مەملەكەت باسشىسىنىڭ قازاقستان حالقىنا ۇندەۋى
قۇرمەتتى قازاقستاندىقتار!
قىمباتتى وتانداستار!
بۇگىن, 2011 جىلعى 31 قاڭتار كۇنى كونستيتۋتسيالىق كەڭەس اتا زاڭىمىزعا قازاقستان رەسپۋبليكاسى تۇڭعىش پرەزيدەنتىنىڭ وكىلەتتىگىن رەسپۋبليكالىق رەفەرەندۋم ارقىلى ۇزارتۋدى قاراستىراتىن وزگەرىستەر مەن تولىقتىرۋلار ەنگىزۋ تۋرالى زاڭنىڭ قۇقىقتىق تاعدىرى تۋرالى شەشىمىن شىعاردى.
پارلامەنت دەپۋتاتتارى بۇل زاڭدى رەفەرەندۋمدى قولداۋ جونىندەگى ۇندەۋگە قولدارىن قويعان بەس ميلليوننان استام قازاقستاندىقتىڭ قالاۋىن باسشىلىققا الا وتىرىپ قابىلداعان بولاتىن.
بۇل باستامانى مەن ءوز جارلىعىممەن قابىلداماي تاستادىم.
الايدا, پارلامەنت كونستيتۋتسيالىق قۇقىعىن پايدالانىپ, اتالعان زاڭدى قابىلدادى.
كونستيتۋتسيالىق كەڭەس پارلامەنت قابىلداعان شەشىمدى قاراپ, زاڭدى كونستيتۋتسياعا سايكەس كەلمەيدى دەپ تانىدى.
مۇنىمەن كونستيتۋتسيالىق كەڭەس وسى ماسەلەدە رەسپۋبليكالىق رەفەرەندۋم وتكىزۋ مۇمكىندىگىن جوققا شىعارمايدى.
مەن قابىلدانعان شەشىممەن كەلىسەمىن.
وسىلايشا, كۇردەلى ساياسي احۋال قالىپتاستى.
بۇل مەنى مەملەكەت باسشىسى رەتىندە تاريحي جاۋاپكەرشىلىكتiڭ بار جۇگىن موينىما الىپ, رەفەرەندۋمنىڭ تاعدىرى تۋرالى شەشىم قابىلداۋعا مىندەتتەيدى.
قىمباتتى وتانداستار!
مەن بۇكىلحالىقتىق سەنىم بىلدىرگەنى ءۇشىن بارشا قازاقستاندىقتارعا شىنايى ريزاشىلىعىمدى بىلدىرەمىن.
باستاماشى توپقا, دەپۋتاتتارعا جانە «قازاقستان-2020» دەموكراتيالىق كۇشتەردىڭ ءبۇكىلحالىقتىق كواليتسياسىنا العىس ايتامىن.
بۇل – ەكونوميكالىق دامۋ جانە ەلىمىزدى الەۋمەتتىك جاڭعىرتۋداعى باعدارىمىزعا ءبۇكىلحالىقتىق قۋاتتى قولداۋ مەن سەنىمنىڭ ايقىن ايعاعى.
مەن ءۇشىن ءوز حالقىمنىڭ قالتقىسىز قولداۋىنان ارتىق بيىك باعا بولمايدى.
باستاماشى توپتىڭ وسى ۇسىنىس ارقىلى ەلباسى وكىلەتتىگىن 10 جىلعا ۇزارتۋ عانا ەمەس, ەلىمىزدىڭ وركەندەۋى جانە قوعامدىق تۇراقتىلىقتى نىعايتۋ باعىتىنداعى ىرگەلى ىستەردى جالعاستىرۋدى كوزدەگەنىنە سەنەمىن.
ءبىر جاعىنان, مەن سايلاۋشىلاردىڭ باسىم كوپشىلىگىن قۇرايتىن بۇكىلحالىقتىق باستامانى كەرى قايتارا المايمىن.
ماسەلەنىڭ ەكىنشى قىرى, مەن ەلباسى جانە كونستيتۋتسيانىڭ كەپىلى رەتىندە بولاشاق ساياساتكەرلەرگە جاڭىلىس باعىت سىلتەيتىن ىسكە جول بەرە المايمىن.
سوندىقتان, مەنى حالىق دۇرىس تۇسىنەدى دەپ سەنەمىن.
ءبىز بۇل جايتتى جاي «قابىلداۋ نەمەسە باس تارتۋ» رەتىندە ەمەس, ءومىردىڭ ءوزى ۇسىنعان دەموكراتيانىڭ تاريحي تاعىلىمى دەپ قابىلداعانىمىز ءجون.
بۇل – ەلباسى مەن حالىقتىڭ اتا زاڭعا ادالدىعىن باعامدايتىن تاعىلىمدى ءدارىس.
دەموكراتيالىق جولمەن سايلانعان تۇڭعىش پرەزيدەنت رەتىندە ەلىمىزدىڭ بيىك ءمۇددەلەرىن باسشىلىققا الا وتىرىپ, مەن رەفەرەندۋم وتكىزبەۋ تۋرالى شەشىم قابىلدادىم.
جۇرتشىلىقتى بولەتىن «رەفەرەندۋم الدە سايلاۋ» دەگەن تاڭداۋدىڭ ورنىنا مەن حالقىمىزدىڭ ەركى مەن دەموكراتيالىق قاعيداتتارعا ادالدىعىن ەسكەرەتىن جانە ءبىزدى بىرىكتىرەتىن جولدى ۇسىنامىن.
مەن وكىلەتتىگىمنىڭ ەكى جىلعا قىسقاراتىنىنا قاراماستان, مەرزىمىنەن بۇرىن پرەزيدەنت سايلاۋىن وتكىزۋ تۋرالى ۇسىنىس ەنگىزەمىن.
ءتيىستى زاڭ پارلامەنتكە ۇسىنىلادى.
قادىرلى قازاقستاندىقتار!
سىزدەردىڭ قولداۋلارىڭىز مەن ءۇشىن مەملەكەت پەن حالىق مۇددەسى جولىندا قاشاندا سەنىم مەن شىندىقتان اينىماي قىزمەت ەتۋگە كۇش بەرەتىن باستاۋ بولادى.
الدىمىزدا ءالى اتقارىلاتىن قىرۋار ىستەر بار.
ءبىز يندۋستريالىق-يننوۆاتسيالىق جانە الەۋمەتتىك جاڭعىرتۋ باعدارلامالارىن باتىل ىسكە اسىرۋدامىز.
بىرگە كەڭەسە وتىرىپ ويعا العان جوسپارلارىمىزدى ىسكە اسىرامىز جانە وتانىمىزدى گۇلدەندىرە تۇسەمىز دەپ كامىل سەنەمىن.
ءبىز كەمەل كەلەشەگىمىزدىڭ بەرىك ىرگەسىن بىرگە قالايمىز!