كەشە «نۇر وتان» پارتياسى مەن قازاقستان حالقى اسسامبلەياسى بىرلەسكەن ءىس-شارالار جوسپارىن بەكىتتى
اتالعان قۇجاتقا «نۇر وتان» پارتياسىنىڭ ورتالىق اپپاراتىندا وتكەن كەڭەيتىلگەن وتىرىستا پارتيا توراعاسىنىڭ ءبىرىنشى ورىنباسارى مۇحتار قۇل-مۇحاممەد پەن قازاقستان حالقى اسسامبلەياسى توراعاسىنىڭ ورىنباسارى – قحا حاتشىلىعىنىڭ مەڭگەرۋشىسى ەرالى توعجانوۆ قول قويدى.
بەينەكونفەرەنتسيا پىشىمىندە وتكەن جيىنعا ءماجىلىس دەپۋتاتتارى مەن قازاقستاننىڭ بارلىق وڭىرىندەگى «نۇر وتان» پارتياسى مەن قحا فيليالدارىنىڭ مۇشەلەرى قاتىستى.
وتىرىستى اشقان م.قۇل-مۇحاممەد ەلباسىنىڭ وسى جىلدىڭ 24 ناۋرىزىندا وتكەن پارتيا ساياسي بيۋروسىنىڭ وتىرىسىندا «نۇر وتانعا» قحا-مەن بىرلەسىپ جۇمىس ىستەۋ جونىندە ارنايى تاپسىرما بەرگەنىن اتاپ ءوتتى. باسقوسۋدىڭ وسى تاپسىرمانى ورىنداۋ ماقساتىندا وتكىزىلىپ وتىرعانىنا نازار اۋدارعان ول: «تاۋەلسىزدىك جىلدارىنداعى جەتىستىكتەرىمىزدىڭ باسىم بولىگىنە ەلىمىزدەگى تىنىشتىقتىڭ, ساياسي تۇراقتىلىقتىڭ, ۇلتارالىق كەلىسىمنىڭ جانە حالىقتىڭ بەرەكە-بىرلىگىنىڭ ارقاسىندا قول جەتكىزدىك. ەلباسىمىز قازاقستان حالقى اسسامبلەياسى اتتى دۇنيەجۇزىنىڭ بىردە-ءبىر ەلىندە كەزدەسپەيتىن بىرەگەي ينستيتۋت قۇرۋدىڭ جانە ونى جۇزەگە اسىرۋدىڭ نەگىزگى باستاماشىسى بولدى. سونداي-اق, «نۇر وتان» پارتياسى دا ەڭ العاش قۇرىلعان كۇنىنەن باستاپ پرەزيدەنتىمىزدىڭ سارا ساياساتىن قولداپ كەلەدى. ياعني, ەلباسىن 1999 جىلى حالىقتىق سايلاۋدا قولداعان رەسپۋبليكالىق شتاب كەيىن «وتان» پارتياسى بولىپ قۇرىلعان ەدى. وسى ەكى ساياسي قۇرىلىم مەملەكەت باسشىسىنىڭ حالىقتىڭ بەرەكە-بىرلىگىن ساقتاۋ جونىندەگى باستى تىرەگى بولىپ ەسەپتەلەدى. سول سەبەپتى, «نۇر وتان» پارتياسى مەن قازاقستان حالقى اسسامبلەياسى ەلباسى ساياساتىنىڭ باستى باعىتى – ەلىمىزدەگى ساياسي تۇراقتىلىقتى, قوعامدىق جانە ۇلتارالىق كەلىسىم مەن بەرەكە-بىرلىكتى قامتاماسىز ەتۋ جولىندا بىرلەسىپ جۇمىس اتقارۋ كەرەك. سەبەبى, ءدال وسى قاسيەتتەر ەلىمىزدىڭ بارلىق جەتىستىگىنىڭ نەگىزى بولىپ سانالادى. اتالعان تاپسىرمالاردى ورىنداۋ ءۇشىن بۇگىن پارلامەنت ماجىلىسىندەگى اسسامبلەيا اتىنان سايلانعان دەپۋتاتتىق توپ مۇشەلەرى, پارتيا باسشىلىعى جانە وڭىرلەردەگى پارتيا مەن اسسامبلەيا فيليالدارىنىڭ باسشىلارى باس قوسىپ وتىر. وزدەرىڭىزگە بەلگىلى, «100 ناقتى قادام» ۇلت جوسپارىنىڭ IV باعىتى قازاقستان حالقىنىڭ بەرەكە-بىرلىگىنە ارنالعان. سونىڭ نەگىزىندە ءبىز بۇگىن اتالعان سالاعا قاتىستى ماسەلەلەردى بىرلەسە قاراپ, ءوزارا مەموراندۋمعا قول قويدىق. بۇل – ءبىزدىڭ الداعى ۋاقىتتا بىرلەسە اتقاراتىن جۇمىستارىمىزدىڭ باستى قۇجاتى بولادى», – دەدى.
ءوز كەزەگىندە ە.توعجانوۆ قاي كەزدە دە بىرىگىپ جاساعان جۇمىستىڭ جەمىستى, بىرلەسىپ شىعارعان شەشىمنىڭ ناتيجەلى بولاتىنىن ايتتى. «بيىل قازاقستان ەلى جانە حالقى ءۇشىن ەرەكشە جىل. ويتكەنى, بيىل تاۋەلسىز ەل اتانعانىمىزعا 25 جىل تولىپ وتىر. جالپى, تاۋەلسىزدىكتەن اسقان قۇندىلىق, ارتىق قاسيەت جوق. سوندىقتان ونى نىعايتۋعا ءار قازاقستاندىق اتسالىسۋى ءتيىس. وسى رەتتە قوعامدىق كەلىسىمدى نىعايتۋ, سول ارقىلى مەملەكەتىمىزدىڭ تۇراقتى دامۋىن قامتاماسىز ەتۋ نەگىزىندە عانا ءبىز ەلدىگىمىزدىڭ ىرگەسىن بەكەمدەپ, ەركىندىگىمىزدى نىعايتۋعا تىكەلەي اسەر ەتە الامىز. ويتكەنى, ءبىزدىڭ دامۋىمىزدىڭ نەگىزى باستى ءۇش تۇعىر – ەلباسى, قازاقستان حالقى جانە تاۋەلسىزدىكپەن تىكەلەي بايلانىستى. بۇگىن بىرلەسىپ جۇمىس ىستەۋگە بەل بۋىپ وتىرعان ەكى ساياسي قۇرىلىمنىڭ دا باسشىسى نۇرسۇلتان نازارباەۆ ەكەنىن بىلەمىز. سونداي-اق, تاۋەلسىزدىكتىڭ العاشقى كۇنىنەن باستاپ ەلدىك, ۇلتتىق جانە بىرلىك ساياساتى ەلباسىنىڭ جىگەرى ارقىلى بۇكىل قازاقستان مەملەكەتىنىڭ باسىم باعىتى رەتىندە ەنگىزىلدى. سوندىقتان بۇگىنگى ءىس-شارامىزدىڭ باستى ماقساتى – قازىرگى بىرلىگىمىزدى ودان ءارى نىعايتۋ بولىپ تابىلادى», – دەدى قحا توراعاسىنىڭ ورىنباسارى.
سونىمەن قاتار, ە.توعجانوۆ «ماڭگىلىك ەل» يدەياسىن قابىلداعان كەزدە ەلباسى نەگىزگى 7 باعىتتى بەلگىلەپ بەرگەنىن تىلگە تيەك ەتىپ, سونىڭ ىشىندەگى باستى قۇندىلىق تاۋەلسىزدىك پەن بىرلىك ەكەنى اتاپ كورسەتىلگەنىنە قاتىسۋشىلاردىڭ نازارىن اۋداردى. سوندىقتان الداعى ۋاقىتتا وسى باعىتتاعى جۇمىس قارقىنىمىزدى كۇشەيتىپ, ەلىمىزدەگى پارتيالاردىڭ بىرەگەيى – «نۇر وتان» پارتياسىمەن قويان-قولتىق جۇمىس ىستەيتىنىن ايتقان ە.توعجانوۆ «بىرلەسكەن جۇمىسىمىزدىڭ ءبىرىنشى باعىتى تاۋەلسىزدىكتىڭ 25 جىلدىعىن لايىقتى دەڭگەيدە اتاپ ءوتۋ اياسىنداعى ءىس-شارالار بولسا, ەكىنشىسى – «ماڭگىلىك ەل» يدەياسىنداعى باسىمدىقتاردى حالىق اراسىندا كەڭىنەن ناسيحاتتاۋ. سونداي-اق, «100 ناقتى قادام» ۇلت جوسپارىندا قابىلدانعان بەس رەفورمانىڭ ىشىندەگى ءتورتىنشىسى – «بىرتەكتىلىك پەن بىرلىككە» قاتىستى ەلباسىنىڭ ناقتى تاپسىرمالارىن بىرلەسىپ جۇزەگە اسىرامىز. ودان بولەك, تاياۋدا عانا مەملەكەت باسشىسىنىڭ قاتىسۋىمەن وتكەن قازاقستان حالقى اسسامبلەياسىنىڭ XXIV سەسسياسىندا قابىلدانعان «ماڭگىلىك ەل» پاتريوتتىق اكتىسىن حالىققا ءتۇسىندىرۋ جۇمىستارىن ءجۇرگىزەمىز», – دەدى.
