالاردىڭ جۇمىسىن جەتىلدىرۋگە, سونداي-اق, كونكۋرس وتكىزۋ مەرزىمدەرىن وڭتايلاندىرۋعا باعىتتالعان.
ەنگىزىلگەن تۇزەتۋلەرگە سايكەس, ورتالىق مەملەكەتتىك ورگانداردى قوسپاعاندا, مەملەكەتتىك ورگاندارعا كونكۋرستىق كوميسسيالار قۇرۋعا رۇقسات بەرىلەدى. ونىڭ قۇرامىنا كەمىندە بەس ادام تارتىلۋى مۇمكىن. بۇل جاڭالىق اۋداندىق جانە اۋىلدىق دەڭگەيدەگى مەملەكەتتىك ورگانداردا قۇرىلىمدىق بولىمشەلەردىڭ جەتكىلىكسىزدىگىنىڭ سالدارىنان تۋىندايتىن كونكۋرستىق كوميسسيا قۇرۋ ماسەلەسىن شەشۋگە مۇمكىندىك بەرەدى.
سونىمەن بىرگە, مەملەكەتتىك اپپاراتتىڭ ۇزدىكسىز جۇمىسىن جانە بوس لاۋازىمداردىڭ ورنىن ۋاقتىلى الماستىرۋ ماقساتىندا قۇجات قابىلداۋ مەرزىمدەرى: ىشكى كونكۋرس وتكىزۋ كەزىندە – 5 جۇمىس كۇنىنەن 3 جۇمىس كۇنىنە دەيىن, جالپى كونكۋرس كەزىندە – 10 جۇمىس كۇنىنەن 7 جۇمىس كۇنىنە دەيىن قىسقارتىلدى. ىشكى جانە جالپى كونكۋرستارعا قاتىساتىن ۇمىتكەرلەردىڭ اڭگىمەلەسۋدەن ءوتۋ مەرزىمى دە سايكەسىنشە 5 جۇمىس كۇنىنەن 3 جۇمىس كۇنىنە دەيىن قىسقارتىلدى. ناتيجەسىندە, كونكۋرستىڭ بارلىق ءۇش كەزەڭىن وتكىزۋ مەرزىمدەرى جالپى 13 جۇمىس كۇنىنە ازاياتىن بولدى.
ەسكە سالا كەتەيىك, مەرزىمدەردى قىسقارتۋ ماسەلەسى ۇستىمىزدەگى جىلدىڭ 8 ماۋسىمىندا وتكەن ءمينيستردىڭ حالىقپەن ەسەپتىك كەزدەسۋىندە كوتەرىلگەن ەدى.
«ەگەمەن-اقپارات»