مامىر ايىنىڭ سوڭىندا اقتوبە قالاسىنىڭ 147 جىلدىعىنا وراي ءاليا مولداعۇلوۆا داڭعىلىنداعى №56 «د» ۇيدە «چەمپيون» اۋلا كلۋبى اشىلدى. اۋلا كلۋبىنىڭ اشىلۋ سالتاناتىنا وبلىس اكىمى بەردىبەك ساپارباەۆ جانە وسى ءۇيدىڭ تۇرعىندارى قاتىستى.
اۋلا كلۋبىنىڭ سالتاناتتى اشىلۋىنا بۇعان دەيىن اشىلعان «باتىس-2» اۋلا كلۋبىنىڭ «تولقىن» بي توبىنىڭ جاس بيشىلەرى بيدەن شاشۋ شاشتى, اقتوبە بايلانىس جانە ەلەكتروتەحنيكا كوللەدجىنىڭ اسكەري دايىندىق ءپانىنىڭ مۇعالىمى المات جۇماشەۆ جەتەكشىلىك ەتەتىن «ۇلان» اسكەري-پاتريوتتىق كلۋبىنىڭ جاس جاۋىنگەرلەرى ءاسكەري جاتتىعۋلاردان ونەر كورسەتتى.
– ءبىزدىڭ نەگىزگى ماقساتىمىز – وسكەلەڭ ۇرپاقتىڭ دامۋىنا, ءتالىمدى تاربيە الۋىنا ۇلەس قوسۋ. جاستار بولاشاقتا مەملەكەت قامقورلىعىنا ەلدىڭ دامۋى مەن گۇلدەنۋى ءۇشىن ءوز ۇلەسىن قوسۋ ارقىلى جاۋاپ قاتاتىنىنا سەنەمىن. مەملەكەت باسشىسى نۇرسۇلتان نازارباەۆ وسكەلەڭ ۇرپاقتىڭ دامۋىنا ەرەكشە نازار اۋدارىپ كەلەدى. سونىڭ ناتيجەسىندە جاستاردىڭ بوس ۋاقىتىن وتكىزۋگە ارنالعان, الەۋەتىن اشۋعا ءمۇمكىندىك بەرەتىن اۋلا كلۋبتارى مەن وزگە دە الەۋمەتتىك نىساندار سالىنۋدا. بۇل اۋلا كلۋبى مەملەكەت پەن كاسىپكەرلىكتىڭ سەرىكتەستىگى ارقاسىندا سالىندى. ءبىز كاسىپكەرلەردەن كوپقاباتتى تۇرعىن ۇيلەردىڭ ءبىرىنشى قاباتىن سپورتقا, مەديتسيناعا, پوليتسياعا بەرۋگە ۇسىنىس جاساعانبىز. مىنە, بۇگىنگى اۋلا كلۋبى سونىڭ ناتيجەسى, – دەدى ءوڭىر باسشىسى.
وسى ءۇيدىڭ تۇرعىندارى اتىنان ءسوز العان باقتىبەك جايبەرگەنوۆ اقساقال بۇل كلۋبتىڭ بالالاردىڭ جان-جاقتى قابىلەتتى بولىپ وسۋىنە ىقپال ەتەتىنىن ايتا كەلىپ, ەلباسى تاپسىرماسىن ابىرويلى ورىنداپ وتىرعان, بالالارعا وسىنداي اسەم سىي جاساعان وبلىس اكىمدىگىنە جانە قۇرىلىس كومپانياسىنا ريزاشىلىعىن ءبىلدىردى.
«Centergroup» كومپانيالار توبى اۋلا كلۋبى عيماراتىن پايدالانۋعا بەرىپ, مەملەكەت مەنشىگىنە تاپسىردى. 400 شارشى مەتردەن استام الاڭدا جاتتىعۋ زالى, بوكس, سامبو, قازاقشا كۇرەس سەكتسيالارى بار. بالالاردى سامبودان ەكى مارتە الەم چەمپيونى بايرام ايماعامبەتوۆ, بوكستان ەكى دۇركىن قازاقستان چەمپيونى ءمادي شولاق, سامبودان ازيا چەمپيونى بەرىك باكەشوۆ جاتتىقتىراتىن بولادى.
ايتا كەتەيىك, وسىنداي اۋلا كلۋبتارى بيىل قالانىڭ ەكى تۇرعىن ءۇي الابىندا اشىلادى دەپ كۇتىلۋدە. ناقتىراق ايتار بولساق, «نۇر اقتوبە» شاعىن اۋدانىندا كلۋب اشۋ ءۇشىن 34 ميلليون تەڭگە قاراستىرىلىپ وتىر. تاعى 65 ميلليون تەڭگە №11 شاعىن اۋدانداعى 2 قاباتتى عيماراتتى كۇردەلى ءجوندەۋدەن وتكىزۋگە جۇمسالادى, كەيىن ول عيماراتتا دا اۋلا كلۋبى اشىلماق.
ساتىبالدى ءساۋىرباي,
«ەگەمەن قازاقستان»
اقتوبە وبلىسى