استاناداعى «كورمە» كەشەنىندە «مادەني ازيادا» اياسىندا 29 قاڭتار مەن 4 اقپان ارالىعىندا كۇن سايىن ساعات 11.00-دەن 18.00-گە دەيىن «كوشپەندىلەر الەمى» اتتى ەتنو-مادەني لاندشافتىق شوۋ وتۋدە.
ازيا ويىندارى تەك قانا حالىقارالىق جارىستار عانا ەمەس, ەلدەر اراسىنداعى مادەني بايلانىستار دانەكەرى رەتىندە دە كەڭىنەن تانىمال. ويىندى وتكىزۋ قۇرمەتىنە يە بولعان ەل ازيادا الاۋىن قابىلداپ العان كۇننەن باستاپ, سپورتتىق جارىستار اياقتالعانشا شەتەلدىك قوناقتارعا مادەني-تاريحي قازىناسىن تانىستىرادى. وسى ءداستۇر بويىنشا ازيا ويىندارى اياسىندا ۇيىمداستىرىلعان كەڭ كولەمدى «مادەني ازيادانىڭ» ەڭ ماڭىزدى جوبالارىنىڭ ءبىرى – «كوشپەندىلەر الەمى» ەتنو-مادەني شوۋى.
كوشپەندىلەر الەمىن كورگەن دە كورمەگە كەلۋشىلەرگە اتا-بابالار ءومىرىنىڭ وسىدان مىڭداعان جىلدار بۇرىنعى ۇلى دالا بەينەسى كورىنىس بەرەدى. جوبا قوناقتارى ساحارا سوقپاقتارىمەن تاڭعاجايىپ الەمگە ساياحات جاساپ, كوشپەندىلەر مادەنيەتىنىڭ قايتالانباس ەرەكشەلىگىنە كۋا بولادى. ساياحاتشىلار جول-ءجونەكەي كەزبە مۋزىكانتتار ونەرىنە, ءتۇبى ءبىر تۇركى حالىقتارى – قىرعىزستان, ياكۋتيا, تاتارستان, وزبەكستاننان ارنايى شاقىرىلعان ايتۋلى ونەرپازداردىڭ جانە قازاقستانداعى ءارتۇرلى ءداستۇرلى مۋزىكا مەكتەپتەرىنىڭ دارىندى وكىلدەرىنىڭ كونتسەرتىن تاماشالايدى. سونداي-اق, شەت ەلدەردەن ەلىمىزگە يگى نيەتپەن كەلگەن قوناقتار كوز الدىندا ءوتىپ جاتقان كوشپەندى ءومىر كەرەمەتتەرىنە ءوزى ارالاسىپ, تىكەلەي قاتىسا دا الادى. مىسالى, ءداستۇرلى مۋزىكا اسپاپتارىن قولىنا ۇستاپ, تارتىپ كورۋىنە نەمەسە ءۇي تىگۋ, كيىز باسۋ جۇمىستارىنا ارالاسۋىنا بولادى. شوۋعا ارنايى دايىندالعان جولسەرىكتەر ولاردى ەسىكتەن كىرگەننەن سىي-قۇرمەتپەن كۇتىپ الىپ, قازاق, اعىلشىن تىلدەرىندە قازاقتىڭ تاريحى, مادەنيەتى جونىندە مالىمەتتەر بەرەدى.
«كوشپەندىلەر الەمىنە» ودان ءارى قاراي ساپار شەككەن جولاۋشىنى ات قۇلاعىندا ويناعان شاباندوز جىگىتتەردىڭ تاماشاسى كۇتەدى. قوناقتار ءوزدەرىنە قاقپاسىن ايقارا اشاتىن ەجەلگى قالادا عاجايىپ قولونەر تۋىندىلارىمەن تانىسا الادى. قازاقتىڭ ەجەلدەن كەلە جاتقان قىز ۇزاتۋ, بەتاشار, تۇساۋكەسەر, شاشۋ, بەسىككە سالۋ سياقتى سالت-ءداستۇرلەرىنەن حابار بەرەتىن تەاترلاندىرىلعان كورىنىستەر دە «كوشپەندىلەر الەمىنىڭ» ءارىن كىرگىزە تۇسۋدە.
داستان كەنجالين.