كارى تۇبەكتەگى «بولاشاق» مەملەكەتارالىق ءتۇيىسۋ ستانساسىندا ءوتكەن جىلمەن سالىستىرعاندا جۇك تاسىمالى ارتىپتى. بۇل جونىندە ستانسانىڭ باستىعى جاراس جولاەۆ ايتتى.
ماماننىڭ سوزىنە يلانساق, بيىلعى جىلى شەكارالىق ستانسادان يران, اۋعانستان باعدارىنا استىق ونىمدەرىن كوبىرەك وتكىزۋ بايقالادى. «بيىلعى جىلعى بەس ايدا يران مەن اۋعانستانعا بولاشاق شەكارالىق وتكەلى ارقىلى 74 مىڭ توننا استىق ءونىمدەرى وتكىزىلدى. بۇل وتكەن جىلدىڭ ءسايكەس كەزەڭىمەن سالىستىرعاندا ايتارلىقتاي كوپ», دەدى ج.جولاەۆ.
يران قازاقستان استىعىن تۇتىناتىن ەڭ ءۇلكەن ەلدەردىڭ قاتارىندا. بۇگىنگى تاڭدا, «ازىق-ءتۇلىك كورپوراتسياسى» ساۋدا نارىعى قۇرىلىمىنىڭ 60 پايىزىن ەكسپورتتىق جۇكتەر الادى. مۇنىڭ ءىشىندە استىقتى سىرتقا شىعارۋ دەڭگەيى جوعارى. بۇعان كاسپي تەڭىزى جاعالاۋىنداعى اقتاۋ پورتى مەن ءامىراباد پورتىنداعى جەكەمەنشىك استىق تەرمينالدارى ساپالى قىزمەت كورسەتۋدە.
وعان قوسا, يرانعا ەكسپورتقا تاۋار شىعارۋ تەڭىز جولدارىنا بالامالى نەگىزدە قازاقستان – تۇرىكمەنستان – يران تەمىرجول تەلىمىمەن دە تاسىمالدانۋدا.
نۇرباي ەلمۇراتوۆ,
«ەگەمەن قازاقستان»