اتى اڭىزعا اينالعان كاتارينا ۆيتت سىندى سپورت سۇلۋىنىڭ اقپاننىڭ العاشقى كۇنى مەدەۋ مۇز ايدىنىنا كەلۋى دوپتى حوككەيدەن ءوتىپ جاتقان ازياداعا قاتىسۋشىلار ءۇشىن توسىن سىي بولدى. بۇل كۇنى قازاقستان, موڭعوليا, قىرعىزستان ويىنشىلارى جوسپارداعى ءوز جاتتىعۋلارىن ءوتكىزىپ جاتقان بولاتىن. وتكەن كۇننىڭ اتى اڭىزعا اينالعان مانەرلەپ سىرعاناۋشىسى كاتارينا ۆيتتىڭ كەلۋى – كۇننىڭ باستى وقيعاسىنا اينالدى. ول مۇز ايدىنىندا فوتوسەسسيا وتكىزىپ, سۇحبات بەردى. تانىمال ءمانەرلەپ سىرعاناۋشى ءوزىن قاراپايىم جانە ەركىن ۇستاپ, ءبارىن ءتانتى ەتتى.
– كوركىڭىزدىڭ ادەمى قۇپياسى نەدە؟
– بۇل مۇز ايدىنىنىڭ ارقاسى! فيتنەس جاتتىعۋلارىن دا ۇمىتپاۋ كەرەك, – دەدى.
الەمنىڭ ءتورت دۇركىن, ەۋروپانىڭ التى دۇركىن چەمپيونى كاتارينا ۆيتت قازىر 2018 جىلى قىسقى ازيا ويىندارىن وتكىزۋدەن ۇمىتكەر ميۋنحەن قالاسىنىڭ ءوتىنىم كوميتەتىن باسقارادى.
– كاتارينا, ازيادا-2011 ءسىز ءۇشىن نەسىمەن ەستە قالماق؟
– مەن بۇكىل الەمدە ونىڭ ىشىندە ازيانىڭ دا قىسقى سپورت تۇرلەرىنە قىزىعۋشىلىق تانىتىپ جاتقانىنا قۋانىشتىمىن. استانادا وتكەن ازيا ويىندارىنىڭ اشىلۋ راسىمىنە قاتىستىم. اشىلۋ سالتاناتى ماعان وتە ۇنادى. ازيادانىڭ ۇيىمداستىرۋ شارالارىنىڭ ءوزى – ايتارى جوق, وتە جوعارى دەڭگەيدە. «استانا-ارەنا» ستاديونى تاڭداندىردى.
ال بىزدە – ميۋنحەندە دە سپورتتىق نىساندار جەتكىلىكتى جانە ءبىز 2018 جىلى وليمپيادا وتكىزۋگە دايىنبىز. سوڭعى ۋاقىتتا بىزدە اسىرەسە, قىسقى سپورت تۇرلەرى بويىنشا جارىستار ءجيى وتۋدە.
– مانەرلەپ سىرعاناۋدا ازيادان شىققان ايدىن ارۋلارىنىڭ دەڭگەيىن قالاي باعالاعان بولار ەدىڭىز؟
– ازياداعى مانەرلەپ سىرعاناۋشىلاردىڭ دەڭگەيى ايتارلىقتاي ءوستى. وليمپيادا جارىستارى مەن الەم چەمپيوناتتارىندا جوعارى حالىقارالىق دەڭگەيدەگى ءجۇلدەلى ورىندار ءۇشىن تالاسا الاتىن سپورتشىلار از ەمەس. جاپونيا, قىتاي جانە وڭتۇستىك كورەيا سياقتى ەلدەردى ەرەكشە اتاپ وتۋگە بولادى.
– جاتتىقتىرۋشىلىقپەن اينالىسپاي جۇرگەنىڭىزدىڭ سىرى نەدە؟
– وعان ۋاقىت جوق. «ميۋنحەن – 2018» ءوتىنىم كوميتەتىنەن ءبولەك, اينالىساتىن قوعامدىق جۇمىستارىم جەتكىلىكتى.
ايناش ەسالي.
الماتى.