كەشە ادامدار قازاقستان رەسپۋبليكاسىنىڭ ماسكەۋدەگى ەلشىلىگى رەزيدەنتسياسىنا كەلىپ, 5 ماۋسىمدا اقتوبە قالاسىندا ورىن العان قايعىلى وقيعالارعا بايلانىستى وزدەرىنىڭ كوڭىل ايتۋلارىن ءبىلدىردى.
رەسەي فەدەراتسياسى ۇكىمەتى مەن سىرتقى ىستەر مينيسترلىگىنىڭ اتىنان كوڭىل ايتۋ كىتابىنا ءوزىنىڭ جازباسىن رەسەي سىرتقى ءىستەر ءمينيسترىنىڭ ورىنباسارى – ستاتس-حاتشى گريگوري كاراسين قالدىردى.
«وسى اۋىر ساتتە ءبىز دوستاس ءارى وداقتاس قازاقستانمەن بىرگە تەرروريزمگە قارسى كۇرەستە, ادامزاتقا قارسى جاڭا قىلمىستاردىڭ بەتىن قايتارۋدا اسا تىعىز ءوزارا ءىس-قيمىل تانىتۋعا دايىن ەكەنىمىزدى شەشىمدى تۇردە مالىمدەيمىز», – دەپ جازادى گ.كاراسين.
«ادامزاتقا جات تەررورلىق اكتىنىڭ سالدارىنان قازاقستان ازاماتتارىنىڭ قازا تابۋىنا بايلانىستى» كوڭىل ايتۋىن ۇقشۇ-نىڭ باس حاتشىسى نيكولاي بورديۋجا دا ءبىلدىردى.
ازا تۇتۋ كىتابىنا تاۋەلسىز مەملەكەتتەر دوستاستىعىنا مۇشە بارلىق ەلدەردىڭ ەلشىلەرى, پلانەتانىڭ بارلىق قۇرلىقتارىنان وكىلدىك ەتەتىن الىس جانە تاياۋ شەتەلدەردىڭ اعا ديپلوماتتارى مەن اسكەري اتتاشەلەرى وزدەرىنىڭ قولتاڭبالارىن قالدىردى. كىتاپقا وزدەرىنىڭ كوڭىل ايتۋلارىن جازىپ قالدىرۋ ءۇشىن رەسەي استاناسىنىڭ تۇرعىندارى مەن قازاق دياسپوراسىنىڭ وكىلدەرى كەزەككە تۇردى.
ولاردىڭ بارلىعى قازاقستان حالقىنا وزدەرىنىڭ قولداۋ سوزدەرىن ءبىلدىرىپ, اقتوبەدە جاسالعان قانقۇيلى تەررورلىق شابۋىلدى جازعىراتىندىقتارىن مالىمدەدى. وسى لاڭكەستىككە بايلانىستى ءوزىنىڭ قولداۋىن رەسەيلىك جازۋشى, «رەسەيدىڭ التىن قاۋىرسىنى» كيريلل پريۆالوۆ بىلاي دەپ ءبىلدىردى:
«وسى كۇنى ءبىز قازاقستانمەن, وسى ەلدىڭ حالقىمەن بىرگەمىز. بۇل ەلدى مەن وتباسىممەن ءبىرگە ەجەلدەن تۋعان ەلىم ساناپ كەلەمىن. قازاقستاندىقتاردىڭ ارقاسىندا مەنىڭ تۋعان-تۋىسقاندارىم جانتۇرشىگەرلىك ەۆاكۋاتسيا ۋاقىتىندا امان قالدى. ولار بولماعاندا مەنىڭ جاقىندارىمنىڭ ءبارى قازا تاپقان بولار ەدى. جانە بۇگىندە ءبىز قازاقستاننىڭ جانىنان تابىلۋعا ءتيىسپىز. ويتكەنى, قازاقستان, باسقا دا بارلىق وركەنيەتتى ادامزات سەكىلدى, ەشقانداي مورالدىق كريتەريلەر مەن يدەالدارى جوق ايار دا ارامزا ادامدارمەن اۋىر دا قاتەرلى, جاسىرىن كۇرەس جۇرگىزىپ كەلەدى. مەن بارشامىز كۇش بىرىكتىرىپ, وسى كۇرەستە جەڭىسكە جەتەتىنىمىزگە سەنىمدىمىن. ونىڭ ۇستىنە, قازاقستان باسشىلىعىندا نۇرسۇلتان ءابىش ۇلى نازارباەۆ سەكىلدى ۇلى دا تاريحي كوشباسشى وتىر. بەرىك بولىڭدار, دوستار!».
6 ماۋسىمنان ماسكەۋلىكتەر چيستىە پرۋدىداعى اباي ەسكەرتكىشىنە گۇل شوقتارىن قويا باستاعان بولاتىن.
«ەگەمەن-اقپارات»