تاراز مەملەكەتتىك پەداگوگيكالىق ينستيتۋتىندا «جالپى پەداگوگيكا جانە پسيحولوگيا» كافەدراسىنىڭ ۇيىمداستىرۋىمەن قازاق قىزىنىڭ بولمىسىن, بەينەسىن, ادامگەرشىلىك, رۋحاني قۇندىلىقتارىن قالىپتاستىرۋ ماقساتىندا «بۇگىنگى قازاق قىزى. ءسىز قاندايسىز؟» تاقىرىبىندا وn-line رەسپۋبليكالىق cەمينار-پىكىرتالاس ءوتتى.
– جەر بەتىندەگى كەز كەلگەن حالىقتىڭ ءوز الدىنا ۇلت بولىپ ۇيىسۋىنا, جەكە حالىق, ەگەمەن ەل, دەربەس مەملەكەت بولىپ قالىپتاسۋىنا ايەل-انالاردىڭ سىڭىرەر ەڭبەگى وراسان زور. ەندەشە, ۇرپاق تاربيەسى, سونىڭ ىشىندە قىز بالا تاربيەسى – ۇلتتىڭ تاعدىرى. ءوز ۇرپاعىنا دۇرىس جول كورسەتە العان ۇلت قانا ءوز تاعدىرىن ءوزى ويداعىداي قامداي الماق, – دەيدى بۇل جونىندە اتالمىش ينستيتۋتتىڭ جالپى پەداگوگيكا جانە پسيحولوگيا كافەدراسىنىڭ مەڭگەرۋشىسى ك.بۇزاۋباقوۆا.
قازاقتار ادەتتە ەلگە كەلىن بولىپ تۇسكەن قىز اۋىلىنىڭ بارلىق جاقسى قاسيەتتەرىن, رۋحاني-مورالدىق قۇندىلىقتارىن وزىمەن بىرگە الا كەلىپ, تابالدىرىعىن اتتاعان بوساعاسىنىڭ يگىلىگىنە, قالا بەردى بۇكىل ەلگە سىڭىرگەن. سوندىقتان قىز تاربيەلى بولسا, كەلىن ونەگەلى بولارى انىق.
– بۇگىنگى قىز بالا تاربيەسى قوعامدا وزەكتى ماسەلەلەردىڭ بىرىنە اينالىپ وتىر. سەبەبى, ۇلتتىڭ نامىسى, ابىرويى قىز بالانىڭ تاربيەسىنە كەلىپ تىرەلەدى, – دەيدى قازاق مەملەكەتتىك قىزدار پەداگوگيكالىق ۋنيۆەرسيتەتى پەداگوگيكا جانە پسيحولوگيا فاكۋلتەتىنىڭ دەكانى, پروفەسسور س.جيەنباەۆا. – قازىرگى قازاق قىزى تۋرالى ءسوز قوزعاعاندا, قازاق حالقى قىز بالادان نە كۇتەدى؟ قانداي ماقسات قويادى؟ اتا-بابامىز قىزدارىن قالاي ارداقتاعان؟ حالقىمىزدىڭ قىز بالالار تاربيەسىنىڭ الدىنا قويعان ماقساتى – ۇلتتىڭ ارىن ساقتايتىن ارۋلار تاربيەلەپ ءوسىرۋ. دەمەك, «قىزعا قىرىق ۇيدەن تىيۋ» دەگەن ماقالدى ۇستانا وتىرىپ, بويجەتكەننىڭ تاربيەسىندەگى تالاپقا, بۇكىل قوعام بولىپ اتسالىسۋىمىز قاجەت.
ءيا, شىنىندا قىز بالانىڭ ادەپتەن وزباي, يناباتتى بولعانى جاقسى. اتا-بابالارىمىز قىزدى جاقسى كورۋدىڭ, قادىرلەۋدىڭ عاسىرلار بويى قالىپتاسىپ قالعان وزىندىك مەنتاليتەتىن ساقتاپ, «مىڭ ءولىپ, مىڭ تىرىلسە» دە يگى داستۇردەن اينىماي, كەلەر ۇرپاققا سونى اماناتتاۋمەن كەلگەن.
– قىزدىڭ بولاشاق رولىنە قاراي, «قىز – بولاشاق جار», «قىز – اۋىل اجارى», «قىز – ۇيگە قۇت», «قىزدىڭ جولى جىڭىشكە», «قىز – جات جۇرتتىق», «قىز – قىلىعىمەن ءسۇيكىمدى», «قىزى باردىڭ نازى بار» دەگەن سياقتى الەۋمەتتىك ماسەلەلەرمەن ۇشتاستىرىپ وتىرعان. مۇنىڭ ءوزى قىز بالانى ءار كەزدە ادال جار, ابزال انا, الەۋەتتى اجە بولىپ قالىپتاسۋىنا سەبىن تيگىزەرى داۋسىز, – دەيدى ەڭبەك ارداگەرى, ارداقتى انا ك.قويكەنقىزى.
سەميناردا «جالپى پەداگوگيكا جانە پسيحولوگيا» كافەدراسىنىڭ اعا وقىتۋشىلارى, پەداگوگيكا ماگيسترى س.بوپەتاەۆا, ج.كۇمىسبەكوۆا, سونداي-اق, ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى جالپى پەداگوگيكا جانە پسيحولوگيا كافەدراسىنىڭ مەڭگەرۋشىسى ج.ءجۇسىپوۆا جانە باسقا دا ۇستازدار, ستۋدەنتتەر ءوز ويلارىن ورتاعا سالدى.
سەيسەكۇل كوشىمبەتوۆا,
پەداگوگيكا عىلىمدارىنىڭ كانديداتى, دوتسەنت
تاراز