«مەن اۋىزبىرشىلىكتەن اينىمايتىن اقجۇرەك جۇرتىمنىڭ قۋاتتى ۇلتقا, شۋاقتى ۇلىسقا اينالارىنا كامىل سەنەمىن», دەگەن ەلباسىنىڭ جاڭا جولداۋىنداعى جارقىن ءسوزىن « ۇلىسىمنىڭ ۇيىتقىسى – وڭتۇستىك» اتانعان ءوڭىردىڭ جۇرتشىلىعى ايرىقشا سەزىممەن قارسى الدى. ءسىزدىڭ ءتىلشىڭىز وبلىس ورتالىعىنداعى الۋان ءتۇرلى ۇجىمداردا بولعان ەدى. ايتىلىپ جاتقان وي-پىكىرلەردى شىمكەنتشابىت دەۋگە ابدەن لايىق.
* * *
زاۋىتتا.........................................
قىدىرالى قۋاندىقوۆ, «قاينارماي» زاۋىتىنىڭ اۋىسىم باستىعى:
– جولداۋدا يندۋستريالاندىرۋ وڭىرلىك ساياساتتىڭ جاڭا پاراديگماسىن قالىپتاستىراتىنى, وڭىرلەردى دامىتۋعا باسا نازار اۋدارىلاتىنى ايرىقشا ايتىلعان. ءبارىمىزدىڭ دە بۇگىنگىدەن الدەقايدا جاقسىراق, ءداۋلەتتىرەك ءومىر سۇرگىمىز كەلەدى. ەلباسىمىز ىلعي دا كاسىپكەرلىككە كەرەمەت كوڭىل بولەدى. «مەن بيزنەس قۋاتتى بولسا, مەملەكەت تە قۋاتتى دەگەن قاعيداتتى جاقتاۋشىمىن», دەدى پرەزيدەنتىمىز ءوزىنىڭ جولداۋىندا. وسى ءسوزدىڭ ءوزى بىزگە قانات ءبىتىردى. «قاينار-ماي» ءبىرتالاي جىلدان بەرى وسىمدىك مايىن وندىرەدى. ماي شىعاراتىن زاۋىتتان باسقا كوپتەگەن سالالاردى دامىتۋمەن دە اينالىسامىز.
ەڭبەگىنە سەنگەننىڭ ەڭسەسى بيىك ەكەنى ايان. ەلباسىمىزدىڭ كورەگەندىگى, تاۋەلسىزدىكتىڭ 20 جىلدىعى جاڭا بەلەستەرگە قۇلشىندىرادى.
* * *
كورپوراتسيادا................................
راشكۇل وسپاناليەۆا, «بەرەكە» كورپوراتسياسىنىڭ باس ديرەكتورى, وقو ءماسليحاتىنىڭ دەپۋتاتى:
– ەلباسىمىزدىڭ جىل سايىنعى جولداۋى – «بەرەكە» كورپوراتسياسى ءۇشىن ۇلكەن مەرەكە. ءبىزدىڭ بيزنەسىمىز تاۋەلسىزدىگىمىزدىڭ اۋەلگى جىلدارىنان-اق تۇڭعىش پرەزيدەنتىمىزدىڭ قالتقىسىز قامقورلىعىمەن كوركەيىپ كەلەدى. ارينە, قيىندىقتار, كۇردەلى جاعدايلار كوپ كەزدەستى. سولاردىڭ ءبارىن جەڭۋدە ءبىز مەملەكەت باسشىسىنىڭ جىلۋارلى ءجاردەمىن سەزىنىپ, جىگەرلەنىپ جۇردىك. بۇگىندە «بەرەكە» بۇكىل ەلگە بەلگىلى. اۆتوموبيل جولدارىن, كوپىرلەر سالۋدا, جالپى قۇرىلىس بيزنەسىندە الدىڭعىلار ساپىندامىز. ماماندارىمىزدىڭ شەبەرلىگىن شەت ەلدەردە جانە وزىمىزدە شىڭدايمىز. «بيزنەستىڭ الەۋمەتتىك جاۋاپكەرشىلىگى» باعدارلاماسى بويىنشا دا ەل العىسىنا بولەنۋدەمىز.
پرەزيدەنتىمىزدىڭ جاڭا جولداۋى «بولاشاقتىڭ ىرگەسىن بىرگە قالايمىز» دەپ اتالادى. ال ىرگە, ىرگەتاس قالاۋدىڭ قادىر-قاسيەتىن ءبىزدىڭ «بەرەكە» ۇجىمى تەرەڭ تۇسىنەدى.
* * *
فابريكادا.........................................
جۇماگۇل بايجانوۆا, «مەلانج» فابريكاسى تىگىن ءوندىرىسىنىڭ باستىعى:
– ءبىزدىڭ فابريكانىڭ ۇجىمىندا «بولاشاقتىڭ ىرگەسىن بىرگە قالايمىز» اتتى جاڭا جولداۋ جان-جاقتى تالقىلانۋدا. ءبارىنىڭ دە بىلدىرەر وي-پىكىرلەرى جوق ەمەس. ءبارىنىڭ دە ىنتا-ىقىلاستارى جوعارى. تۇراقتى جۇمىس ورىندارى, جاقسى تابىستارى, جاراسىمدى تۇرمىستارى ءۇشىن ەلدىك اۋىزبىرشىلىككە, تۇراقتىلىق پەن بەيبىتشىلىككە, سايىپ كەلگەندە, ۇلت كوشباسشىسىنىڭ كەلەشەكتى كەمەل بولجايتىن بايىپتىلىعىنا العىس جاۋدىرادى. «مەلانج» فابريكاسىنىڭ قول جەتكىزگەن ناتيجەلەرى بۇرىننان-اق بەلگىلى. قازىر بىزدە 650 ادام جۇمىس ىستەيدى. كوپتەگەن ۇلتتاردىڭ وكىلدەرى تاتۋ-ءتاتتى ەڭبەك ەتەدى. شىمكەنت شىرايىنا رياسىز ريزالىق راي قوسا بەرەمىز.
* * *
ۋنيۆەرسيتەتتە................................
جۇمابەك باحوۆ, م.اۋەزوۆ اتىنداعى وقمۋ عىلىمي جۇمىستار جانە حالىقارالىق بايلانىستار جونىندەگى پرورەكتورى:
– ەلدىڭ ءوسىپ-وركەندەۋى ءبىلىم مەن عىلىمنىڭ دەڭگەيىنە تىكەلەي بايلانىستى. ءبىلىمنىڭ جوعارى, ساپالى, زامان تالابىنا ساي بولۋى ءۇشىن عىلىمنىڭ جاڭا جەتىستىكتەرىنە, سوڭعى سەرپىلىستەرىنە سۇيەنۋى كەرەكتىگىن الەمدىك تاجىريبەدەن جاقسى بىلەمىز. قازىرگە دەيىن بىزدە ءبىلىم مەن عىلىم بولەكتەۋ, دەربەستەۋ دامىپ كەلدى. سوندىقتان ناقتى تاجىريبە مەن مامانداردى تەوريالىق دايىنداۋ اراسىندا ەداۋىر الشاقتىق بولعانى راس. ەندى وسى ولقىلىقتى تۇزەتۋ ماقساتىندا مامانداردى ءبىلىم مەن عىلىم ۇناسىمدى ۇيلەسكەن ورتادا دايارلاۋعا بەتبۇرىس جاسالۋدا.
ەلورداداعى «نازارباەۆ ۋنيۆەرسيتەتى» ءبىلىم مەن عىلىم بىتە قايناپ-پىسەتىن, بىرگە ءورىس الۋدىڭ ونەگەسى بولاتىن يننوۆاتسيالىق مودەلگە اينالماق. ءبىلىم سالاسىنىڭ 2020 جىلعا دەيىنگى مەملەكەتتىك دامۋ باعدارلاماسى, «عىلىم تۋرالى» زاڭ ەندى, مىنە, ەرەن قۇجات ەلباسى جولداۋى – ءبارى ەلىمىزدى بيىك بەلەستەرگە جەتەلەيدى دەپ سەنەمىز.
كوللەدجدە......................................
گۇلزات ىسقاقوۆا, شىمكەنت كولىك-كوممۋنيكاتسيا جانە جاڭا تەحنولوگيالار كوللەدجى ديرەكتورىنىڭ ورىنباسارى:
– كوللەدجىمىزدە پرەزيدەنت جولداۋى قىزۋ تالقىلانىپ, قولداۋ تابۋدا. جاڭا جولداۋدا ءبىلىم بەرۋدىڭ ساپاسىن ارتتىرۋ جانە قولجەتىمدىلىگىن كەڭەيتۋ ءۇشىن ءبىلىم بەرۋگە قولداۋ كورسەتۋدىڭ جاڭا قارجىلىق-ەكونوميكالىق قۇرالدارىن ەنگىزۋ جاعدايى, ەلەكتروندى وقىتۋدىڭ پايىزدىق كورسەتكىشتەرىنە دەيىن ناقتىلانعان.
بۇگىنگى تاڭدا ءبىزدىڭ كوللەدجدە 2600-گە جۋىق جاس ورەن اۆتوموبيل كولىگى, كوتەرۋ-ترانسپورتتىق جول ماشينەلەرى, تاسىمالداۋدى ۇيىمداستىرۋ, تەمىر جولدىڭ جىلجىمالى قۇرامدارىن جوندەۋ جانە تەحنيكالىق كۇتۋ, اۆتوماتيكا, تەلەمەحانيكا جانە كولىك قوزعالىسىن باسقارۋ, مۇناي-گاز ستانسالارى سالالارى بويىنشا ءتۇرلى ماماندىقتاردى يگەرۋدە. بۇلاردىڭ ءبارى دە, جولداۋ تۇرعىسىنان قاراعاندا, بولاشاقتىڭ ىرگەسىن قالاۋعا اسا قاجەتتى, دىلگىر ماماندىقتار. جاستار دا, ۇستازدار دا مۇنى باعالاي بىلەدى. كوللەدجدە 150-دەن اسا وقىتۋشى ەڭبەك ەتەدى. ءبارى دە شاكىرتتەرمەن بىرگە ەلباسىنىڭ جولداۋىن زەيىن قويىپ, زەردەلەي وقۋ ۇستىندە.
مىنە, قايدا بارساڭىز-داعى باق-بەرەكەگە, ىرىس-قۇتقا, قازاق ەلىنىڭ بولاشاعىنا نىق سەنگەن وتانشىلداردىڭ وي-ساناسىنداعى ساۋلەلى سەرگەكتىكتى بايقايسىز. شىمكەنتكە كوكتەم جىلداعىدان دا ەرتەرەك كەلە جاتقانداي جايدارماندىقتى سەزىنەسىز.
مارحابات بايعۇت.
وڭتۇستىك قازاقستان وبلىسى.