بىلتىرعى كۇزدە وبلىس ورتالىعىندا «ومبى وبلىسىنىڭ مادەني كۇندەرى» ءوتتى. جارتى جۇرتىمىزدىڭ اتامەكەنىن تاستاماي سول جاقتا تۇرىپ جاتقانى بار, ومبىلىق اعايىندارىمىزدى كورىپ, تىلدەسىپ قالۋ بار دەگەندەي, بۇل شارالاردان قالماي بارىپ جۇردىك.
سوڭعى قايتار كۇنى ومبىلىقتار ەستاي اقىن اتىنداعى مادەنيەت سارايىندا كونتسەرت بەرمەك بولىپ, كورۋگە تاعى دا باردىق.
كونتسەرت باستالماس بۇرىن ومبىنىڭ مەرى ۆياچەسلاۆ دۆوراكوۆسكيگە ءسوز بەرىلدى. «ءبىزدىڭ ەكى وبلىس اراسىنداعى قارىم-قاتىناسىمىز 300 شاقىرىم شەكارادان الدەقايدا كەڭ...», دەپ باستاعان مەردىڭ ەكونوميكا, الەۋمەتتىك سالا, ونەر, عىلىم سالاسى بويىنشا سويلەگەن سوزدەرىنە ريزا بولاسىڭ. قولىندا قاعاز جوق. دۆوراكوۆسكي سويلەگەن كەزدە كوپ وقيتىندىعى, كوپ بىلەتىندىگى, زيالىلىعى, پاراساتتىلىعى, ساياساتكەرلىگى كورىنىپ تۇردى. سويلەگەن سوزىمەن, جايدارى دا قاراپايىم كەسكىن-كەلبەتىمەن, ويلىلىعىمەن جۇرتتى بىردەن وزىنە قاراتتى. زال دا ريزا بولىپ ءسۇيسىنىپ تىڭداپ وتىردى. دۇركىرەتىپ قول سوقتى.
ءۇنسىز ويعا قالاسىڭ. ءبىزدىكىلەر بولسا, قاعازعا جازىلعاندى وقىپ بەرەدى. جاساندى, جاتتاندى سوزدەردەن جۇرت تا جالىقتى.
جاھاندانۋ اكەلگەن سپيچرايتەر دەگەن كوپ ايتىلا بەرمەيتىن ءبىر ءسوز بار. سپيچرايتەر – كوپشىلىك الدىندا سويلەيتىن ءماتىندى جازىپ, دايىنداپ بەرەتىن مامان. وسى سپيچرايتەر قىزمەتى قازىر ءبىزدىڭ ۇساق-تۇيەك شەنەۋنىكتەرگە جاقسى بولدى, اقشاسى تولەۋلى, قاعازدان باس كوتەرمەي-اق وقي بەرەدى. بىلتىر ءبىزدىڭ وبلىستا سونداي ءبىر جاي ورىن الدى, الگى سپيچرايتەر دەگەنىڭىز ءار جەر-ءار جەردە سويلەنگەن سوزدەردى جيناستىرىپ شەنەۋنىككە جازىپ بەرگەن عوي, ول قايدان ءبىلسىن, ادەتتەگىدەي قاعازعا جازعاندى زۋىلداتىپ وقىپ شىعادى دا, وي جوق, ويلانۋ جوق كەتە بەرەدى. سالىستىرىپ قاراپ كورسە, استانادا ما, الماتىدا ما, ايتەۋىر ءبىر جاقتا ءسويلەنگەن ءسوز ەكەن.
