«ءشوپ تامىرى» – جاپونيانىڭ پوليگوننان زارداپ شەككەندەرگە ارنالعان قايىرىمدىلىق جوباسى. وسىعان وراي سەمەيدەگى №29 مەكتەپكە جاپونياىڭ قازاقستانداعى توتەنشە جانە وكىلەتتى ەلشىسى يتيرو كاۆاباتامەن كەزدەسۋ ءوتتى. ەلشىنى مەكتەپتە سەمەي قالاسى اكىمىنىڭ ورىنباسارى نادەجدا شاروۆا قارسى الىپ, ىزگى تىلەگىن جەتكىزدى.
ەلىمىز تاۋەلسىزدىك العاننان بەرى جاپونيامەن جاقسى قارىم-قاتىناس ورناتىپ, ءتۇرلى باعىتتا بىرلەسە جۇمىس اتقارىپ كەلەدى. سەمەيدى حيروسيمامەن جانە ناگاساكيمەن وزىندىك ۇقساس تاريحى بايلانىستىراتىنى بارشاعا بەلگىلى. ال جاپونيانىڭ وزىق جوبالارى قالاداعى بىرقاتار الەۋمەتتىك ماسەلەلەردى شەشۋگە وڭ ىقپالىن تيگىزۋدە. وسى سەبەپتى ن.شاروۆا جاپونيا تاراپىنا بۇكىل سەمەيلىكتەر اتىنان ريزاشىلىعىن ءبىلدىردى.
ي.كاۆاباتا ءوزىنىڭ جۇرەكجاردى لەبىزىن ايتتى: «ءشوپ تامىرى» – الەمدەگى ادامزات قاۋىپسىزدىگىن قامتاماسىز ەتۋگە لايىقتالعان, شاعىن كولەمدەگى قارجىسى قايتارىمسىز الەۋمەتتىك باعدارلاما. بۇل حالىقتىڭ الەۋمەتتىك-ەكونوميكالىق دامۋىنا تىكەلەي ىقپال ەتەتىن جوبالاردى قولداۋعا باعىتتالعان. جوبا ارقىلى سەمەيدە دە بىرقاتار جۇمىس اتقارىلدى. مىنە, كۇردەلى جوندەۋ جۇمىستارىنان كەيىن مەكتەپتە قىستىڭ كۇندەرى جىلى بولاتىندىعىن ايتىپ اتا-انالار, ۇستازدار قۋانىپ جاتىر. جاس ۇرپاقتىڭ ءبىلىم الۋىنا ەشقانداي كەدەرگىلەر تۋىنداماۋى ءتيىس. قىمباتتى وقۋشىلار! ەندى سىزدەر ساباقتارىڭىزدى جاقسى وقىپ, كەلەشەكتە ءوز ەلدەرىڭىزدىڭ ءبىلىمدى ازاماتى بولىپ شىعىڭىزدار», – دەدى ەلشى ءوزىنىڭ سوزىندە.
وسىلاي دەگەن ي.كاۆاباتا №29 مەكتەپ وقۋشىلارىنا جاپونيا جايلى جازىلعان بىرنەشە جۋرنالدى سىيعا تارتتى. ال مەكتەپ ديرەكتورى گ.تولەۋباەۆا جاپونيا حالقىنا پەداگوگيكالىق ۇجىم اتىنان مەكتەپ بەينەلەنگەن البوم سىيلادى. جوعارى سىنىپ وقۋشىلارى مەكتەپتىڭ جۇمىسى جايلى ءۇش تىلدە اڭگىمەلەپ بەردى.
بۇدان كەيىن جاپونيا ەلشىسى جوبانىڭ ءبىلىم وشاعىندا جۇزەگە اسىرىلۋى بارىسىمەن تانىستى. 1997 جىلدان بەرى «ءشوپ تامىرى» بويىنشا ەلىمىزدە ءتۇرلى سالانى قامتيتىن 80-گە تارتا جۇمىس اتقارىلىپتى. ونىڭ 12-ءسى سەمەيدە قولعا الىندى دەسەك, ءبىرى وسى №29 ورتا مەكتەپتە جۇزەگە اسىرىلىپ وتىر ەكەن.
جيىن سوڭىندا قۇرمەتتى قوناق ءۇشىن ءار تىلدە اندەر ورىندالىپ, بيلەر بيلەندى, كۇيلەر شەرتىلدى. ي.كاۆاباتا مەكتەپ اۋلاسىنا ەستەلىك رەتىندە پيراميدالىق تەرەك وتىرعىزدى. مەكتەپ ىشىنە ەكسكۋرسيا جاساۋ بارىسىندا باستاۋىش سىنىپ وقۋشىلارى وعان كيەلى ساكۋرا بۇتاعىن سىيلادى.
راۋشان نۇعمانبەكوۆا
سەمەي