بىرلەسكەن ءىس-شارالار جوسپارىنىڭ ماڭىزدىلىعىنا توقتالعان پارلامەنت ءماجىلىسىنىڭ دەپۋتاتى, «نۇر وتان» پارتياسى جانىنداعى «ميراس» رەسپۋبليكالىق قوعامدىق كەڭەسىنىڭ مۇشەسى قۋانىش سۇلتانوۆ شيرەك عاسىر بۇرىن بۇگىنگى كۇنىمىزدىڭ مۇمكىن ەمەستەي كورىنگەنىن ايتتى. «تاۋەلسىزدىك العاننان كەيىن قازىرگى كۇنىمىزگە قانداي جولمەن, قانداي رەفورمالارمەن جەتەمىز دەپ تولعاندىق. سول قول جەتپەستەي كورىنگەن ارمان كۇنىمىز بۇگىندە ەلباسى نۇرسۇلتان نازارباەۆتىڭ كورەگەندىگىنىڭ ارقاسىندا مۇمكىن بولىپ وتىر. بۇل پرەزيدەنتىمىزدىڭ ءوزىنىڭ دە ارمانى ەدى. سول ارمانىن حالقىنا جاريالاعان ەلباسى ەلىن ارتىنان ەرتىپ, قازاقستاندى وسىنداي بەيبىتشىلىگى مەن بىرلىگى جاراسقان تاۋەلسىز مەملەكەتكە اينالدىردى. سوندىقتان بۇكىل حالىق بولىپ وسى شيرەك عاسىرلىق تويىمىزدى ابىرويمەن اتاپ ءوتۋىمىز كەرەك», – دەدى ق.سۇلتانوۆ.
پارلامەنت ءماجىلىسىنىڭ دەپۋتاتى, قحا دەپۋتاتتىق توبىنىڭ جەتەكشىسى, «نۇر وتان» پارتياسى ساياسي كەڭەسىنىڭ مۇشەسى ساۋىتبەك ابدراحمانوۆ تا كەلىسىپ پىشكەن توننىڭ كەلتە بولمايتىنىنا ءمان بەردى. «پرەزيدەنتىمىز ءبىر سوزىندە: «قازاقستاننىڭ باستى بايلىعى – جەردىڭ استىندا دا ەمەس, جەردىڭ ۇستىندە دە ەمەس, قازاقستاندىقتاردىڭ جۇرەگىندە», – دەپ شەگەلەپ ايتقان بولاتىن. راسىندا دا, ءبىزدىڭ باستى بايلىعىمىز – بىرلىگىمىز, بىرلىك ارقىلى جاساپ جاتقان تىرلىگىمىز جانە سول تىرلىكتىڭ ارقاسىندا بۇكىل الەمگە كورسەتىپ وتىرعان ىرىلىگىمىز. وسىنىڭ بارلىعى اينالىپ كەلگەندە قوعامدىق كەلىسىمگە كەلىپ تىرەلەدى. قوعامدا كەلىسىم بار جەردە بارلىق ماسەلە شەشىلەدى, كەز كەلگەن ءتۇيىن تارقاتىلادى جانە ءار سالادا ىلگەرىلەۋ بولادى. سول سەبەپتى, الەمدە جوق ينستيتۋت, «نازارباەۆتىڭ نوۋ-حاۋى» دەپ بۇكىل الەمدە مويىندالاتىن قازاقستان حالقى اسسامبلەياسى «نۇر وتان» پارتياسىمەن ءاردايىم بىرگە قادام باسىپ, ءبىر ىرعاقپەن جۇمىس جاسايدى. اسسامبلەيانىڭ ماجىلىستەگى دەپۋتاتتىق توبىندا «نۇر وتاننان» بولەك, «اق جول» مەن قازاقستان كوممۋنيستىك حالىق پارتياسىنىڭ فراكتسيالارى دا بار. وسى ارقىلى بىرەگەي پارتياارالىق ديالوگ جاساۋعا جول اشىلىپ وتىر», – دەدى س.ابدراحمانوۆ.
بىرلەسكەن جۇمىس جونىندە ءوز پىكىرىن ءبىلدىرگەن قحا كەڭەسىنىڭ مۇشەسى, «نۇر وتان» پارتياسى ساياسي كەڭەسىنىڭ مۇشەسى, ل.ن.گۋميلەۆ اتىنداعى ەۇۋ قحا كافەدراسىنىڭ مەڭگەرۋشىسى اناتولي باشماكوۆ: «بۇگىنگى بەكىتىلگەن بىرلەسكەن ءىس-شارالار جوسپارى – رۋحاني جانە ساياسي رەسۋرستارعا باي, اسا ماڭىزدى قۇجات. ول ەلباسى تاپسىرعان تۇراقتى دامۋ مەن قازاقستاندىق بىرەگەيلىكتى جۇزەگە اسىرۋدى قامتاماسىز ەتەتىن نەگىزگى بازا بولادى دەپ سەنەمىن. قازىرگى تاڭدا الەمنىڭ ءار تۇكپىرىندەگى ۇستانىمدارى مەن باعىتتارى بولەك عالىمدار, ساياساتكەرلەر جانە قايراتكەرلەر بۇگىنگى جاھاندىق وركەنيەتتى العا جىلجىتاتىن ءنارسە ليبەرالدى, سوتسيال-دەموكراتيالىق نەمەسە كونسەرۆاتيۆتى يدەولوگيالار ەمەس, ءبىرىنشى كەزەكتە ازاماتتىق بىرەگەيلىك ەكەنىنە كوز جەتكىزدى. ال ەگەر ونداي قاسيەت مەملەكەتتە بولماسا, ول ەلدىكتىڭ ىرگەسىنە سىزات تۇسىرەتىنى دە بۇگىندە دالەلدەندى. بۇعان مىسال رەتىندە, ليۆيا, سيريا, ۋكراينا سىندى تۇراقسىزدىق جايلاعان ەلدەردى ايتۋعا بولادى. سوندىقتان دا ەلباسىمىز ءار سوزىندە بەرەكە مەن بىرلىكتى نىعايتۋ كەرەكتىگىن ايتىپ, حالىقتى سوعان شاقىرىپ كەلەدى. وسى باعىتتاعى جۇمىستاردى جانداندىرۋ ءۇشىن ەلىمىزدەگى پارتيالاردىڭ كوشباسشىسى «نۇر وتان» مەن قازاقستان حالقى اسسامبلەياسىنىڭ كۇش بىرىكتىرۋى تەك قولداۋعا تۇرارلىق باستاما ەكەنىن ايتقىم كەلەدى. بۇل رەتتە ەكى قۇرىلىمنىڭ مۇنداي تاجىريبەسى بۇرىننان بار ەكەنى دە بۇگىنگى باستامانىڭ جەمىستى بولارىنا سەندىرەدى. سوندىقتان قابىلدانعان قۇجات نەگىزىندە اتقارىلاتىن جۇمىستاردىڭ باسىم باعىتىن حالىققا ناسيحاتتاپ, لايىقتى تۇردە ءتۇسىندىرۋىمىز كەرەك», – دەدى.
ءىس-شارا بارىسىندا وڭىرلەردەگى پارتيا جانە قحا فيليالدارىنىڭ جەتەكشىلەرى تىكەلەي بەينەبايلانىسقا شىعىپ, ءوز وڭىرلەرىندە اتقارىلعان جۇمىستار جونىندە ايتىپ بەردى. سولاردىڭ ءبىرى وڭتۇستىك قازاقستان وبلىسى قازاقستان حالقى اسسامبلەياسى حاتشىلىعىنىڭ مەڭگەرۋشىسى ءمۇراتالي قالمۇراتوۆ «نۇر وتان» پارتياسى مەن قحا سىندى بەدەلدى ەكى ينستيتۋتتىڭ بىرلەسىپ جۇمىس جاساۋى زاڭدىلىق ەكەنىن ايتتى. «قازاقستان حالقى اسسامبلەياسى – جەر بەتىندە بالاماسى جوق كونستيتۋتسيالىق ورگان. بۇل جونىندە الەمدىك قاۋىمداستىقتىڭ بەلگىلى ساراپشىلارى ءاردايىم ايتىپ ءجۇر. ال «نۇر وتان» ءوزىنىڭ ەلىمىزدەگى كوشباسشى پارتيا ەكەنىن سوڭعى 17 جىل ىشىندە ەرەكشە ۇعىندىرىپ, ايرىقشا اڭعارتتى. ناۋرىز ايىندا وتكەن پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋىنا وبلىستاعى سايلاۋشىلاردىڭ 85,06 پايىزى قاتىسسا, سونىڭ 82 پايىزدان استامى «نۇر وتان» پارتياسىن تاڭدادى. بۇل كوشباسشى ۇيىمنىڭ وڭتۇستىك جۇرتشىلىعى اراسىنداعى بەدەلى مەن مارتەبەسىنىڭ شىنايى جوعارى ەكەنىن بىلدىرەدى», – دەدى ول.
ونىڭ سوزىنە قاراعاندا, جىل باسىنان بەرى وڭىردەگى ەتنوسارالىق بىرلىك پەن قوعامدىق كەلىسىمدى ناسيحاتتاۋ, ءوزارا تۇسىنىستىك پەن قۇرمەتتى نىعايتۋ باعىتىندا وبلىستىق دەڭگەيدە 32 ءىس-شارا ۇيىمداستىرىلىپتى. سولاردىڭ ىشىندە «قازاق ەلىنە مىڭ العىس», «دوستىق سىيى» سىندى شارالاردىڭ شوقتىعى بيىك. جىل سوڭىنا دەيىن تاعى 70-كە جۋىق كەڭ كولەمدەگى ءىس-شارالار وتكىزۋ جوسپارلانۋدا ەكەن.
سونىمەن قاتار, «نۇر وتان» پارتياسى قاراعاندى وبلىستىق فيليالى توراعاسىنىڭ ءبىرىنشى ورىنباسارى قاديشا وسپانوۆا دا بايلانىسقا شىعىپ, ەل بىرلىگىن نىعايتۋ جولىندا وڭىردە اتقارىلعان جۇمىستارعا توقتالىپ ءوتتى. وسى رەتتە قاراعاندى وبلىسى 100-دەن استام ۇلت وكىلى تاتۋ-ءتاتتى ءومىر ءسۇرىپ جاتقان, ۇلتتار دوستىعى مەن قوعامدىق كەلىسىمنىڭ جارقىن ۇلگىسى بولىپ تابىلاتىن ەلىمىزدەگى كوپۇلتتى وڭىرلەردىڭ ءبىرى ەكەنىن اتاپ وتكەن ءجون. ق.وسپانوۆانىڭ ايتۋىنشا, وبلىستىڭ پارتيالىق قۇرىلىم مەن قحا-نىڭ بىرلەسىپ جۇمىس ىستەۋى جولىندا ايتارلىقتاي تاجىريبەسى بار. وڭىردەگى 74 ەتنومادەني بىرلەستىك بارلىق پارتيالىق ءىس-شاراعا بەلسەندى قاتىسىپ كەلەدى. سونداي-اق, «جاس وتان» جاستار قاناتىنىڭ بەلسەندىلەرى وڭىردەگى سوعىس ارداگەرلەرىنە كومەكتەسۋدى داستۇرگە اينالدىرعان. سوندىقتان ق.وسپانوۆا جاڭادان بەكىتىلگەن بىرلەسكەن ءىس-شارالار جوسپارى وسى جۇمىستاردى ودان ءارى جانداندىراتىنىنا سەنىم ءبىلدىردى.
جالپى, «نۇر وتان» پارتياسى مەن قحا اراسىنداعى جۇمىس بارلىق دەڭگەيدە ءبىر-ءبىرىمەن قاناتتاسا جۇرگىزىلىپ جاتقانى انىق. ونى پارلامەنتتەگى ەڭ ۇلكەن دەپۋتاتتىق توپتان باستاپ, ەكى قۇرىلىمنىڭ جاستار قاناتىنىڭ جۇمىستارىنان دا بايقاۋعا بولادى. وسى ماسەلەنى تىلگە تيەك ەتكەن قحا مۇشەسى, پاۆلودار وبلىسى قحا جاستار ۇيىمى ءۇيلەستىرۋ كەڭەسىنىڭ ءتورايىمى, «نۇر وتان» پارتياسى ساياسي كەڭەسىنىڭ مۇشەسى ەلينا پاۋلي الداعى ۋاقىتتا ەكى جەتەكشى ۇيىمنىڭ بايلانىسىن نىعايتۋعا ەلىمىزدەگى جاستار ءوز ۇلەستەرىن قوساتىنىن ايتتى.
وتىرىس سوڭىندا بىرلەسكەن ءىس-شارالار جوسپارى بەكىتىلدى. اتالعان جوسپار جىلدىڭ سوڭىنا دەيىنگى مەرزىمدى قامتىعان. وعان ونداعان جۇمىس باعىتتارى ەنگەنىن ايتا كەتەيىك. قۇجاتتا «قازاقستان-2050» ستراتەگياسىن ءتيىمدى جۇزەگە اسىرۋ, «100 ناقتى قادام» ۇلت جوسپارى مەن «نۇرلى جول» پرەزيدەنتتىك باعدارلاماسىن ىلگەرىلەتۋ, قحا دەپۋتاتتىق كورپۋسى مەن «نۇر وتان» پارتياسى فراكتسياسىنىڭ پارلامەنتتەگى ءوزارا بايلانىسى; ساراپتامالىق جانە پىكىر الماسۋ الاڭدارىن ۇيىمداستىرۋ, قحا دوستىق ۇيلەرى مەن پارتيانىڭ قوعامدىق قابىلداۋلارى نەگىزىندەگى ارىپتەستىك, الەۋمەتتىك ماڭىزى بار جوبالاردى بىرلەسىپ جۇزەگە اسىرۋ جانە قحا بازاسىندا قايىرىمدىلىق شارالارىن ۇيىمداستىرۋ سياقتى باعىتتارعا ايرىقشا كوڭىل بولىنگەن.
جولدىباي بازار,
ەلامان قوڭىر,
«ەگەمەن قازاقستان»
* قاتىسۋشىلار لەبىزى
سەرىك سەيدۋمانوۆ,
پارلامەنت ءماجىلىسىنىڭ دەپۋتاتى:
– بۇگىن «نۇر وتان» پارتياسى مەن قازاقستان حالقى اسسامبلەياسى بيىلعى جىلعا ارنالعان بىرلەسكەن ءىس-شارالار جوسپارىن قابىلداعانىنا كۋا بولدىق. بۇل ءوز كەزەگىندە الدا تۇرعان مىندەتتەردى جۇزەگە اسىرۋعا مول مۇمكىندىكتەر بەرەدى. ناقتىلاي ايتقاندا, وسى قابىلدانعان جوسپار ەلىمىزدەگى تۇراقتىلىق پەن ورنىقتى دامۋدى قامتاماسىز ەتۋ باعىتىنداعى جۇمىستاردى ودان ءارى جانداندىرا تۇسەدى دەپ ويلايمىن.
بيىل ەلىمىزدىڭ تاۋەلسىزدىگىنە 25 جىل تولىپ وتىر. مىنە, وسىناۋ قادىرى بيىك, ءمان-ماڭىزى جوعارى تاۋەلسىزدىك تويىن ءوز دەڭگەيىندە اتاپ وتۋگە بارلىعىمىز دا اتسالىسۋىمىز كەرەك. وسى ورايدا قازاقستان حالقى اسسامبلەياسى مەن «نۇر وتان» پارتياسى ەلباسى نۇرسۇلتان نازارباەۆتىڭ تاپسىرمالارىنان تۋىنداعان اۋقىمدى مىندەتتەردى ىنتىماقتاسا وتىرىپ جۇزەگە اسىرۋعا نيەت ءبىلدىرۋى قۇپتارلىق جايت. ەلىمىزدە جاسامپاز ىستەردىڭ مول بولۋى بارشامىزدى قۋانتادى. ال وسى باعىتتاعى جۇمىستاردى بىرلەسە اتقارۋ جاقسى ناتيجە كورسەتەتىنى انىق.
شايماردان نۋرۋموۆ,
پارلامەنت ءماجىلىسىنىڭ دەپۋتاتى:
– «نۇر وتان» پارتياسى مەن قازاقستان حالقى اسسامبلەياسى – ەلىمىزدىڭ بىرلىگى مەن ىنتىماعىنىڭ نىعايۋىنا وراسان زور ۇلەس قوسىپ كەلە جاتقان ىرگەلى ۇيىمدار. قالىپتاسقان وسى ەكى ينستيتۋت قازاقستاننىڭ بۇگىنى مەن ەرتەڭىنە قاتىستى اۋقىمدى شارالاردىڭ ۇنەمى بەل ورتاسىندا جۇرەتىنىنە حالىق كۋا.
مىنە, بۇگىن دە ەل يگىلىگى ءۇشىن بىرلەسە قيمىلداۋدىڭ اسا قاجەتتىگىن العا تارتىپ, ماڭىزدى جوسپار قابىلدادى. بۇل جوسپاردا كوپتەگەن ماسەلەلەر قامتىلىپ وتىر. ونىڭ بارلىعى قازاقستاندىقتار ءۇشىن وتە ماڭىزدى.
ماسەلەن, تاۋەلسىزدىگىمىزدىڭ 25 جىلدىعىن لايىقتى تويلاۋعا اتسالىسۋ ء–بارىمىزدىڭ بورىشىمىز. ال وسى باعىتتاعى نەگىزگى جۇمىستاردى جۇيەلى تۇردە جۇزەگە اسىرۋ – ەلىمىز ءۇشىن ابىروي. وسى ايتۋلى شارادا قازاقستاننىڭ تاۋەلسىزدىك جىلدارىندا قول جەتكىزگەن تابىسى ايقىن كورىنىس بەرۋى كەرەك دەپ ويلايمىن. سوندىقتان, وسىناۋ ءىرى شارانى وتكىزۋگە اتسالىسۋدا «نۇر وتان» پارتياسى مەن قازاقستان حالقى اسسامبلەياسى ءوزارا كۇش بىرىكتىرۋى وتە دۇرىس.
اينالىپ كەلگەندە, مۇنىڭ بارلىعى ەلدىڭ يگىلىگىن كوزدەيدى.
اباي تاسبولاتوۆ,
پارلامەنت ءماجىلىسىنىڭ دەپۋتاتى:
– قازاقستان حالقى اسسامبلەياسى مەن «نۇر وتان» پارتياسى بۇگىن بيىلعى جىلعا ارنالعان بىرلەسكەن ءىس-شارالار جوسپارىن بەكىتۋىنىڭ ماڭىزى ايتارلىقتاي. قابىلدانعان قۇجاتتا «قازاقستان-2050» ستراتەگياسىن, «100 ناقتى قادام» ۇلت جوسپارى مەن «نۇرلى جول» باعدارلاماسىن جانە وزگە دە ماڭىزدى ماسەلەلەردى ءوز دەڭگەيىندە جۇزەگە اسىرۋ كوزدەلگەن. سونىمەن قاتار, ەلباسى ۇسىنعان «ماڭگىلىك ەل» يدەياسى اياسىندا اتقارىلۋى ءتيىس كوپتەگەن جۇمىستار دا بۇگىنگى جوسپاردا بارىنشا قامتىلعان.
بۇعان قوسا, تاۋەلسىزدىگىمىزدىڭ 25 جىلدىعىن لايىقتى اتاپ ءوتۋ بارشا قازاقستاندىقتارعا ۇلكەن جاۋاپكەرشىلىك جۇكتەيدى. وسىعان بايلانىستى «نۇر وتان» پارتياسى مەن قازاقستان حالقى اسسامبلەياسى ءوزارا بىرلەسىپ, حالىقپەن تىعىز قارىم-قاتىناستا جۇمىس ىستەۋگە قۇلشىنىس بىلدىرۋدە. بۇل ءوز كەزەگىندە ەلىمىزدىڭ بىرلىگىن نىعايتا ءتۇسۋ باعىتىنداعى جۇمىستاردىڭ ناتيجەلى بولۋىنا ىقپالىن تيگىزەدى دەپ ويلايمىن.
فاحريددين قاراتاەۆ,
پارلامەنت ءماجىلىسىنىڭ دەپۋتاتى:
– بيىل تاۋەلسىزدىگىمىزگە 25 جىل تولعالى وتىر. وسى ارالىقتا مەملەكەت باسشىسى نۇرسۇلتان نازارباەۆتىڭ ساليقالى ساياساتىنىڭ ارقاسىندا كوپتەگەن يگى جۇمىستار اتقارىلدى. مۇنىڭ بارلىعى وتانداستارىمىزدىڭ ماقتانىشىن وياتادى.