ويدى وي قوزعايدى. جۋىردا وبلىستىق ءماسليحاتتا دەنساۋلىق ساقتاۋ سالاسىنا قاتىستى وتىرىس ءوتتى. وبلىس ورتالىعىنداعى ونكولوگيالىق ديسپانسەردىڭ باس دارىگەرى مۇرات ءسۇلەيمەنوۆ مىنبەدە تۇرىپ, قاعازعا قاراماي, بۇكىل ماسەلەنى جارتى ساعات جاتقا سوققاندا, بۇرىن مۇندايدى كورمەگەن دەپۋتاتتارىڭنىڭ اۋىزدارى اشىلىپ قالدى. مىنبەدە تۇرعان ءسۇلەيمەنوۆتىڭ سويلەگەنىن كورىپ, قيت ەتسە دايىنداپ جازىپ بەرگەن قاعازعا قاراپ زۋىلداتاتىن اكىمدەر, باسقارما باسشىلارى, شەنەۋنىكتەر ويلانسا, ۇيرەنسە عوي دەيسىڭ. الگى جەر كودەكسى تۋرالى تۇسىندىرەمىز دەپ شالعاي اۋىلدارعا بارعان دەپۋتاتتاردى كوردىك. قاعازعا جازىپ العاندارىن اۋىلدىقتاردىڭ الدىندا, كوزىلدىرىكتەرىن كيىپ الىپ, وقىپ وتىرعان سوڭ نە سۇرايسىڭ. قازاق تىلىندە, ءوز تىلىڭدە وتەتىن جيىنداردى ساعىناسىڭ. جينالىستاردا قازاقى داۋىس, ءۇن قوسۋ دەگەن ولارعا تاڭسىق.
ايتپاقشى, وتكەن اپتادا وبلىسقا گەرمانيالىق «AWS Schاfer Technologie GmbH» كومپانياسىنىڭ وكىلدەرى كەلدى. نەمىس كومپانياسى ماشينا جاساۋ, قۇبىرلار جاساپ شىعارۋ باعىتىندا جۇمىس جاسايدى ەكەن. بيىل گەرمانياداعى ەلىمىزدىڭ ەكونوميكا سالاسىنا ارنالعان كۇندەرى اياسىندا پاۆلودار وبلىسى اكىمدىگى مەن «AWS Schاfer Technologie GmbH» كومپانياسى ۇزاق مەرزىمدى ستراتەگيالىق ارىپتەستىك تۋرالى مەموراندۋمعا قول قويىپ قايتتى. ماقسات ء–بىزدىڭ ءوندىرىس ورىندارىن يننوۆاتسيالىق تەحنولوگيالارمەن قامتاماسىز ەتۋ. وبلىس اكىمدىگىندە بولعان ەكىجاقتى كەزدەسۋ بارىسىندا نەمىس كومپانياسىنىڭ باس ديرەكتورى حۋبەرتۋس ەنگەلس ءوزىنىڭ بۇكىل جۇمىس بارىسىن, ساپارىنىڭ ءمانىن, ماقساتىن قاعازعا قاراماي اۋدارماشى ارقىلى ايتتى دا بەردى. ەلۋ ەلدىڭ ءبىر ۇلگىسى. ءۇيرەنەيىك. ولار ەلدەرىنە بارعاندا ءبىزدىڭ قاعاز قاراپ وقيتىن شەنەۋنىكتەر تۋرالى نە ويلايدى ەكەن دەيسىڭ. جالپى, ءبىزدىڭ اكىمدىككە شەتەلدەن كىم كەلسە دە سولاي, كادىمگى ىسكەرلىك بارىسى, جۇمىسباستى اڭگىمەگە شاقىرىپ بەتپە-بەت ءسويلەسكەندى ءجون كورەدى. ءبىزدىڭ شەنەۋنىكتەر سياقتى سىقىرلاپ كيىنۋ, شىرەنۋ, مەن باستىقپىن دەگەن پيعىل ولاردا جوق, كيگەن كيىمدەرى دە, ءجۇرىس-تۇرىستارى دا, سويلەگەن سوزدەرى دە قاراپايىم, ءوركەنيەتتىلىك مادەنيەت, بىلىمدىلىك دەگەن وسى. ءبىز قاشان ولارعا جاقىندايدى ەكەنبىز؟..
فاريدا بىقاي,
«ەگەمەن قازاقستان»
پاۆلودار