قازاقستاننىڭ ءوز ەگەمەندىگىن الىپ, تاۋەلسىز ەل بولعانىنا بيىل شيرەك عاسىر تولادى. وسى 25 جىل ىشىندە ەلباسى اتامەكەنىمىزدى التى قۇرلىققا تانىتىپ, ەكونوميكامىزدى دامىتتى. شىنىن ايتۋىمىز كەرەك, قازاقستان الەمگە ەڭ الدىمەن بىرلىگى بەكىگەن, ىنتىماعى جاراسقان, حالقى بەيبىتشىلىكتى قالايتىن, پرەزيدەنتتىڭ سارابدال ساياساتىنىڭ ارقاسىندا وركەندەپ كەلە جاتقان جاس مەملەكەت رەتىندە تانىلدى. بۇل ءسوزىمنىڭ تاعى ءبىر دالەلى بولسىن, كۇنى كەشە عانا ەلىمىزدىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانىپ, ابىرويىمىزدى جانە ءبىر مارتە اسىرا ءتۇستى. البەتتە, مۇنىڭ ءوزى پرەزيدەنتىمىز نۇرسۇلتان نازارباەۆتىڭ تاۋەلسىزدىك جىلدارىنان بەرى قازاقستاننىڭ وركەندەۋى جولىندا توككەن تەرى مەن سىندارلى ساياساتىنىڭ جەمىسى.
باق وكىلدەرى تاراتقان مالىمەتتەرگە سۇيەنسەك, ەلىمىز اتالعان مۇشەلىككە قابىلدانۋى ءۇشىن 138 داۋىستىڭ 129-ىن العان. تاعى ءبىر دەرەك كوزدەرى قازاقستان مۇندا وزىمەن باسەكەگە تۇسكەن تايلاندتى ىعىستىرىپ شىعارعانىن جەتكىزەدى. مىنە, وسىعان قاراپ-اق ەلىمىز سىرتقى ساياساتىنىڭ قانشالىقتى قۋاتقا يە ەكەنىن بىلۋگە بولادى.
قازاقستان حالقى قازىر شىن نيەتپەن قۋانىپ جاتىر. الەمدە ەڭ بەدەلدى ۇيىم سانالاتىن بۇۇ ءبىرىنشى كەزەكتە بەيبىتشىلىكتى جاقتايدى. ءاربىر ەلدەگى ساياسي تۇراقتىلىقتى, دوستاستىقتى, تاتۋلىقتى باعالايدى. وسى رەتتە قازاقستان – جەر شارىندا يادرولىق قارۋدان باس تارتقان ءبىرىنشى مەملەكەت. بيىلعى جىلدىڭ باسىندا ەلباسى اقش-تا وتكەن الەم ليدەرلەرىنىڭ كەڭەسىندە بارشا حالىقتى بەيبىت ءومىر سۇرۋگە شاقىرىپ, تاتۋلىقتى تۋ ەتۋ كەرەكتىگىن ايتقان بولاتىن. پرەزيدەنتتىڭ مانيفيسىندە قامتىلعان وي, كەلەلى پىكىر كوپتىڭ كوڭىلىنەن شىقتى. سول سياقتى مەملەكەت باسشىسىنىڭ كورەگەن كوشباسشىلىعى مەن ساليقالى ساياساتىنىڭ ناتيجەسى قازاقستاندى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىنا زور ىقپال ەتتى.
بۇگىندە ت.جۇرگەنوۆ اتىنداعى ونەر اكادەمياسىنىڭ ۇجىمى ەلباسىنىڭ ءاربىر جولداۋى مەن ماڭىزدى رەفورماسىن قولداپ, جاستارعا كەڭىنەن ناسيحاتتاۋ جولىندا جۇمىس جاساپ كەلەدى. ءوز كەزەگىندە ءبىز دە كەشەگى تاريحي وقيعانى شاكىرتتەرگە جان-جاقتى اڭگىمەلەپ, ماڭىزدىلىعى جايىندا ايتاتىن بولامىز.
«قازاقستاننىڭ بولاشاعى جاستاردىڭ قولىندا. وسكەلەڭ ۇرپاق تەرەڭ ءبىلىم الىپ, سانالى تاربيەمەن سۋسىنداۋى كەرەك. ول ءۇشىن مەملەكەت جاستارعا بارلىق جاعداي جاساپ كەلەدى», – دەگەن ەلباسىنىڭ ءسوزىن ۇنەمى جادىمىزدا ۇستاپ, ەلدىڭ دامۋىنا سۇبەلى ۇلەس قوسىپ وتىرعانىمىزدى سەنىممەن ايتا الامىن.
تاريحتى تۇگەندەپ, وتكەنگە كوز سالساق, قازاقستان ءتۇرلى ساياسي ۇيىمدارعا مۇشە بولىپ, ارقا تورىندە كەلەلى جيىندار وتكىزىپ, وزەكتى پروبلەمالاردى تارقاتىپ وتىرادى. ءبىر عانا مىسال, ەلوردادا جىل سايىن ءتۇرلى ءدىن وكىلدەرىنىڭ قاتىسۋىمەن دىندەر سەزى ءوتىپ تۇرادى. مۇنىڭ ءوزى ەلباسىمىزدان باستاپ قازاقستاندىقتاردىڭ دىنگە قۇرمەتپەن قارايتىنىن اڭعارتادى. ءسوزىمنىڭ سوڭىندا نۇرسۇلتان نازارباەۆ سىندى دانا پرەزيدەنتى بار ءبىزدىڭ باقىتتى ەل ەكەنىمىزدى ايتقىم كەلەدى. وسى ورايدا ەلباسىنىڭ «قايتسەم وتانىمدى وركەندەتىپ, قالاي دامىتامىن» دەپ ايتىپ جۇرگەن ءسوزىن جۇرەكپەن تۇسىنەيىك. بىرلىگىمىزدى باعالاپ, تاتۋلىعىمىزدى جوعالتپايىق. تاۋەلسىزدىكتىڭ 25 جىلدىعىمەن تۇسپا-تۇس كەلگەن بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋ ەرتەڭگى تاريح, كەلەشەك ۇرپاقتىڭ جولىنا جاسالعان جەتىستىك بولىپ تابىلادى.
بيبىگۇل ءنۇسىپجانوۆا,
ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى