قازاقستاننىڭ بۇۇ قاۋىپسىزدىك كەڭەسىنە سايلانۋى – بۇل ەلىمىزدىڭ, ءبىرىنشى كەزەكتە, ەلباسى نۇرسۇلتان نازارباەۆتىڭ حالىقارالىق ارەناداعى ەڭبەگىنىڭ الەمدىك قوعامداستىق تاراپىنان مويىندالۋىنىڭ جارقىن كورىنىسى. بۇل تۋرالى داۋىس بەرۋ قورىتىندىلارى بويىنشا قازاقستاننىڭ ازيا-تىنىق مۇحيت مەملەكەتتەر توبىنان بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋىنا قاتىستى پارلامەنت ءماجىلىسىنىڭ توراعاسى نۇرلان نىعماتۋلين مالىمدەدى.
ن.نىعماتۋلين قازاقستان پرەزيدەنتىنىڭ يادرولىق قارۋسىزدانۋ مەن وركەنيەتارالىق ۇنقاتىسۋ, سونداي-اق, وڭىرلىك جانە جاھاندىق قاۋىپسىزدىكتى قامتاماسىز ەتۋ ىسىنە قوسقان وراسان زور ۇلەسى ەلىمىزدىڭ حالىقارالىق ارەناداعى كەزەكتى جەڭىسىن قامتاماسىز ەتكەنىن اتاپ كورسەتتى.
بۇگىندە بۇكىل الەم قازاقستاننىڭ الەم تانىعان كوشباسشى نۇرسۇلتان ءابىش ۇلى نازارباەۆتىڭ باسشىلىعىمەن تاۋەلسىزدىكتىڭ 25 جىلىندا قول جەتكىزگەن تاماشا جەڭىستىكتەرىنە ءتانتى بولۋدا. قازىرگى تاڭدا ەلىمىز ورنىقتى نارىقتىق ەكونوميكانى دامىتىپ, ادىلەتتى الەۋمەتتىك ساياسات جۇرگىزىپ وتىر جانە دەموكراتيالىق ساياسي جۇيە قالىپتاستىرعان, دەپ اتاپ ءوتتى پارلامەنت ءماجىلىسىنىڭ توراعاسى.
قازاقستاننىڭ كانديداتۋراسىن داۋىس بەرۋگە قاتىسقان بۇۇ-عا مۇشە 193 مەملەكەتتىڭ 138-ءى قولدادى. ءسويتىپ, قازاقستان جارعىسى بويىنشا جاھاندىق بەيبىتشىلىك پەن قاۋىپسىزدىكتى قولداۋعا وكىلەتتىلىك سەنىپ تاپسىرىلاتىن بۇۇ-نىڭ اسا ماڭىزدى ساياسي ورگانى قۇرامىنا سايلانعان ورتالىق ازياداعى تۇڭعىش مەملەكەت اتاندى.
بۇۇ قاۋىپسىزدىك كەڭەسىنە بەس تۇراقتى ەمەس مۇشەنى سايلاۋ بۇۇ باس اسسامبلەياسىندا جۇزەگە استى. قازاقستان وسى ۇيىمنىڭ 2017-2018 جىلدارداعى تۇراقتى ەمەس مۇشەسى بولدى.