ەندى سالىق تولەيتىن بولادى
قارجى مينيسترلىگىنىڭ مەملەكەتتىك كىرىستەر كوميتەتى الەۋمەتتىك جەلىلەردەگى جەكە پاراقشالارى ارقىلى ساۋدا جاساپ جۇرگەن ازاماتتاردى سالىق تولەۋگە مىندەتتەدى.
– مەنىڭ ويىمشا, تولەنەتىن سوما اسا كوپ ەمەس. جەكە كاسىپكەرلەر تولەيتىن سالىق پەن پاتەنت كولەمى 3 پايىزدان اسپايدى. زاڭ بارىنە ورتاق, ءبارى دە تولەۋى شارت. بىلەتىنىمىزدەي, ساۋدا ورىندارىندا قىزمەت ەتەتىندەر بۇل مىندەتتى تولىق ورىندايدى. الايدا, تەحنولوگيانىڭ دامىعان زامانىندا ينتەرنەت ارقىلى ساۋدا جاسايتىن ازاماتتاردىڭ تولەمەۋى ەش نەگىزسىز, – دەدى مەملەكەتتىك كىرىستەر كوميتەتىنىڭ توراعاسى داۋلەت ەرعوجين.
بۇل ءىستىڭ بۇگىنگە دەيىن نە ءۇشىن قارالماي كەلگەنىن اتالعان كوميتەت توراعاسى و باستا جىبەرگەن مۇقياتسىزدىعىنان بولىپ وتىرعانىن ايتتى.
– ءتۇسىندىرۋ جۇمىستارى ءجۇرگىزىلدى. ولاردىڭ كوبىسى كەلىسىمدەرىن بەردى. ءبىز ونى تىركەلگەندەردىڭ كوپتىگىنەن ءبىلىپ وتىرمىز. شاقىرۋ جىبەرگەندەردىڭ 99 پايىزى كاسىپكەر رەتىندە تىركەلدى ءارى وسىعان بايلانىستى كاسىپكەرلىك جۇمىستى جۇزەگە اسىرىپ جاتىر. قازىرگى تاڭدا ولارعا ەش نارازىلىعىمىز جوق. ەندىگى جىل قورىتىندىسى بويىنشا, ولاردىڭ سالىقتىق مىندەتتەرىن قالاي ورىندايتىنىن كورەمىز, – دەدى داۋلەت ەرعوجين.
ايان ءابدۋالي,
«ەگەمەن قازاقستان»