قازاقستان رەسپۋبليكاسىنىڭ مەملەكەتتىك حاتشىسى, قازاقستان رەسپۋبليكاسىنىڭ پرەزيدەنتى جانىنداعى ايەلدەر ىستەرى, وتباسى-دەموگرافيالىق ساياسات جونىندەگى ۇلتتىق كوميسسيا ءتورايىمى گۇلشارا ابدىقالىقوۆا «ايەلدەر تسيفرلى تەحنولوگيالار داۋىرىندە ينكليۋزيۆتىك ەكونوميكا قۇرۋ جولىندا» اتتى جاھاندىق ايەلدەر سامميتىنە قاتىسۋ ءۇشىن ۆارشاۆا قالاسىنا كەلدى, دەپ حابارلادى پرەزيدەنتتىڭ ءباسپاسوز قىزمەتى.
مينيسترلىك دەڭگەيىندەگى القالى جيىندا سويلەگەن سوزىندە گ.ابدىقالىقوۆا «قازاقستان-2050» ستراتەگياسىندا مەملەكەت باسشىسى ن.نازارباەۆ ەلىمىزدىڭ الدىنا الەمنىڭ ەڭ وزىق وتىز مەملەكەتىنىڭ قاتارىنا قوسىلۋ جونىندە مىندەت قويعانىن اتاپ ءوتتى. بۇل ماقساتقا قول جەتكىزۋ ءۇشىن قازاقستاندا مەملەكەتتىڭ ەسەپتىلىگىن ارتتىرۋعا, زاڭنىڭ ۇستەمدىگىن قامتاماسىز ەتۋگە, ەكونوميكانىڭ ءارتاراپتاندىرىلۋىنا جانە ادام كاپيتالىنىڭ جان-جاقتى دامۋىنا باعىتتالعان اۋقىمدى ينستيتۋتتىق رەفورمالار جۇرگىزىلۋدە.
مەملەكەتتىك حاتشى قازاقستاندا قازىرگى زامانعى ينكليۋزيۆتىك ەكونوميكانىڭ دامۋىنا بارلىق جاعداي جاسالىپ جاتقانىن ايتتى. «بيزنەستىڭ جول كارتاسى-2020», «جۇمىسپەن قامتۋدىڭ جول كارتاسى-2020», جەڭىلدىكپەن نەسيەلەۋ باعدارلامالارى, ونىڭ ىشىندە ەۋروپا قايتا قۇرۋ جانە دامۋ بانكى, ازيا دامۋ بانكىمەن بىرلەسكەن جوبالار ارقىلى مەملەكەتتىك باعدارلامالار ىسكە اسىرىلۋدا.
گ.ابدىقالىقوۆا جاسالىپ جاتقان شارالار ايەلدەردىڭ ەل ەكونوميكاسىن دامىتۋ ىسىنە قاتىسۋ ۇلەسىن ارتتىرۋعا مۇمكىندىك تۋعىزعانىن اتاپ كورسەتتى. بۇگىندە ايەلدەردىڭ بيزنەستەگى ۇلەسى – 50%, ال 42%-ى شاعىن جانە ورتا بيزنەس كاسىپورىندارىن باسقارىپ وتىر. ايەلدەردىڭ جۇمىسسىزدىق دەڭگەيى 2006 جىلعى 9,2%-دان 2015 جىلعى 5,6%-عا دەيىن, ال ەڭبەكاقىنىڭ گەندەرلىك الشاقتىعى 2006 جىلعى 62%-دان 2015 جىلعى 67%-عا دەيىن ازايدى. قازاقستان «جۇمىس ىستەپ جاتقان ايەلدەر, ەرلەرمەن سالىستىرمالى ۇلەسى» اتتى كورسەتكىش بويىنشا, 2015 جىلعى دۇنيەجۇزىلىك ەكونوميكالىق فورۋمىنىڭ جاھاندىق باسەكەگە قابىلەتتىلىك يندەكسىندە 26-شى ورىنعا يە بولدى.
سامميت شەڭبەرىندە مەملەكەتتىك حاتشى پولشا رەسپۋبليكاسىنىڭ پرەمەر-ءمينيسترى ب.شىدلومەن كەزدەستى. تاراپتار قازاقستان-پولشا قارىم-قاتىناسىنىڭ وزەكتى ماسەلەلەرىن تالقىلادى. كەزدەسۋ بارىسىندا مەملەكەتتىك حاتشى پولشانىڭ كازاقستان ءۇشىن ەۋروپالىق وداقتاعى, ورتالىق جانە شىعىس ەۋروپاداعى ماڭىزدى سەرىكتەس ەكەنىن ايتا كەلىپ, ەل باسشىلىعى قازاقستاننىڭ دۇنيەجۇزىلىك ساۋدا ۇيىمىنا كىرۋىنە قولداۋ كورسەتكەنىنە جانە استانادا وتەتىن ەكسپو-2017 حالىقارالىق كورمەسىنە قاتىساتىنىنا ريزاشىلىق ءبىلدىردى.
پولشا رەسپۋبليكاسى پرەزيدەنتىنىڭ زايىبى ا.كورنحاۋزەر-دۋدامەن كەزدەسۋى بارىسىندا گ.ابدىقالىقوۆا ءبىرىنشى حانىمعا ءسامميتتىڭ جوعارى دەڭگەيدە ۇيىمداستىرىلعانى ءۇشىن ءسامميتتىڭ قۇرمەتتى پاترونى رەتىندە العىسىن ءبىلدىردى. سونداي-اق, مەملەكەتتىك حاتشى ەكى ەل اراسىندا ءبىلىم سالاسىنداعى ىنتىماقتاستىقتىڭ قارقىندى دامىپ كەلە جاتقانىن اتاپ ءوتتى. ءبىلىم سالاسىنداعى ەكىجاقتى ۇكىمەتارالىق ىنتىماقتاستىق تۋرالى كەلىسىمگە قول قويىلدى. قازىرگى تاڭدا ۆارشاۆا, كراكوۆ, لودزي, پوزنان جانە جەشۋۆ ۋنيۆەرسيتەتتەرىندە 500-دەن استام قازاقستاندىق ستۋدەنت ءبىلىم الۋدا.
ءسامميتتىڭ الداعى ەكى كۇنىندە مەملەكەتتىك حاتشى گەرمانيا, فرانتسيا, ۆەتنام, مالايزيا ەلدەرى دەلەگاتسيا باسشىلارىمەن ەكىجاقتى كەزدەسۋلەر وتكىزەدى دەپ جوسپارلانىپ وتىر.