مۇز ايدىنىنا قوس كورەيانىڭ حوككەيشى قىزدارى ايانباي-اق قارجىستى. ءبىرىنشى كەزەڭدە سولتۇستىك كورەيا قۇراماسىنىڭ شابۋىلشىسى و چول وك 9-شى مينوتتە ەسەپ اشقانىمەن, اراعا 1,5 ءمينوت سالىپ ءوڭتۇستىكتىك قۇربىسى ليۋ كيۋ سۋن تەڭەستىردى. جاپونيا مەن قىتاي قۇراماسىن 10:0, قازاقستان قۇراماسىنان 11:0 ەسەبىمەن وڭباي ۇتىلىپ, كوڭىلدەرى جۇدەپ جۇرگەن قىزداردىڭ قۋانعانى-اي! بۇل ءۇش ويىندا ءبىرىنشى رەت سالعان گولى. الايدا, ويلاعاندارى بولمادى. سولتۇستىكتىڭ قىزدارى مىنەزدى, ءارى شەبەرلىكتەرى دە جوعارى ەكەن. ءۇش كەزەڭ بارىسىندا لي ەن سۋن, ۆون چول سۋن, و چول وك, رو سۋن بوك جانە ريۋ حون مي ەسەپتى 6:1-گە جەتكىزدى. قانى, تەگى ءبىر بولسا دا كەشە عانا ءبىر بىرىنە زەڭبىرەكتىڭ وقپانىن قاراتقان ەكى مەملەكەت قۇرامالارىنىڭ ويىنىن تاماشالاۋعا حالىقارالىق وليمپيادا كوميتەتىنىڭ توراعاسى جاك روگگە زايىبىمەن كەلدى. كەشە قازاقستان قۇراماسىنا سوققىلار سەرياسى ارقىلى گول بەرگەن جاپونيا قىتاي قۇراماسىمەن كۇش سىناستى. قاندارىندا سامۋرايلىق رۋحى بار جاپون قىزدارى جەڭسە دە, جەڭىلسە دە بەكزاتتىق مىنەزدەرىنەن تانبادى. كوماندا كاپيتانىنان باستاپ, جانكۇيەرلەرگە ىزەتپەن باس يگەن كۇنشىعىس ارۋلارى اسپان استى ەلىنەن كەلگەن حوككەيشى قۇربىلارىنا تابانداپ ۇرىس سالدى.
ءبىرىنشى كەزەڭ الما-كەزەك شابۋىلمەن ءوتتى. دەنە تۇرقى نازىكتەۋ جاپوندارعا قىتايلىق قىزدار قارا كۇشتى كوبىرەك قولداندى. ونىسى ناتيجە بەردى. گي حۋتينگ گول سوقتى. 1:0. ەكىنشى كەزەڭدە قىتايلاردىڭ تاڭداعان تاكتيكاسى وزدەرىنە سور بولىپ جابىستى. ەكى رەت ەكى بىردەي ويىنشىسى 2 مينوتتىك ايىپقا تارتىلىپ, جاپون بەستىگى سانسىراتىپ جىبەردى. قىتاي قاقپاشىسى حان دانني كوپ شايبانى قاقتى. اسپان استى ەلى قورعاۋشىلارىنىڭ ەستەرى شىققانى سونشالىق, قاقپاشىنىڭ ارتىنا ءوتىپ كەتىپ جاتتى. جاپوندار تاماشا ەكى گول سالدى. اوكي كاناە جانە تاموكو ساكاگامي. شەشۋشى ءۇشىنشى كەزەڭگە قىتايلار قاتتى كىرىستى. قىسپاققا الدى. كۇشكە سالدى. جاپوندار قىسىلعانىنان ءتارتىپ بۇزا باستادى. ەكى رەت تورتتىكپەن قالدى. قارسىلاستارى مۇنداي مۇمكىنشىلىكتى جىبەرمەدى. ەكى رەت گول سوقتى. 3:3. وۆەرتايم. 5 ءمينوت قوسىمشا ۋاقىت بەلگىلەندى. بۇل جولى جاپونداردىڭ جولى بولدى. №18 حوككەيشى تاموكو ساكاگامي گول سوعىپ, كوماندانى العا شىعاردى. ەسەپ 4:3, جاپوندار پايداسىندا.
قازاقستان, قىتاي جانە جاپونيا قۇرامالارىنىڭ اراسىنداعى تارتىس تاعى دا شيەلەنىستى. جارىس جەڭىمپازى 3 اقپان كۇنى عانا بەلگىلى بولادى.
باقتيار تايجان.