قازىرگى تاڭدا ءبىزدىڭ قوعامىمىز بىرلىك پەن تاتۋلىقتىڭ جەمىسىن كورۋدە. قازاقستاندى ىنتىماقتى ەل رەتىندە بۇكىل الەم مويىندايدى. مىنە, وسىنداي تابىستارىمىزدى ودان ءارى ورىستەتە ءتۇسۋ بارلىعىمىزدىڭ قاسيەتتى بورىشىمىز بولۋى كەرەك.
وزدەرىڭىز كۋا بولعانداي, بۇگىن «نۇر وتان» پارتياسى مەن قازاقستان حالقى اسسامبلەياسى بيىلعى جىلعا ارنالعان ماڭىزى زور, اۋقىمى كەڭ جوسپار بەكىتىپ, الداعى مىندەتتەردى پىسىقتاپ الدى. بۇل بىرلەسكەن ءىس-قيمىل جوسپارىنىڭ ءتۇزىلۋى قۇپتارلىق ءىس بولدى. جالپى, وسى قۇجات «ماڭگىلىك ەل» يدەياسىنىڭ قۇندىلىقتارىن قوعامىمىزدا نىعايتۋعا جاڭاشا سەرپىن بەرەتىنىنە سەنەمىن. مۇنداعى قاراستىرىلعان باعىتتاردىڭ بارلىعى دا ءبىز ءۇشىن ماڭىزدى.
ساۋىتبەك ابدراحمانوۆ,
پارلامەنت ءماجىلىسىنىڭ دەپۋتاتى:
– قازاقستان حالقى اسسامبلەياسى ەلىمىزدەگى بارلىق الەۋمەتتىك توپتى قامتيدى. سونداي-اق, بارلىق ەتنوستىڭ باسىن بىرىكتىرەدى. ال «نۇر وتان» پارتياسى – ەلىمىزدەگى نەگىزگى ساياسي كۇش. وسى ەكى الەۋەتتى كۇشتىڭ بىرىگىپ, جۇيەلى جۇمىس جونىندە ارناۋلى جوسپار جاساۋى, ونى وسىنداي جاعدايدا بەكىتۋى وتە ورىندى. سول ءبىرلەسكەن ءىس-شارالار جوسپارىنداعى مىندەتتەردىڭ ناقتى ورىندالۋىنا اسسامبلەيانىڭ پارلامەنت ماجىلىسىندەگى دەپۋتاتتىق توبى لايىقتى دەڭگەيدە اتسالىسادى.
بۇل جوسپاردا ءوزىن ءوزى باسقارۋ جۇيەسىن دامىتۋ, ازاماتتىق قوعام ينستيتۋتتارىن نىعايتۋ سىندى بىرقاتار ماسەلە قامتىلعان. سونىمەن قاتار, حالىقتىڭ ازاماتتىق بەلسەندىلىگىن ارتتىرۋ تەتىگى دە نازاردان تىس قالعان جوق. وسى رەتتە بۇل ەكى قۇرىلىم قۇستىڭ قوس قاناتىنداي ەكەنىن اتاپ وتكەن ءجون. سەبەبى, ەكەۋىنىڭ دە نەگىزگى ماقساتى – حالىقتىڭ بىرلىگىن نىعايتۋ, ەلدىڭ دامۋ جولىنداعى تەتىكتەردى ىسكە قوسۋ. سوندىقتان تىزە قوسىپ جۇمىس ىستەۋدىڭ ەل كەلەشەگى ءۇشىن ماڭىزى جوعارى.
ناتاليا جۇمادىلداەۆا,
پارلامەنت ءماجىلىسىنىڭ دەپۋتاتى:
– كۇش بىرىكتىرىپ وتىرعان ەكى ۇيىمنىڭ ءبىرىنشى باسشىسى – ەلباسىمىز. بۇل اسسامبلەيا مەن پارتيانىڭ باستى ماقساتى ءبىر دەگەندى بىلدىرەدى. ال ماقسات-ءمۇددەسى ورتاق تاراپتار بىرىككەن كەزدە, نەگىزگى ناتيجەنىڭ جەمىستى بولارى ءسوزسىز.
دۇنيەجۇزىندە قازاقستان حالقى اسسامبلەياسى سياقتى بىرلىك پەن تاتۋلىقتى ساقتاپ وتىرعان ەشقانداي ينستيتۋت جوق. الداعى ۋاقىتتا پارتيامەن بىرلەسە وتىرىپ, وسى باعىتتاعى جۇمىستاردى ودان ءارى جالعاستىرا بەرەمىز. ەندى ءبىزدىڭ الەۋەتىمىز ەكى ەسە ارتىپ, جۇمىس قارقىنى كۇشەيەدى.
