ۇيىنە كەلگەن قوناعىنا قوراداعى جالعىز قويىن سويىپ, اتى شارشاسا, ءوزىنىڭ تىڭ اتىن مىنگىزىپ جىبەرەتىن قازاقتا ساقىلار كوپ بولعان. مۇنىڭ ءتۇبى قوناقجايلىقتان بولەك, مەيىرىمدىلىك, ىزگىلىك.
حالقىمىزدىڭ وسىنداي تاماشا قاسيەتتەرى ەل ەرتەڭى بالالاردىڭ بويىنان دا تابىلىپ جاتقاندىعى قۋانتادى. شىمكەنتتەگى «ميراس» ۋنيۆەرسيتەتى ۇيىمداستىرعان فوتوكونكۋرستا 50 مىڭ تەڭگە جەڭىپ العان وقۋشىلار بۇل اقشانى پايدالى ىسكە جاراتۋدى كوزدەپتى.
قالادا تاعدىرى قيىن وقۋشىلاردى بەيىمدەلۋدەن وتكىزەتىن ورتالىق بار. اتا-انا قامقورلىعىنسىز قالعان, بۇزىقتىعىمەن, ادەپسىز قىلىعىمەن قولعا تۇسكەن بالالار وسىندا اكەلىنىپ, تۋعان-تۋىستارى ىزدەمەگەن جاعدايدا كىشىلەرى بالالار ۇيىنە وتكىزىلىپ, جاسوسپىرىمدەرى ارناۋلى وقۋ ورىندارىنا جىبەرىلەدى.
ورتالىق باسشىلارىمەن ءتىلدەسكەن وقۋشىلار وسىنداعى بالالارعا نەگىزىنەن ىشكى كيىم, گيگيەنالىق جابدىقتار مەن جازعى جەڭىل زاتتار كەرەك ەكەنىن بىلگەن. 27 بالاعا وسىنداي سىيلىقتارىمەن قوسا, ءتاتتى-ءدامدى تاعامدار اپارعان وقۋشىلار ولارمەن ءبىر كەش بىرگە بولدى. جاقىنىنداي باۋىرلارىنا تارتتى. وزدەرىندەي بالالاردىڭ ارەكەتى ورتالىقتاعى جاسوسپىرىمدەرگە وي سالعانى انىق. ولار الداعى ۋاقىتتاردا دا جۇزدەسىپ تۇراتىن بولىپ كەلىستى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى