بيىلعى جولداۋدىڭ ەرەكشەلىگى مەملەكەتىمىزدىڭ جانە حالىقتىڭ 2020 جىلعا دەيىنگى دامۋ جولىن باعدارلاپ بەرىپ وتىر. الەۋمەتتىك سالانى قولداۋعا, رەسپۋبليكا تۇرعىندارىن جۇمىسپەن قامتۋعا باسا كوڭىل ءبولىنەدى. بارلىق وڭىردە قولىنان ءىس كەلەتىن ادامداردىڭ جۇمىسقا تارتىلۋى, جاڭا ماماندىقتارعا يە بولۋى اتاپ وتەرلىك ءجايت. ويتكەنى, ەڭبەك ەتكەن ءاربىر ادام ءوزىن دە اسىرايدى, وتباسىن دا اسىرايدى. سونىمەن قاتار, مەملەكەتتىڭ العا باسۋىنا ۇلەس قوساتىنى انىق. ەلباسى دەنساۋلىق ساقتاۋعا, ازاماتتارىمىزدىڭ سالاماتتى ءومىر سالتىن ساقتاۋىنا باسا نازار اۋدارىلاتىنىن ايتىپ ءوتتى. الەۋەتى ارتقان ەلدىڭ تۇرعىندارى دا ۇزاق جاساۋى ءتيىس. مەملەكەت باسشىسى الداعى ۋاقىتتا ورتاشا ءومىر ءسۇرۋ ۇزاقتىعىن 72 جاسقا جانە ودان دا جوعارى مەجەگە جەتكىزۋ كوزدەلىپ وتىرعانىن جەتكىزدى.
سوڭعى ءۇش جىل بويى زەينەتاقى مەن جاردەماقى, بيۋدجەتتىك مەكەمە قىزمەتكەرلەرىنىڭ جالاقىسى ءوستى. 2009 جىلى جانە 2010 جىلى 25 پايىزعا كوتەرىلگەن بولسا, بيىل 1 قاڭتاردان باستاپ زەينەتاقى 30 پايىزعا ارتتى. ال بيىل بيۋدجەت قىزمەتكەرلەرىنىڭ ەڭبەكاقىسى 30 پايىزعا وسەتىنىن جانە ەسكە سالدى. ايتا كەتۋ كەرەك, الەمدىك قارجى داعدارىسى كەزىندە كوپتەگەن ءداۋلەتتى مەملەكەتتەردىڭ وزدەرى زەينەتاقىنى دا, ەڭبەكاقىنى دا قىسقارتىپ جاتقاندا, ءبىزدىڭ ەلدىڭ ءوسىرىپ وتىرعانى حالىق ءۇشىن ايرىقشا وقيعا. ەلباسى ءوز سوزىندە بۇل «نۇر وتان» پارتياسىنىڭ باعدارلاماسىمەن دە سايكەس كەلەتىنىن, ءتىپتى وندا 2012 جىلى وسىنداي مەجەگە جەتۋ كوزدەلگەن بولسا, بىزدەر 2011 جىلى قول جەتكىزىپ وتىرعانىمىزدى اتاپ ءوتتى.
تىڭ باستامانىڭ ءبىرى – وسى جولداۋدا تۇرعىن ءۇي-كوممۋنالدىق شارۋاشىلىقتى العا باستىرۋ جايى جاقسى كوتەرىلدى. شىنىمەن دە, وسى سالانىڭ كۇردەلى ماسەلەلەرى كوپتەن بەرى حالىقتى تولعاندىرىپ جۇرەتىن ەدى. قارجىنىڭ جوقتىعىنان كەيىنگە قالىپ كەلدى. كوپتەگەن قالالارداعى ۇيلەردىڭ كوممۋنيكاتسياسى توزعان. كۇردەلى ءجوندەۋدەن ءوتكىزۋ وڭايعا سوقپايدى. اۋىستىرۋ دا كوپ قارجىنى تالاپ ەتەدى. ول ءۇشىن تۇرعىن ءۇي-كوممۋنالدىق شارۋاشىلىقتى دامىتۋ باعدارلاماسى قولعا الىنىپ, مەملەكەت قارجى ينستيتۋتتارىن تارتاتىن بولادى. ەلباسى ۇكىمەتكە ورتاق م ۇلىكتى ءجوندەۋ جانە قالپىنا كەلتىرۋ جۇمىستارىن كەڭىنەن قارجىلاندىرۋ تەتىكتەرىن ءازىرلەۋدى تاپسىردى. وسى ارقىلى ءبىزدىڭ ەلىمىزدەگى تۇرعىن ءۇي جاعدايىن جاقسارتىپ قانا قويماي, ازاماتتاردىڭ ءوز م ۇلىكتەرىن ساقتاۋ جاۋاپكەرشىلىگىن دە ارتتىرا الاتىنىمىز انىق.