جالپى, كەز كەلگەن ەكونوميكالىق رەفورمانى جۇزەگە اسىرۋ ءۇشىن تۇراقتىلىق پەن بىرلىككە جاۋاپتى ارنايى الاڭ بولۋى قاجەت. وسىنى ەسكەرگەن ەلباسىمىز تاۋەلسىزدىكتىڭ العاشقى جىلدارىندا-اق قازاقستان حالقى اسسامبلەياسىن قۇردى. ەلىمىزدىڭ بۇگىنگى جەتىستىكتەرىنىڭ بارلىعىندا وسى اسسامبلەيانىڭ ۇلەسى بار. سەبەبى, اتالعان قۇرىلىم ەلدەگى حالىقتىڭ بىرلىگىن ساقتاۋ ارقىلى, ەلدىكتىڭ ىرگەسىن بەكىتتى.
احمەد مۋرادوۆ,
پارلامەنت ءماجىلىسىنىڭ دەپۋتاتى:
– قازاقتا «بىرلىك بار جەردە تىرلىك بار» دەگەن اتالى ءسوز بار. وتانىمىز ءۇشىن, حالقىمىز ءۇشىن اتقارىلار يگى جۇمىستاردى ءوزارا اقىلداسىپ, كەڭەسە وتىرىپ تالقىلاپ, وڭدى شارالار قابىلداي ءبىلسەك, ۇتىلمايمىز.
وزدەرىڭىز بىلەسىزدەر, «نۇر وتان» پارتياسى قوعامىمىزدا ۇلكەن بەدەلگە يە. ەل-جۇرتپەن ەتەنە جۇمىس ىستەۋدىڭ جارقىن ۇلگىسىن كورسەتىپ ءجۇر. ال قازاقستان حالقى اسسامبلەياسىنىڭ اتقارىپ وتىرعان جۇمىسى, قوعامداعى ءرولى وتە زور. مىنە, وسى ەكى ءىرى ۇيىم جۇپتاسىپ, الدىمىزدا تۇرعان ايتۋلى شارالاردى بىرگە اتقارۋدى ءجون كورىپ وتىر.
مەنىڭ ويىمشا, «نۇر وتان» پارتياسى مەن قازاقستان حالقى اسسامبلەياسى حالىقپەن تىعىز بايلانىستا جۇمىس ىستەۋدە مول تاجىريبەسى بار. سونداي-اق, اۋقىمى كەڭ شارالاردى جۇزەگە اسىرۋدا ۇنەمى الدىڭعى ورىننان كورىنە بىلەدى. ەندەشە, «ماڭگىلىك ەل» يدەياسىن حالىققا ءتۇسىندىرىپ ناسيحاتتاۋدا, تاۋەلسىزدىگىمىزدىڭ 25 جىلدىعىن اتاپ ءوتۋ بارىسىندا اتالعان ەكى ۇيىم جاقسى ۇلگى كورسەتەدى دەپ ويلايمىن.
جۇماجان جۇكەنوۆ,
«نۇر وتان» پارتياسى رەسپۋبليكالىق قوعامدىق قابىلداۋ بولمەسىنىڭ مەڭگەرۋشىسى:
– جالپى, «نۇر وتان» پارتياسى قازاقستان حالقى اسسامبلەياسىمەن ءبىرگە كوپتەگەن جۇمىستار اتقارۋدا. ماسەلەن, پارتيامىز اسسامبلەيادان سايلانعان دەپۋتاتتارمەن بىرلەسە وتىرىپ, قوعامدىق قابىلداۋلار وتكىزىپ كەلەدى. مۇنداي ءۇردىس وڭىرلەردە دە جۇيەلى تۇردە قولعا الىنعان. وسىلايشا ەكى تاراپتىڭ ىنتىماقتاسا جۇمىس ىستەۋى ءوزىنىڭ تيىمدىلىگىن كورسەتۋدە.
بۇگىن ءبىزدىڭ پارتيامىز بەن اسسامبلەيا اراسىندا ساليقالى تالقىلاۋ بولىپ, سونىڭ ناتيجەسىندە بىرلەسكەن ءىس-شارالار جوسپارى قابىلداندى. مۇنىڭ قاجەت قۇجات ەكەنىنە كۇمان جوق. ويتكەنى, ەلباسى ساياساتىن ەل اراسىنا تۇسىندىرۋدە, «ماڭگىلىك ەل» يدەياسىن ناسيحاتتاۋدا, تاۋەلسىزدىگىمىزدىڭ 25 جىلدىعىن اتاپ وتۋدە قوعامىمىزداعى ىرگەلى قوس ينستيتۋتتىڭ كەلىسە وتىرىپ جۇمىس ىستەۋى ماڭىزدى.
پرەزيدەنتىمىز نۇرسۇلتان نازارباەۆ ءجۇرگىزىپ كەلە جاتقان ساليقالى ساياسات ءناتيجەسىندە حالقىمىزدىڭ اۋىزبىرشىلىگى نىعايىپ وتىر. تاتۋلىعىمىز – ءبىزدىڭ ەڭ باستى قۇندىلىقتارىمىزدىڭ ءبىرى. مۇنىڭ قادىرىن ەل-جۇرتىمىز جاقسى تۇسىنەدى.