كەشە ورتالىق كوممۋنيكاتسيالار قىزمەتىندە ادىلەت ءمينيسترىنىڭ ورىنباسارى زاۋرەش بايمولدينا مەملەكەتتىڭ زاڭشىعارۋشىلىق قىزمەتتەگى ءرولى تۋرالى ايتىپ بەردى. ۆيتسە-ءمينيستردىڭ سوزىنەن بەلگىلى بولعانداي, جىل سايىن ادىلەت مينيسترلىگىنە 70 زاڭ جوباسى, 2 مىڭعا تارتا پرەزيدەنت پەن ۇكىمەت اكتىلەرىنىڭ جوباسى جانە 10 مىڭنان استام ورتالىق جانە جەرگىلىكتى ورگاندار اكتىلەرى تۇسەدى ەكەن.
2015 جىلى ادىلەت ورگاندارىنىڭ الەۋەتى «100 ناقتى قادام» ۇلت جوسپارىنداعى ەلباسى تاپسىرمالارىن ساپالى ءارى ۋاقىتىلى زاڭنامالىق قامتاماسىز ەتۋگە باعىتتالدى. وسىعان سايكەس زاڭدىق قۇجاتتىڭ تۇجىرىمدامالىق جوباسى ازىرلەنىپ جاتقان كەزدەن باستاپ تالقىلاۋعا تۇسەتىنى ەرەكشە اتالدى. ۆيتسە-مينيستر, بۇل رەتتە, زاڭ جوباسىن ازىرلەۋشى ورگاننىڭ ينتەرنەت رەسۋرسىندا زاڭدىق قۇجاتتىڭ تۇجىرىمدامالىق جوباسى ورنالاستىرىلاتىنىن, جەكە ازاماتتار مەن ۇيىمدار وندا وزدەرىنىڭ وتىنىشتەرى مەن كەلىسپەۋشىلىكتەرىن جازباشا تۇردە ۇسىنا الاتىنىن جەتكىزدى. ونىڭ ۇستىنە جاقىندا «ەلەكتروندى ۇكىمەت» سايتىنان نورماتيۆتىك-قۇقىقتىق اكتىلەردىڭ پورتالى اشىلسا, مۇندا دا زاڭ جوبالارىن ازىرلەۋشى مەملەكەتتىك ورگاندار كورسەتىلگەن زاڭدىق قۇجاتتار مەن وزگە دە نورماتيۆتىك-قۇقىقتىق اكتىلەردىڭ ماتىندەرى كورىنىس تاۋىپ وتىر. سوندىقتان دا جەكە ازاماتتار اتالعان پورتالدا زاڭ جوبالارىنىڭ تۇجىرىمدامالىق جوباسىنا جانە وزگە دە نورماتيۆتىك-قۇقىقتىق اكتىلەر جوباسىنا ءوز ۇسىنىستارىن جولداي الادى. ز.بايمولدينانىڭ ايتۋىنشا, ەگەر زاڭ جوباسىن ازىرلەۋشى مەملەكەتتىك ورگان ۇسىنعان زاڭدىق قۇجات جوباسى تالقىلاۋدان وتپەگەن بولسا, وندا ولار كەرى قايتارىلادى. مىسالى, 2015 جىلى 7 زاڭ جوباسى مەن ءبىر تۇجىرىمدامالىق جوبا, ال اعىمداعى جىلدىڭ وسى كەزىنە دەيىن 3 زاڭ جوباسى مەن 10 تۇجىرىمدامالىق جوباسى وسىلايشا كەرى قايتارىلعان.
نەگىزىنەن, زاڭ جوباسىن ازىرلەۋشى مەملەكەتتىك ورگانعا ۇسىنىستار مەن تىلەكتەردى جولداعان كەزدە ولار ءجىتى قارالىپ, قابىلدانۋى نەمەسە سەبەبى ءتۇسىندىرىلىپ قابىلدانباۋى مۇمكىن. «بۇل رەتتە جەكە ازاماتتار مەن ۇيىمدار نورماتيۆتىك-قۇقىقتىق اكتىلەر جوباسىن وزدەرى دە ازىرلەپ, مەملەكەتتىك ورگاندار قاراۋىنا ۇسىنۋعا دا مۇمكىندىك بار. الايدا مەملەكەتتىك ورگان زاڭدىق قۇجات جوباسىن جارامسىز دەپ تاپسا, وندا وعان جازباشا تۇردە نەگىزدەلگەن جاۋاپ قايتارۋى ءتيىس», دەپ اتاپ ءوتتى زاۋرەش حاميتقىزى.
ۆيتسە-مينيستر ورايى كەلگەندە بارلىق ورتالىق جانە جەرگىلىكتى مەملەكەتتىك ورگاندار جانىنان قۇرىلعان قوعامدىق كەڭەستەر ارقىلى زاڭشىعارۋشىلىق پروتسەسىنە قاتىسا الۋعا بولاتىندىعىمەن دە ءبولىستى. ەكىنشى زاڭشىعارۋشىلىق پروتسەسىنە قاتىسۋ مۇمكىندىگىن «اتامەكەن» ۇلتتىق كاسىپكەرلەر پالاتاسى ارقىلى جۇزەگە اسىرۋعا بولادى ەكەن. قوعامدىق كەڭەستەر ۇسىنىستارى جانە ۇلتتىق كاسىپكەرلەر پالاتاسىنىڭ ساراپتامالىق قورىتىندىسى نورماتيۆتىك-قۇقىقتىق اكتىلەردىڭ مىندەتتى قوسىمشاسى بولىپ تابىلاتىنىن دا قاپەرگە سالا كەتكەن ورىندى. ءۇشىنشى مۇمكىندىك, ۇكىمەت جانىنداعى ۆەدومستۆوارالىق كوميسسيا ارقىلى جۇزەگە اسىرىلادى. اتالعان ۆەدومستۆوارالىق كوميسسيانىڭ جۇمىس ورگانى – ادىلەت مينيسترلىگى. كوميسسيا بارلىق تۇجىرىمدامالىق جوبانى قاراپ, ودان كەيىن زاڭ جوبالارىن ازىرلەۋگە كوشەدى. ونىڭ قۇرامىنا ۇكىمەتتىك ەمەس سەكتور وكىلدەرى, مەملەكەتتىك ورگاندار وكىلدەرى 38 پايىزدى قۇراماق. سونداي-اق, ەلىمىزدە نورماتيۆتىك-قۇقىقتىق اكتىلەردىڭ ەتالوندىق باقىلاۋ بانكى قۇرىلسا, ەندى قابىلدانعان بارلىق نورماتيۆتىك-قۇقىقتىق اكتىلەر مەن زاڭدار وسى ەتالوندىق بانكتە جاريالانادى. بارلىق نورماتيۆتىك-قۇقىقتىق اكتىلەر مەن زاڭدىق قۇجاتتار ءماتىنى بارشاعا تەگىن ءارى قولجەتىمدى.
اسقار تۇراپباي ۇلى,
«ەگەمەن قازاقستان»