ەلباسى تاراپىنان اۋىز سۋ ماسەلەسى دە ورىندى قوزعالدى. تەك اۋىلدىق جەرلەردە عانا ەمەس, قالالاردا دا سۋ ماسەلەسى ءوتكىر كۇيىندە تۇر. سۋ قۇبىرلارىن جوندەۋ, ءتيىمدى پايدالانۋ ءماسەلەلەرىنە باسا كوڭىل بولىنەدى.
قازاقستان جاڭا دامۋ جولىنا ءتۇستى. ول – يندۋستريالىق-يننوۆاتسيالىق دامۋ باعدارلاماسى. ەلباسى وسى جوسپار اياسىندا 152 كاسىپورىننىڭ اشىلعانىن, 24 مىڭداي قازاقستاندىقتىڭ تۇراقتى جۇمىسپەن قامتىلعانىن ايتىپ ءوتتى. نۇرسۇلتان ءابىش ۇلى 2014 جىلعا دەيىن 8,1 ترلن. تەڭگەنى قۇرايتىن 294 ينۆەستيتسيالىق جوبانى ىسكە اسىرۋ جوسپارلانىپ وتىرعانىن دا جاريا ەتتى. سونىڭ ءناتيجەسىندە, 161 مىڭ تۇراقتى جۇمىس ورنى اشىلىپ, 207 مىڭ جۇمىس ورنى قۇرىلىس مەرزىمى كەزىندە اشىلاتىن بولادى. بۇل ەل تۇرعىندارىنىڭ الەۋمەتتىك جاعدايى جاقسارا ءتۇسۋى ءۇشىن اشىلعان داڭعىل جول دەپ بىلەمىن.
قازاقستانداعى تۇراقتىلىقتىڭ ساقتالۋى, ۇلتارالىق كەلىسىمنىڭ جاراسىم تابۋى الەمگە ۇلگى بولدى. سونىمەن قاتار, ەلىمىزگە ينۆەستيتسيا كەلۋىنە وڭ ىقپال ەتكەنى داۋسىز. قازاقستان ەكونوميكاسىنا 120 ملرد. دوللاردان استام ينۆەستيتسيا قۇيىلعانى – ۇلكەن كورسەتكىش. بۇل تۇستا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ الەم الدىنداعى ابىرويى ايرىقشا ءرول اتقارىپ وتىر.
ەلباسى انا ءتىلىمىزدىڭ قادىرىن ارتتىرۋعا بايلانىستى دا جاقسى باستاما كوتەردى. مەملەكەتتىك ءتىلدى بىلەتىندەردىڭ سانى ەلىمىزدە 70 پايىزدان اسقان. 2020 جىلى ەل تۇرعىندارىنىڭ 95 پايىزى قازاق ءتىلىن ءبىلۋى ءتيىس ەكەنىن ءمالىم ەتتى. بۇل ورايدا, سوڭعى جىلدارى انا تىلىمىزدە ءدارىس بەرەتىن مەكتەپتەردىڭ اشىلۋىن, «بالاپان» باعدارلاماسى اياسىندا بالاباقشالار اشىلۋىن ەرەكشە ايتار ەدىم.
تۇراربەك اسانوۆ, پارلامەنت ءماجىلىسىنىڭ دەپۋتاتى.